موقوف (اصطلاح حدیث)

علم حدیث میں اس سے مراد وہ حدیث ہے جس میں سلسلہ سند کسی صحابی پر ختم ہوتا ہو یعنی کسی صحابی کے قول، فعل یا تقریر کو حدیثِ موقوف کہتے ہیں۔

لفظ’’موقوف‘‘ یہ’’وَقْف‘‘ مصدر سے اسمِ مفعول کا صیغہ ہے،جس کا معنیٰ ہے روکنا،گویا کہ راوی نے حدیث کو صحابی تک(پہنچا کر)روک دیا اور اسناد کے باقی سلسلہ کو آگے تک نہ چلایا۔ اصطلاح میں: یہ وہ قول یا فعل یا تقریر ہے جس کو کسی صحابی کی طرف منسوب کیا جائے۔

[علوم الحدیث لابن صلاح:صفحہ46]

حدیث موقوف کی مثال:

نبی کے بعد سب سے افضل کون؟

﴿امام بخاری نے لکھا کہ﴾

ہم سے (1)محمد بن کثیر نے بیان کیا، کہا ہم کو (2)سفیان ثوری نے خبر دی، کہا ہم سے (3)جامع بن ابی راشد نے بیان کیا، کہا ہم سے (5)ابویعلیٰ نے بیان کیا، ان سے (6)محمد بن حنفیہ نے بیان کیا کہ  میں نے (7)اپنے والد  (حضرت علی ؓ)  سے پوچھا کہ رسول اللہ ﷺ  کے بعد سب سے افضل صحابی کون ہیں؟ انھوں نے بتلایا: ابوبکر ؓ ۔ میں نے پوچھا: پھر کون ہیں؟ انھوں نے بتلایا: اس کے بعد عمر ؓ ہیں۔ مجھے اس کا اندیشہ ہوا کہ اب  (پھر میں نے پوچھا کہ اس کے بعد کون؟ تو آپ)  کہہ دیں گے کہ عثمان ؓ۔ اس لیے میں نے خود کہا: اس کے بعد آپ ہیں؟ یہ سن کر وہ بولے کہ میں تو صرف عام مسلمانوں کی جماعت کا ایک شخص ہوں۔

[صحیح بخاری»حدیث نمبر3671]