نریندر مودی کی تقریب حلف برداری

صدر جمہویہ پرنب مکھرجی، نریندر مودی سے وزیر اعظم بھارت کے عہدے کا حلف لے رہے ہیں۔
تاریخ	مئی 26، 2014 (2014-05-26)
شرکا	وزیراعظم بھارت، نریندر مودی نریندر مودی کی کابینہ

مضامین بسلسلہ نریندر مودی
ابتدائی زندگی اور تعلیم Public image Bibliography ابتدائی سیاسی زندگی Gujarat Legislative Assembly 2002 2007 2012 وزارت عظمیٰ Campaign Achhe din aane waale hain حلف برداری کابینہ Timeline Mann Ki Baat بین الاقوامی اسفار National policy Union budgets 2014 2015 2016 2017 Railway budgets 2014 2015 2016 Social/Rural Schemes Antyodaya بیٹی بچاؤ، بیٹی پڑھاؤ یوجنا سکنیا سمردھی نریندر مودی کا عہد وزارت عظمی OROP Housing for All Saubhagya scheme Adarsh Gram Yojana Gram Jyoti Soil health cards UDAY Krishi Sinchai Jeevan Pramaan DELP HRIDAY Economy/Financial Reforms Atal Pension Yojana 2016 banknote demonetisation Expenditure management commission Income declaration scheme, 2016 Garib Kalyan Yojana JAM Yojana Jan Dhan Yojana Jeevan Jyoti نریندر مودی کا عہد وزارت عظمی New Notes Suraksha Bima Projects Bharatmala Diamond Quadrilateral Bullet Train Sagar Mala Setu Bharatam National Agriculture Market Campaigns Accessible India ڈیجیٹل بھارت میک ان انڈیا Swachh Bharat Skill India Standup India Startup India Unnat Bharat Abhiyan Missions AMRUT Smart cities TB-Mission 2020 Mission Indradhanush Establishments NITI Aayog مجسمہ اتحاد War Memorial MUDRA Bank Laws Aadhaar Act Black Money Act GST Constitutional amendment Mines Act National Waterways Act Real Estate Act Road Transport and Safety Bill Securities Laws Act Operation Raahat Foreign policy Policies Asian South Asian Middle Eastern Act East policy India–Pacific Islands Forum Yoga Day New Development Bank Solar alliance World Hindi Secretariat BIMSTEC

راشٹرپتی بھون کا صحن جہاں تقریب منعقد ہوئی تھی

عہدے کا حلف

میں <نام> خدا کے نام سے حلف اٹھاتا ہوں/ اقرار صالح کرتا ہوں کہ میں بھارت کے آئین پر جو قانون کے بموجب طے پایا ہے اعتقاد رکھوں گا اور اس کا وفادار رہوں گا، میں بھارت کے اقتدار اعلی اور سالمیت کو برقرار رکھوں گا، میں یونین کے وزیر کی حیثیت سے اپنے فرائض وفاداری اور دیانتداری سے انجام دوں گا اور میں ہر طرح کے لوگوں کے ساتھ آئین اور قانون کے بموجب بلا خوف یا رعایت، عناد یا شفقت انصاف کروں گا۔

آئین ہند، تیسرا فہرست بند، جز اول

رازداری کا حلف

میں <نام> خدا کے نام سے حلف اٹھاتا ہوں/ اقرار صالح کرتا ہوں کہ کسی امر کی جو یونین کے وزیر کی حیثیت سے میرے زیر غور لایا جائے یا میرے علم میں آئے کسی شخص یا اشخاص کو سوائے اس کے کہ ایسے وزیر کی حیثیت سے میرے فرائض کی مناسب انجام دہی کے لیے ضروری ہو براہ راست یا بالواسطہ نہ اطلاع دوں گا اور نہ ظاہر کروں گا۔

آئین ہند، تیسرا فہرست بند، جز دوم

بھارتیہ جنتا پارٹی کے پارلیمانی رہنما نریندر مودی نے 26 مئی 2014ء کو پندرہ ویں وزیر اعظم بھارت کی حیثیت سے حلف اٹھایا اور یوں ان کے عہد وزارت عظمیٰ کا آغاز ہوا۔ اس موقع پر نریندر مودی کے ساتھ مزید 45 وزرا نے بھی حلف اٹھایا۔ ذرائع ابلاغ کے مطابق کسی بھارتی وزیر اعظم کی یہ پہلی تقریب حلف برداری تھی جس میں سارک ممالک کے سربراہ شریک ہوئے۔ پاکستان کے وزیر اعظم نواز شریف اور سری لنکا کے صدر مہند راج پکش کو اس تقریب میں شرکت کی وجہ سے اپنے اپنے ممالک میں مخالفت کا سامنا بھی رہا۔

پس منظر

16 مئی 2014ء کو انتخابات کے نتائج کے اعلان کے بعد نریندر مودی نے 20 مئی کو صدر جمہوریہ ہند پرنب مکھرجی سے ملاقات کی جس میں پرنب مکھرجی نے نریندر مودی کو اگلی حکومت کی تشکیل کی دعوت دی۔ اس انتخاب میں لوک سبھا کی کل 543 نشستوں میں سے بی جے پی اور اس کے اتحادی نیشنل ڈیموکریٹک الائنس نے 282 نشستیں حاصل کیں۔ سنہ 1984ء کے انتخابات کے بعد یہ پہلا موقع تھا جب کسی سیاسی جماعت کو اتنی زبردست اکثریت حاصل ہوئی۔ اس کامیابی کے بعد بی جے پی نے اعلان کیا کہ 26 مئی 2014ء کو شام 6 بجے (بھارتی معیاری وقت) نریندر مودی کی تقریب حلف برداری منعقد ہوگی۔

تقریب

بھارت کے دار الحکومت دہلی میں واقع راشٹرپتی بھون کے وسیع و عریض صحن میں یہ تقریب منعقد ہوئی۔ قبل ازیں اس صحن میں دو سابق وزیر اعظم چندر شیکھر (1990ء میں، سماج وادی جنتا پارٹی) اور اٹل بہاری واجپائی (1996ء اور 1998ء میں، بی جے پی) نے بھی وزارت عظمیٰ کا حلف اٹھایا تھا۔ اس تقریب کے لیے دربار ہال کی تجویز بھی پیش ہوئی تھی لیکن محض پانسو افراد کی گنجائش کی بنا پر اسے مسترد کر دیا گیا۔ بی جے پی نے واضح طور پر کہہ دیا تھا کہ یہ تقریب کھلے میدان میں منعقد ہوگی۔ وزیر اعلیٰ گجرات کی حیثیت سے بھی نریندر مودی نے اسی طرح کھلے میدان میں حلف اٹھایا تھا۔ تقریب میں شرکت کے لیے گجرات اور وارانسی سے اضافی ریل گاڑیاں چلائی گئیں تاکہ زائرین بروقت دہلی پہنچ سکیں۔ تبتی بارڈر پولیس کے خصوصی تربیت یافتہ کتوں کا "کے 9" دستہ اس مقام کی حفاظت کے لیے تعینات تھا۔ قبل ازیں اس جتھے کو سنہ 2010ء کے دولت مشرکہ کھیل اور دیگر نکسل زدہ علاقوں میں بھی استعمال کیا جا چکا تھا۔ تقریب کی راست نشریات کے لیے بھارت کے قومی نشریاتی ادارہ دوردرشن نے اچھی منصوبہ بندی کر رکھی تھی۔ اس تقریب کی کارروائیوں کو اشاراتی زبان میں نشر کرنے کے لیے ایک مترجم کو بھی مقرر کیا گیا تھا۔ اس طرح کا انتظام یوم جمہوریہ کے پریڈ کے موقع پر ہوا کرتا ہے لیکن کسی تقریب حلف برداری میں یہ انتظام پہلی دفعہ نظر آیا تھا۔ نیز دور درشن کے دیگر پندرہ علاقائی ٹی وی چینلوں نے بھی بھارت کی علاقائی زبانوں میں اس تقریب کو نشر کیا۔ علاوہ ازیں اس تقریب کو یوٹیوب پر بھی راست نشر کیا گیا جو اپنی نوعیت کا پہلا واقعہ تھا۔ تقریب کے اس پورے اہتمام و انتظام میں کل 34 لاکھ روپئے صرف ہوئے۔

مہمان

مہمانوں کی فہرست میں ریاستی سربراہان، سیاسی جماعتوں کے رہنما اور جملہ سارک ممالک کے سربراہ شامل تھے۔ اس لحاظ سے اسے "عظیم سفارتی تقریب" سمجھا گیا۔

بین الاقوامی شخصیات

جملہ سارک ممالک کے سربراہوں نے اس تقریب میں شرکت کی۔ کسی بھارتی وزیر اعظم کی یہ پہلی تقریب حلف برداری تھی جس میں تمام سارک ممالک کے سربراہ مدعو تھے۔ تقریب کے بعد نریندر مودی نے اپنی نو تشکیل شدہ حکومت کی جانب سے خارجہ پالیسی کے اس اقدام کو "درست اور بروقت" قرار دیا۔

• افغانستان - افغان صدر حامد کرزئی نے اس دعوت کو قبول کیا۔ گو کہ اُس وقت جاری انتخابات کے بعد انھیں صدارت سے معزول ہونا تھا، لیکن ان کے دعوت قبول کرنے کو یہ سمجھا گیا کہ مستقبل میں افغانستان بھارت کے ساتھ کام کرنے میں دلچسپی رکھتا ہے۔ ذرائع ابلاغ نے توجہ دلائی کہ ان کے بعد منصب صدارت پر فائز ہونے والے عبداللہ عبداللہ اور اشرف غنی احمدزئی بھی بھارت حامی ہیں۔
• بنگلادیش - وزیر اعظم حسینہ واجد کی طرف سے جتیو سانگشد کی اسپیکر شیریں شرمین چودھری نے اس دعوت کو قبول کیا کیونکہ حسینہ واجد کا جاپان کا سفر طے تھا۔
• بھوٹان - وزیر اعظم شیرنگ توبگے اس تقریب میں شریک ہوئے اور 27 مئی کو دونوں ممالک کے دو طرفہ تعلقات پر گفت و شنید کا وقت طے کیا۔
• مالدیپ - مالدیپ کے صدر عبد اللہ یمن عبد القیوم تقریب میں شریک ہوئے۔
• موریشس - وزیر اعظم نوین رمگولم تقریب میں شریک ہوئے۔
• نیپال - نیپالی وزیر اعظم سشیل کوئیرالا نے دعوت قبول کی۔
• پاکستان - پاکستانی وزیر اعظم نواز شریف کی جانب دعوت قبول کیے جانے کی خبر شائع ہوئی تو بھارتی سیاست دانوں نے سخت رد عمل ظاہر کیا۔ البتہ نیشنل کانفرنس کے رہنما عمر عبداللہ اس واقعہ سے خوش تھے۔ انھوں نے کہا کہ یہ واقعہ ہند و پاک تعلقات کی نئی شروعات کی علامت ہے۔ این ڈی اے کے کلیدی اتحادی شیو سینا نے - جس کا دعویٰ ہے کہ پاکستان بھارت میں دہشت گردانہ کارروائیوں کا ذمہ دار ہے - نواز شریف کی شرکت کی جم کر مخالفت کی۔ تاہم اس دعوت کی بنا پر بھارت میں امید کی ایک نئی کرن پیدا ہوئی اور خصوصاً بھارت کے مسلمانوں نے اسے اچھا شگون قرار دیا۔ پاکستان کے صحافیوں اور سیاست دانوں کی جانب سے اس پر ملا جلا رد عمل سامنے آیا۔
• سری لنکا - صدر مہند راج پکش کی شرکت تمل ناڈو کے سیاست دانوں کے درمیان میں زبردست تنقید کا باعث بنی۔ دو سیاسی جماعتوں نے نریندری مودی کی اس دعوت کی مخالفت کی۔ ایک سیاسی رہنما نے مودی سے مل کر ان کا ذہن بدلنے کی کوشش بھی کی۔ کانگریسی رہنما بھی اس دعوت کے مخالف تھے۔ چہار جانب سے ہو رہی اس مخالفت کے درمیان میں سی پی آئی نے بیان دیا کہ اس موقع کو غنیمت جانتے ہوئے اب مرکز کو لنکا تمل مسئلہ حل کر لینا چاہیے۔ تمل طلبہ کے ایک گروہ "دہلی تمل یوتھ فورم" نے اتوار کے روز دہلی کی سڑکوں پر جم کر مظاہرہ کیا۔ تاہم مودی کی اچھی ساکھ اور اس امن پسندی کی بنا پر پاکستان اور سری لنکا نے بھارتی مچھیروں کو رہا کر دیا۔ پاکستان نے 25 مئی کو کراچی کی ملیر جیل اور حیدرآباد، سندھ کی نارا جیل سے 151 مچھیرے رہا کیے۔ مودی نے حکومت پاکستان اور حکومت سری لنکا کے اقدام کو سراہا۔

جلا وطن تبتی حکومت کے وزیر اعظم لوبسانگ سانگے بھی اس تقریب میں شریک تھے جس کی چینی حکومت نے مخالفت کی۔

ملکی شخصیات

سبک دوش ہونے والے وزیر اعظم منموہن سنگھ، سابق صدور عبد الکلام اور پرتیبھا پاٹل، نائب صدر محمد حامد انصاری، کانگریس کی صدر سونیا گاندھی شرکائے تقریب میں شامل تھے۔ نیز بھارت کے تمام صوبوں کے وزرائے اعلیٰ کو بھی اس میں شرکت کی دعوت دی گئی تھی۔ ان میں سے وزیر اعلیٰ کرناٹک سدارمیا (کانگریس) اور وزیر اعلیٰ کیرلا اومن چانڈی (کانگریس) اپنی پہلے سے طے شدہ مصروفیات کے باعث تقریب میں شرکت نہیں کر سکے لیکن اپنی نیک تمناؤں سے نوازا۔ وزیر اعلیٰ تمل ناڈو جے للتا نے - جن کی جماعت نے انتخابات میں تیسرے نمبر پر کامیابی حاصل کی تھی - تقریب میں شرکت سے انکار کر دیا، جبکہ وزیر اعلیٰ بنگال ممتا بنرجی نے شرکت کے لیے مکل رائے اور امت مترا کو بھیجنے کا فیصلہ کیا۔ وزیر اعلیٰ مدھیہ پردیش شیوراج سنگھ چوہان (بی جے پی) اور ان کی پوری کابینہ نے تقریب میں شرکت اور وہاں سے بھوپال واپسی کے لیے ایک جہاز کرایہ پر حاصل کر لیا تھا۔

جن مشاہیر کو اس تقریب میں مدعو کیا گیا تھا ان میں سلمان خان، دھرمیندر، انوپم کھیر، مدھر بھنڈارکر، سریش گوپی، وویک اوبیرائے، لتا منگیشکر، رجنی کانت اور امیتابھ بچن قابل ذکر ہیں۔

وڈودرا کے چائے فروش کرن مہیڈا جنھوں نے مودی کی امیدواری کی تجویز پیش کی تھی، بھی اس تقریب میں مدعو تھے۔

فتح کے جشن

اس تقریب حلف برداری کے علاوہ ملک کے بہت سے مقامات پر فتح کے جشن منائے گئے۔ دہلی میں چاندنی چوک اور دہلی ٹاؤن ہال میں ایل ای ڈی اسکرینیں نصب کی گئی تھیں جن پر تقریب کی کارروائیاں نشر ہو رہی تھیں اور وہاں شیرنی تقسیم کرنے کا بھی منصوبہ تھا۔ بی جے پی کے دہلوی سیاست دان ہرش وردھن نے کہا کہ "ہم اسے عوام کے لیے خاص دن بنانا چاہتے ہیں"۔ شملہ میں "کانگریس کی دس سالہ حکمرانی کے خاتمہ" پر دیوالی کی طرح جشن منایا اور چراغاں کیا گیا۔ علاوہ ازیں نریندر مودی کے اپنے صوبہ گجرات میں بھی اسی انداز میں جشن منانے کی تیاری کی گئی تھی۔ گجرات کے اڑتالیس ہوٹلوں نے شام چھ سے نو بجے تک اپنے گاہکوں کو مفت چائے پیش کی۔ مودی کے حلقہ انتخاب وڈودرا نے اسے "وڈودرا کے لیے قابل فخر دن" قرار دیا۔ ان اہتمامات کے ساتھ اسکول کے طلبہ مین تعلیمی اشیا بھی تقسیم کی گئیں۔ مدھیہ پردیش کے شہر اندور کی مندروں، مسجدوں اور گردواراؤں میں بھی دعائیں کی گئیں۔ کرناٹک کے شہر میسور میں پانچ ہزار لڈو تقسیم کیے گئے۔

نیز نیو یارک شہر کے ٹائم اسکوائر پر اور امریکا کے دوسرے شہروں میں بھی جشن منایا گیا۔ نیو جرسی کی ایک بھارتی ہوٹل نے وعدہ کیا تھا کہ اگر مودی جیتیں تو وہ مفت میتھی پکوڑے تقسیم کرے گا۔ آسٹریلیا اور کینیڈا میں بھی فتح کے جشن منائے گئے۔

بیرونی روابط

• ویکی ذخائر پر Swearing-in ceremony of Narendra Modi سے متعلق تصاویر