برام اسٹوکر

برام اسٹوکر
معلومات شخصیت
پیدائشی نام	(انگریزی میں: Abraham Stoker)
پیدائش	8 نومبر 1847ء   کلونٹارف
وفات	20 اپریل 1912ء (65 سال)
وجہ وفات	سکتہ
طرز وفات	طبعی موت
شہریت	متحدہ مملکت برطانیہ عظمی و آئر لینڈ جمہوریہ آئرلینڈ
آنکھوں کا رنگ	بھورا
بالوں کا رنگ	سرخ
عارضہ	گنٹھیا سکتہ
تعداد اولاد	1
والدہ	چارلوٹے سٹوکر
عملی زندگی
مادر علمی	ٹرنیٹی کالج، ڈبلن (1864–1870)
تخصص تعلیم	خالص ریاضی
پیشہ	مصنف ،  صحافی ،  ناول نگار ،  منظر نویس ،  کلرک ،  تھیٹر مینیجر
پیشہ ورانہ زبان	انگریزی
ملازمت	قلعہ ڈبلن
کارہائے نمایاں	ڈراکیولا ،  انڈر دی سن سیٹ ،  مس بیٹی
دستخط
ویب سائٹ
ویب سائٹ	باضابطہ ویب سائٹ
	IMDB پر صفحات
باب ادب

ابراہم اسٹوکر (8 نومبر 1847ء تا 20 اپریل 1912ء)، جو اپنے قلمی نام برام اسٹوکر کے نام سے زیادہ مشہور ہیں، سر زمینِ آئرستان سے تعلق رکھنے والے تھیٹر مینیجر اور ناول نگار تھے۔ وہ اپنے شہرۂ آفاق ناول ڈراکیولا (1897ء) کے مصنف کی حیثیت سے جانے جاتے ہیں، جو مکاتیبی انداز میں لکھا گیا گوتھک ہیبت ناک ناول ہے اور ادبِ خون آشام میں سنگِ میل سمجھا جاتا ہے۔ اس تصنیف نے آنے والے وقتوں میں خیالی خون آشام (ویمپائر) کرداروں کی صورت گری پر گہرا اثر ڈالا اور اسٹوکر کو بہت سے لوگوں نے ”ویمپائر فکشن کا بے تاج بادشاہ“ قرار دیا۔

اسٹوکر اپنی زندگی کے ابتدائی سات برس ایک نا معلوم بیماری کے باعث بستر پر پڑے رہے۔ ابتدائی تعلیم انھوں نے گھر پر ہی حاصل کی اور بعد ازاں 1864ء میں ٹرینٹی کالج ڈبلن میں داخل ہوئے۔ وہاں وہ رگبی کے بہترین کھلاڑی ثابت ہوئے اور یونیورسٹی کی فلسفیانہ انجمن اور طلبہ یونین کے نمایاں رکن رہے۔ اسی دوران انھیں ادب سے گہری دلچسپی پیدا ہوئی، وہ انجمن کے آڈیٹر منتخب ہوئے اور اپنی پہلی علمی تحریر پیش کی۔ ابتدائی پیشہ ورانہ حیات میں اسٹوکر نے ڈبلن کیسل میں دس برس سرکاری ملازمت کی اور اسی دوران ’ڈبلن ایوننگ میل‘ کے لیے ڈراما نقاد بھی رہے۔ بعد ازاں انھوں نے کئی اخبارات مثلاً ڈیلی ٹیلی گراف کے لیے تھیٹر کے تبصرے لکھے اور بعض اوقات مختصر افسانے بھی تحریر کیے۔ اپنی زندگی میں وہ زیادہ تر معروف تھے بحیثیت نجی معاون سر ہنری اِروِنگ اور بحیثیت بزنس مینیجر لائسیم تھیٹر لندن کے، جو اِروِنگ کی ملکیت تھا۔ فرصت کے وقت میں وہ اکثر سفر کرتے بالخصوص اسکاٹ لینڈ کے کُروڈن بے کا رُخ کرتے، جو ان کے دو ناولوں کا ارضیہ بنا اور ناول ڈراکیولا کے لیے تحریک کا ذریعہ بھی۔ وہ آرتھر کانن ڈائل اور آسکر وائلڈ جیسے ادیبوں کے دوست تھے اور تجرباتی ناول دی فیٹ آف فینیلا (1892ء) میں دیگر مصنفین کے ساتھ اشتراک بھی کیا۔ اسٹوکر نے ہیبت اور اسرار پر مبنی درجن بھر ناول اور ناولٹ لکھے جن میں دی جویل آف سیون اسٹارز (1903ء)، دی لیئر آف دی وائٹ ورم (1911ء) اور دی مسٹری آف دی سی (1902ء) شامل ہیں۔ تاہم گوتھک ہیبت ناک ادب کے متاثر کن مصنفین میں ان کی شہرت کا انحصار صرف ڈراکیولا پر ہے۔ بیسویں صدی عیسوی کے اوائل سے یہ ناول ویمپائر ادب کی سب سے زیادہ فروخت ہونے والی کتابوں میں شامل ہو گیا اور کاؤنٹ ڈراکیولا وکٹورین عہد کے نمایاں ترین خیالی کرداروں میں شمار ہونے لگا۔ پہلی اشاعت کے بعد سے اب تک اس کردار کو سات سو سے زیادہ بار مختلف ذرائع ابلاغ میں ڈھالا جا چکا ہے۔