جامع قرویین

جامع قرویین
ملک	المغرب
جگہ	فاس
تاسیس سال	857،  859
إحداثيات	34°03′54″N 4°58′25″W

 

جامع قرویین یا مسجد قرویین (جسے "جامع الجامعة" کے نام سے بھی جانا جاتا ہے) یہ ایک جامع مسجد ہے جو مراکش کے شہر فاس میں واقع ہے، جو ملک کے شمال مشرقی کونے میں ہے۔ اس مسجد کی تعمیر کا آغاز یکم رمضان 245 ہجری بمطابق 30 نومبر 859 عیسوی کو ادریسی حکمران یحییٰ اول کے حکم سے کیا گیا۔ ام البنین فاطمہ الفہریہ نے اس مسجد کی تعمیر کے لیے اپنا پورا ترکہ وقف کر دیا اور تعمیر مکمل ہونے تک روزہ رکھے رکھا اور جب مسجد مکمل ہو گئی تو اس میں شکرانے کی نماز ادا کی۔ شہر کے باشندے اور حکمران مسجد کی توسیع، مرمت اور دیکھ بھال میں حصہ لیتے رہے۔

زناتی امرا نے اندلس کے اموی حکمرانوں کی مدد سے مسجد میں تقریباً 3000 مربع میٹر کا اضافہ کیا اور ان کے بعد مرابطین نے مزید وسعت دی۔ مسجد میں موجود چوڑی اور مربع شکل کی مینار آج بھی زناتی حکمرانوں کے دور کی توسیع کی یاد دلاتی ہے اور یہ شمالی افریقہ میں سب سے قدیم مربع میناروں میں شمار ہوتی ہے۔ مرابطین نے مسجد میں کئی اضافے کیے، جس سے اس کی سادگی میں کچھ تبدیلیاں آئیں، مگر اس کی عمومی شناخت برقرار رہی۔ معماروں نے قباب، محراب اور قرآنی آیات اور دعاؤں کی خطاطی میں بڑی مہارت دکھائی۔ مرابطین کے دور کا سب سے اہم اضافہ وہ منبر ہے جو آج بھی مسجد میں موجود ہے۔ ان کے بعد موحدین نے مسجد میں ایک عظیم الشان جھاڑ فانوس (ثریا) نصب کی جو آج بھی فاس کی اس مسجد کی زینت ہے۔

مسجد القرویین میں کل سترہ دروازے ہیں اور دو بڑے حصے ہیں جو صحن کے دونوں جانب واقع ہیں۔ ہر حصے میں سنگ مرمر سے بنے وضو کے مقامات موجود ہیں، جو غرناطہ کے قصر الحمراء کے "صحن الأسود" (شیر کے صحن) کے طرزِ تعمیر سے مشابہت رکھتے ہیں۔ مسجد میں سہولیات کا بھی خصوصی خیال رکھا گیا، اسے مختلف جھاڑ فانوسوں، شمسی اور ریتیلی گھڑیوں سے مزین کیا گیا۔ مزید برآں، اس میں قاضی کی نشست، ایک وسیع محراب اور ایک عظیم الشان کتب خانہ بھی شامل کیا گیا، جس میں قرآن کے نسخے اور دیگر کتب محفوظ ہیں۔ مجموعی طور پر، اس مسجد کا طرزِ تعمیر اندلسی طرزِ تعمیر کا عکاس ہے۔

جامعۃ القرویین

جامع کی تعمیر کے بعد علما نے اس میں علمی حلقے قائم کیے، جہاں طلبہ بڑی تعداد میں جمع ہو کر علم حاصل کرتے تھے۔ شہر کے مختلف حکمرانوں کی خصوصی توجہ کی بدولت فاس ایک علمی و ثقافتی مرکز میں تبدیل ہو گیا، جو قرطبہ اور بغداد جیسے مشہور علمی مراکز کا ہم پلہ بن گیا۔ یہ خیال کیا جاتا ہے کہ جامع القرویین نے مسجد سے ایک تعلیمی ادارے کی حیثیت اختیار کرنا مرابطی دور میں شروع کیا، جب متعدد علما نے اسے اپنی تدریس کا مرکز بنایا۔ دستیاب تاریخی حوالوں کے مطابق، جامع القرویین حقیقی معنوں میں مرینی دور میں ایک جامعہ (یونیورسٹی) کی شکل اختیار کر گیا، جب اس کے ارد گرد کئی مدارس تعمیر کیے گئے اور اسے علمی دروس اور کتب خانوں سے مزید تقویت دی گئی۔

بیرونی روابط

• تاريخ بنا الجامعآرکائیو شدہ بذریعہ habous.gov.ma
• جامع وجامعة القرويين من موقع الإيسيسكو