شفیع محمد شاہ

شفیع محمد شاہ
معلومات شخصیت
پیدائش	1949ء کنڈیارو، ضلع نوابشاہ، پاکستان
وفات	17 نومبر 2007(2007-11-17)ء کراچی، پاکستان
رہائش	کراچی
قومیت	پاکستانی
عملی زندگی
تعليم	ایم اے (بین الاقوامی تعلقات)
مادر علمی	سندھ یونیورسٹی
پیشہ	اداکار ،  ٹیلی ویژن اداکار
وجہ شہرت	اداکاری
کارہائے نمایاں	چاند گرہن آنچ دیواریں تیسرا کنارا ماروی نوری جنگل میرا انصاف
اعزازات
صدارتی تمغا برائے حسن کارکردگی بہترین اداکار - پاکستان ٹیلی وژن ستارۂ امتیاز
	IMDB پر صفحات

شفیع محمد شاہ (انگریزی: Shafi Muhammad Shah) (پیدائش: 1949ء - وفات: 17 نومبر، 2007ء) پاکستان سے تعلق رکھنے والے نامور ریڈیو، ٹیلی وژن اور فلم کے اداکار تھے۔

پیدائش

شفیع محمد شاہ 1949ء کوکنڈیارو، ضلع نوابشاہ، پاکستان میں پیدا ہوئے۔۔

تعلیم

انھوں نے سندھ یونیورسٹی سے بین الاقوامی تعلقات میں ایم اے کا امتحان پاس کیا

ملازمت

ایگری کلچر بنک میں ملازمت سے عملی زندگی کا آغاز کیا۔

فنی زندگی

اسی زمانے میں وہ اپنی خوب صورت آواز کی بدولت ریڈیو پاکستان میں بھی صداکاری کے جوہر دکھانے لگے۔ کچھ عرصہ بعد وہ ملازمت ترک کرکے لاہور چلے گئے جہاں اداکار محمد علی کی وساطت سے انھوں نے فلم کورا کاغذ میں کردار ادا کیا۔ لاہور میں ہی انھیں پاکستان ٹیلی وژن کے پروڈیوسر شاہزاد خلیل نے اپنے ڈرامے اڑتا آسمان سے چھوٹی اسکرین پر متعارف کروایا لیکن ان کی شہرت کا آغاز ڈراما سیریل تیسرا کنارا سے ہوا، یہ ڈراما بھی شہزاد خلیل کی پیشکش تھا۔ لاہور میں قیام کے دوران انھوں نے کئی اور فلموں میں کام کیا جن میں بیوی ہو تو ایسی، ایسا بھی ہوتا ہے، نصیبوں والی، روبی، تلاش، میرا انصاف اور الزام کے نام شامل ہیں۔ شفیع محمد شاہ نے ٹیلی وژن کے 50 سے زیادہ ڈراما سیریلز میں اداکاری کی جن میں آنچ، چاند گرہن، جنگل، دائرے، کالا پل، ماروی اور کھیلن کو مانگے چاند کے نام سرفہرست ہیں۔

رکنیت

شفیع محمد شاہ آرٹس کونسل آف پاکستان کراچی کی گورننگ باڈی کے رکن بھی منتخب ہوئے۔

سیاسی زندگی

انھوں نے پاکستان پیپلز پارٹی پارلیمنٹیرینز کے ٹکٹ پر 2002ء میں کراچی سے قومی اسمبلی کا انتخاب بھی لڑا تھا مگر کامیاب نہ ہو سکے۔

اعزازات

• 1989ء - صدارتی تمغا برائے حسن کارکردگی- حکومت پاکستان
• بہترین اداکار - پاکستان ٹیلی وژن
• ستارۂ امتیاز- حکومت پاکستان (بعد از مرگ)

وفات

شفیع محمد شاہ 17 نومبر، 2007ء کو کراچی، پاکستان میں وفات پا گئے اور وہ کراچی میں ڈیفنس سوسائٹی کے قبرستان میں سپرد خاک ہوئے۔