ترقی

آزاد دائرۃ المعارف، ویکیپیڈیا سے
:چھلانگ بطرف رہنمائی، تلاش
Tokyo odaiba.jpg
چند اہم الفاظ

ترق
ترقی
مترق (صفت)
مترقیہ (اسم)
مترقیت
ارتقاء

rise
progress
progressive
progressive
Progressivism
evolution

ترقی سے مراد عمومی مفہوم میں کسی بھی معاشرے میں اسکے رہنے والوں کے معیار زندگی (standard of living) میں ہونے والی بہتری کی ہوتی ہے، جس سے براہ راست ہر فرد کی کیفیت حیات (quality of life) اور راحت الوجود (well being) کے درجات میں اضافہ ہوتا ہے۔ راحت الوجود ، یعنی ایک انسان کا ذہنی اور جسمانی سکون ، وہ بنیادی عنصر ہے کہ جو کسی بھی معاشرے کی انفرادی اکائیوں یعنی اس کے افراد کو مثبت انداز میں متحرک کر سکتا ہے اور ترقی میں نا صرف اضافہ بلکہ اسکا تسلسل بھی قائم رکھنے میں اہم ترین کردار ادا کرتا ہے۔ راحت الوجود ، عزتِ نفس (self respect) اور بلا تفریقِ حیثیت و مذہب ، فردی عظمت و وقار کا احساس و تحفظ جب تک کسی معاشرے میں مہیا نا کیا جاسکے گا ، اس کی ترقی کے امکانات تاریک ہی رہیں گے[1]۔ کاروبار زندگی ، گھر اور خاندان کا معاشرے میں کردار اور تجارت و معاشی ترقی جیسے لوازمات کو سائنس میں ترقی کے لیۓ لازمی قرار دیا جاتا ہے، اور بنیادی طور پر یہ تمام عوامل راحت الوجود اور عزت نفس سے مشروط ہیں ، ان کی ناپیدی سے معاشی و مالی استحکام مفقود ہو جاتا ہے اور سائنس کے لیۓ درکار بنیادی لوازمات کی فراھمی محدود ہو کر کسی بھی قوم کے زوال کا سبب بن سکتی ہے[2]۔

ترقی کیا ہے؟[ترمیم]

یہ مضمون عمومی طور پر معاشرتی ترقی (social progress) کے بارے میں ہے۔ یعنی یہ کہ ترقی کن معاشروں میں ظاہر ہوتی ہے؟ ترقی سے اس معاشرے کے رہنے والوں کی زندگی میں کیا آسانیاں پیدا ہوتی ہیں؟ کیا ترقی میں ٹہراؤ اور بلکہ انحطاط یعنی منفی ترقی (negative progress) بھی ممکن ہے؟ ترقی کا تعلیم و سائنس سے زیادہ تعلق ہے یا معاشیات سے؟ اور سب سے بڑھ کر یہ کہ جھوٹی یا کاذب ترقی (pseudo progress) کس طرح حقیقی ترقی (real progress) کی راہیں مسدود کرتی ہے؟ اب چونکہ ان تمام سوالات کو باالفاظ مختصر ، ترقی کیا ہے؟ جیسی عبارت میں کوزہ بند کیا جاسکتا ہے اسی وجہ سے ابتدائی سرخی کا عنوان صرف ترقی یا معاشرتی ترقی کے بجاۓ ترقی کیا ہے مناسب معلوم ہوتا ہے۔ ترقی سے مراد صرف سائنس اور یا طرزیات کی موجودگی نہیں ، بلکہ ترقی کا اصل پیمانہ اس معاشرے میں رہنے والے انسانوں کی حالت و روزمرہ زندگی میں سہولت ہے۔ راحت الوجود کا مطلب محض ذاتی آسائش یا مالی خوشحالی نہیں بلکہ اس سے مراد انسانی وجود کی وہ کیفیت ہے کہ جس میں ایک مکمل شخصیت کی نشونما ہو اور وہ شخص معاشرے کا فعال اور مثبت رکن بن سکے اور اس کی شخصی نشونما کا ثمر معاشرے کی ترقی کی صورت میں ظاہر ہو۔ یعنی مختصراً یوں کہا جاسکتا ہے کہ کسی بھی معاشرے میں سائنسی ، طرزیاتی ، معاشی و اخلاقی معاملات میں بہتری یوں واقع ہونا کہ اس میں رہنے والوں کی کیفیت حیات کے درجات میں اضافہ ہوتا رہے ، ترقی کہلاتا ہے۔



حوالہ جات[ترمیم]

  1. ^ اقوام متحدہ کے انسانی حقوق کے ادارے پر معاشی ترقی سے متعلق ذکر۔
  2. ^ اسلامی سائنس کے اسباب زوال کے بارے میں ایک مقالہ
‘‘http://ur.wikipedia.org/w/index.php?title=ترقی&oldid=724678’’ مستعادہ منجانب