رضا شاہ پہلوی

آزاد دائرۃ المعارف، ویکیپیڈیا سے
:چھلانگ بطرف رہنمائی، تلاش
رضا شاہ پہلوی


پیدائش: 1877ء

انتقال: 1944ء

شاہ ایران ۔ اصل نام رضا خان ، سپاہی کے بیٹے تھے۔ معمولی تعلیم حاصل کی۔ نوجوانی میں فوج میں بھرتی ہوگئے اور جلد ہی اعلیٰ عہدے پر فائز ہو گئے ۔ 1921ء میں حکومت کا تختہ الٹ دیا اور 1923ء میں وزیراعظم کا عہدہ خود سنبھال لیا۔ انھوں نے فارس کو ایران کا نام دیا ۔ 1925ء میں خاندان قاچار کے آخری بادشاہ احمد شاہ کو معزول کرکے خود بادشاہ بن گئے اور رضا شاہ پہلوی کا لقب اختیار کیا ۔ انھوں نے فوج اور ملکی نظم و نسق میں اصلاحات کیں ، بیرونی ممالک کی مراعات منسوخ کر دیں اور ایران کو خارجی اثر و رسوخ سے پاک کر دیا ۔ ان کے عہد میں ٹرانس ایرانین ریلوے کا اجرا ہوا اور تہران یونیورسٹی قائم ہوئی۔ دوسری عالمی جنگ میں ایران نے جرمنی کے ساتھ دوستانہ تعلقات قائم رکھے۔ اس پر برطانوی اور روسی افواج ایران میں داخل ہو گئیں۔ انگریزوں نے رضا شاہ کو تخت چھوڑنے اور اپنے بیٹے محمد رضا شاہ پہلوی کو حکومت سونپنے پر مجبور کیا۔ 1941ء میں رضا شاہ جنوبی افریقہ چلے گئے اور وہیں وفات پائی۔