مقطوع (اصطلاح حدیث)

علم حدیث میں اس سے مراد وہ حدیث ہے جس میں سلسلہ سند کسی تابعی پر ختم ہوتا ہو یعنی کسی تابعی کے قول، فعل یا تقریر کو حدیثِ مقطوع کہتے ہیں۔

لفظ مقطوع ’’قَطَعَ‘‘ فعل سے اسمِ مفعول کا صیغہ ہے( جس کے معنیٰ ہیں کٹا ہوا، جدا کیا ہوا) اور یہ ’’وَصَلَ‘‘ کی ضد ہے (جس کے معنی ہیں ملانا اور جوڑنا)۔

محدثین کی اصطلاح میں:- یہ وہ قول و فعل ہے جس کی کسی تابعی(یعنی صحابی کے شاگرد) یا اس کے نیچے کے راوی کی طرف نسبت ہو۔

[النخبۃ الفکر: صفحہ59]

حدیث مقطوع کی مثال:

﴿امام مسلم فرماتے ہیں کہ﴾

مجھ سے حدیث بیان کی (1)ابوطاہر احمد بن عمرو بن عبد اللہ بن سرح نے، انھوں نے کہا کہ ہمیں خبر دی (2)ابن وھب نے، انھوں نے کہا کہ مجھ سے امام مالک نے فرمایا:

جان لے اس بات کو کہ جو شخص ہر سنی ہوئی بات کو بیان کر دے وہ غلطی سے محفوظ نہیں ہو سکتا اور نہ ہی ایسا شخص کبھی مقتدا اور امام بن سکتا ہے اس حال میں کہ وہ ہر سنی ہوئی بات کو بیان کر دے۔

[صحیح مسلم: حدیث نمبر 10]

دوسری سند میں ہے:

علمِ چار شخصوں سے نہ لیا جائے: بدعتی سے، بیوقوف(غیر فقیہ)سے،جو لوگوں کی باتوں میں جھوٹ بول لیتا ہو اگرچہ احادیثِ نبوی میں سچ ہی کہتا ہو،اور جو اس(موضوع)کی شان(موقع)کو ہی نہ سمجھتا ہو۔n

[المجالسة وجواهر العلم:1891+3053،جامع بيان العلم وفضله:1542]