وسطی امریکہ

وسطی امریکہ و کیریبین کا جغرافیائی نقشہ (اردو میں)

وسطی امریکہ (central america) امریکین کا وسطی جغرافیائی علاقہ ہے جسے ہسپانوی زبان میں سینٹرو امریکہ یا امریکہ سینٹرل کہا جاتا ہے۔ اسے اس طرح بھی بیان کیا جا سکتا ہے کہ براعظم شمالی امریکہ کا جنوبی علاقہ جو جنوب مشرق میں براعظم جنوبی امریکہ سے منسلک ہے.

یہ علاقہ تقریبا 592،000 مربع کلو میٹر پر پھیلا ہوا ہے۔ جبکہ آبادی 40،000،000 ہے۔

بحر الکاہل اس کے جنوب مغرب، بحیرہ کیریبین اس کے شمال مشرق اور خلیج میکسیکو اس کے شمال میں واقع ہے۔

یہ علاقہ آتش فشانی پٹی پر واقع ہے اس لیے آتش فشاں پھٹنے اور زلزلوں کے واقعات یہاں اکثر رونما ہوتے ہیں۔ نکاراگوا کا دارالحکومت ماناگوا 1931ء اور 1972ء میں زلزلوں سے تباہ ہوا جبکہ 2001ء میں دو زلزلوں نے ایل سیلواڈور کو زبردست نقصان پہنچایا۔

وسطی امریکہ مندرجہ ذیل ممالک میں منقسم ہے:

ملک کا نام بمعہ پرچم	فہرست ممالک بمطابق رقبہ (مربع کلومیٹر)	فہرست ممالک بمطابق آبادی (بمطابق یکم جولائی 2005ء)	فہرست ممالک بمطابق کثافتِ آبادی (فی مربع کلو میٹر)	دارالحکومت
بیلیز	22966	291000	14	بلموپان
کوسٹاریکا	51100	4327000	85	سان ہوزے
ایل سیلواڈور	21040	6881000	327	سان سلواڈور
گوئٹے مالا	108890	12599000	116	گوئٹے مالا شہر
ہونڈیورس	112492	7205000	64	ٹیگوسیگلپا
نکاراگوا	129494	5487000	42	ماناگوا
پاناما	75517	3232000	43	پاناما شہر
کل	521499	40001000	77

وسطی امریکہ کی کئی جدید تعریفوں میں بیلیز اور پاناما کو اس میں شامل کیا گیا ہے جو 19 ویں صدی میں اسپین سے آزادی حاصل کرنے کے بعد تخلیق پانے والی وفاقی جمہوریہ وسطی امریکہ میں شامل نہیں تھے۔

خاکنائے پاناما پر واقع پاناما ایک بین البراعظمی ملک ہے، جہاں بحر اوقیانوس اور بحر الکاہل کو ملانے والی نہر پاناما ملک کو دو حصوں میں منقسم کرنے کے ساتھ ساتھ براعظم شمالی و جنوبی امریکہ کو الگ بھی کرتی ہے۔