پٹنہ

پٹنہ شہر بھارت کی ریاست بہار کا دارالحکومت ہے۔ جدید پٹنہ دریائے گنگا کے جنوبی کنارے پر واقع ہے۔ اس کے قریب ہی دریائے کوسی ، سون ، گنڈک اور پنپن بھی گنگا میں گرتے ہیں۔ پٹنہ کی لمبائی تقریبا 25 کلومیٹر اور چوڑائی 9 - 10 کلومیٹر ہے۔ 18 لاکھ آبادی کے ساتھ پٹنہ بھارت میں آبادی کے لحاظ سے 14ویں نمبر پر ہے۔ مشرقی بھارت میں کلکتہ کے بعد پٹنہ دوسرا سب سے بڑا شہر ہے۔

اپنی تاریخی اہمیت اور ریاست کا صدر مقام ہونے کے ساتھ ساتھ پٹنہ صحت اور تعلیم کا مرکز بھی ہے۔ مقامی معیشت کا زیادہ تر دارومدار خدمات کی صنعت پر ہے جس کے باعث ضلع پٹنہ کی فی کس آمدنی بہار میں باقی تمام اضلاع سے زیادہ ہے: 31,441۔ اس وقت یہ دنیا کا 21واں سب سے تیزی سے ترقی کرنے والا شہر جبکہ بھارت کا 5واں سب سے تیزی سے ترقی کرنے والا شہر ہے۔ جون 2009 میں عالمی بینک نے نیا کاروبار شروع کرنے کے لیے بھارت میں دہلی کے بعد پٹنہ کو دوسرا بہترین شہر قرار دیا۔ پٹنہ دنیا کے قدیم ترین مسلسل آباد شہروں میں سے ایک ہے۔ قدیم پٹنہ، جب اس کا نام پاٹلیپُترا تھا، سلاطنت مگدھ کا دارالحکومت تھا۔ پاٹلیپُترا علوم و فنون کا بھی مشہور مرکز تھا۔ موریا سلطنت کے دور میں، لگ بھگ 300 ق م، اس کی آبادی 4,00,000 نفوس پر مشتمل تھی۔ شہر کا پرانا قلعہ بند حصہ، جو مقامی طور پر پٹنہ سٹی کہلاتا ہے، ایک اہم تجارتی مرکز ہے۔

بدھ مت ، ہندو مت اور جین مت کے مقامات مقدسہ ویشالی ، راجگیر ، نالندہ ، بودھ گَیا اور پاواپوری قریب ہی واقع ہیں۔ پٹنہ سکھوں کے لیے بھی مقدس ہے کیونکہ سکھوں کے دسویں گرو ، گرو گوبند سنگھ ، یہاں پیدا ہوئے تھے۔