پیشینس کوپر
| پیشینس کوپر | |
|---|---|
 | |
| معلومات شخصیت | |
| پیدائش | 1905 کولکاتہ، برطانوی ہند |
| وفات | 1993 پاکستان |
| شہریت |  بھارت (26 جنوری 1950–) برطانوی ہند (–14 اگست 1947) ڈومنین بھارت (15 اگست 1947–26 جنوری 1950) |
| شریک حیات | گل حامد |
| عملی زندگی | |
| پیشہ | اداکار |
 |
IMDB پر صفحہ |
درستی - ترمیم  | |
پیشینس کوپر (انگریزی: Patience Cooper) ایک بھارتی فلمی اداکارہ تھی۔ پیشنس کُوپر کا نام ہندوستانی فلمی صنعت کی پہلی خاتون سپر سٹار کی حیثیت سے ہمیشہ زندہ رہے گا۔ ہندوستانی فلمی صنعت کی پہلی خاتون سپر سٹار جن کو خاموش فلموں کی مدھو بالا بھی کہا جاتا ہے۔ 1920ء کی دہائی میں جب ہندوستان میں خاموش فلمیں بنائی جاتی تھیں تو اس وقت چند فنکاروں نے اپنی بہترین کارکردگی کی وجہ سے شہرت حاصل کی۔ ان میں سے ایک نام پیشنس کُوپر کا بھی تھا۔
حالات زندگی[ترمیم]
1905ء میں پیدا ہونے والی یہ خاتون اداکارہ اینگلو انڈین تھیں اور ان کا تعلق کلکتہ سے تھا۔
پیشنس کُوپر نے ذ اتی زندگی میں بہت صدمات جھیلے لیکن وہ ایک حوصلہ مند خاتون تھیں جنھوں نے بڑی ہمت اور استقامت سے حالات کا مقابلہ کیا۔ ان کی پہلی شادی گل حمید سے ہوئی جو اپنے وقت کے بڑے مشہور ہیرو تھے۔گل حمید بھی بڑے حسین تھے بلکہ ان کے بارے میں کہا جاتا ہے کہ وہ مردانہ وجاہت کا جیتا جاگتا شاہکار تھے۔ بد قسمتی سے شادی کے صرف 6برس بعد وہ اس جہانِ فانی سے رخصت ہو گئے۔ کُوپر کو جوانی میں ہی اپنے شوہر کی موت کا صدمہ برداشت کرنا پڑا۔
کُوپر نے یہ عظیم صدمہ برداشت کر لیا اور پھر سے زندگی کی ڈگر پر چلنے لگیں۔ کچھ حلقوں کی رائے میں کُوپر نے سب سے پہلے ایم اے ایچ اصفہانی سے شادی کی جو چائے کی صنعت سے وابستہ تھے۔ اس وقت ان کی عمر21سال تھی۔ ان کی شادی طلاق پر منتج ہوئی۔ جس کے بعد انھوں نے گل حمید کو اپنا شریک حیات بنایا۔ 1947ء میں پیشنس کُوپر پاکستان آ گئیں اور اپنا نام صابرہ بیگم رکھ لیا۔ وہ کراچی میں اپنی دو لے پالک بیٹیوں کیساتھ رہائش پزیر ہو گئیں جن کے نام زینت اور حلیمہ ہیں۔ اپنی زندگی کے آخری دن انھوں نے اپنی لے پالک بیٹیوں کے ساتھ کراچی میں گزارے۔ 1983ء میں ان کا انتقال ہو گیا۔[1]
فنّی خدمات[ترمیم]
انھوں نے 40کے قریب خاموش اور بولتی فلموں میں کام کیا لیکن انھوں نے زیادہ تر خاموش فلموں میں اداکاری کی۔ ان کی کامیاب فلموں کی تعداد اتنی زیادہ تھی کہ انھیں ہندوستانی فلمی صنعت کی پہلی خاتون سپر سٹار کہا جاتا ہے۔ انھوں نے1920ء سے لے کر 1944ء تک فلموں میں کام کیا۔ انھوں نے اپنے کیرئیر کا آغاز رقاصہ کی حیثیت سے کیا۔ 1922ء میں ان کی فلم ’’پتی بھکتی ‘‘ کو بہت کامیابی ملی۔ ان کے بارے میں یہ بھی کہا جاتا ہے کہ بھارتی سکرین پر پہلی بار ڈبل رول انھوں نے ادا کیا۔ پہلے فلم ’’پتنی پرتاب ‘‘میں وہ جڑواں بہنوں کی حیثیت سے جلوہ گر ہوئیں اور بعد میں انھوں نے فلم ’’کشمیری سُندری ‘‘میں ماں اور بیٹی کا ڈبل رول اداکیا لیکن ہندوستان کے کچھ فلمی حلقے اسے درست نہیں مانتے۔ ان کے مطابق سب سے پہلے اداکارہ اینا سلینکھے نے 1917ء میں ریلیز ہونیوالی خاموش فلم ’’ لنکا دہن ‘‘ میں رام اور سیتا کا ڈبل رول ادا کیا۔ ’’پتی بھگتی ‘‘ کو پیشنس کُوپرکی بہترین فلم قرار دیا جاتا ہے۔ اس فلم میں انھوں نے لیلا وتی کا کردار ادا کیا تھا۔ اس فلم کے ہدایتکار جے جے مدن تھے جو اپنے وقت کے عظیم ہدایتکار مانے جاتے تھے۔ فلم میں انھوں نے عورتوں کو یہ پیغام دیا کہ وہ اپنے شوہروں کے لیے سب کچھ وقف کر دیں۔ انھوں نے جے جے مدن کی ایک اور یادگار فلم میں اپنے فن کے جوہر دکھائے جس کا نام تھا ’’ لیلیٰ مجنوں ‘‘۔ 1923ء میں جے جے مدن کی ہی ایک اور فلم ’’نورجہاں ‘‘ میں پیشنس کُوپر نے اپنی فنکارانہ صلاحیتوں کا مظاہرہ کیا۔ اس کے علاوہ 1928ء میں ’’آنکھ کا نشہ ‘‘ اور پھر ’’ حورِ عرب ‘‘ میں بھی انھوں نے شاندار اداکاری کی بدولت فلم بینوں کو متاثر کیا۔ 1936ء میں انھیں گل حمید کی ہدایتکاری میں مشہور فلم ’’ خیبر پاس ‘‘ میں کام کرنے کا موقع ملا۔ یہ بولتی فلم تھی۔ اس کے بعد انھوں نے اپنے وقت کی ایک اور مشہور فلم ’’ باغی سپاہی ‘‘ میں با کمال اداکاری کی۔ اس فلم کے ہیرو گل حمید تھے جبکہ ہدایتکاری کے فرائض اے آر کاردار نے سر انجام دیے۔ پیشنس کُوپر کی دیگر مشہور فلموں میں ’’ فخر اسلام ‘‘، ’’نل مانیتی ‘‘، ’’ وشنو اوتار ‘‘ اور ’’علی بابا چالیس چور ‘‘ شامل ہیں۔ سیاہ آنکھیں، تیکھے نقوش اور آبنوسی بال۔1944ء میں انھوں نے فلموں سے ریٹائرمنٹ لے لی۔ ان کی آخری فلم ’’ ارادہ ‘‘ تھی۔[2]
حوالہ جات[ترمیم]
- ↑ پیشنس کوپر: ماضی کی حورِعرب[مردہ ربط]۔ اے آر وائی نیوز
- ↑ عبدالحفیظ ظفر (2013-10-11)۔ "پیشنس کُوپر - روزنامہ دنیا"۔ 06 جنوری 2019 میں اصل سے آرکائیو شدہ۔ اخذ شدہ بتاریخ 24 مارچ 2015
