جیٹھمل پرسرام گلراجانی

جیٹھمل پرسرام گلراجانی
(سندھی میں: ڄيٺمل پرسرام گلراجاڻي)
معلومات شخصیت
پیدائش	سنہ 1886ء   حیدرآباد ،  سندھ ،  بمبئی پریزیڈنسی
وفات	6 جولا‎ئی 1948ء (61–62 سال)  ممبئی ،  بھارت
شہریت	برطانوی ہند بھارت
عملی زندگی
پیشہ	ناول نگار ،  مترجم ،  سیرت نگار ،  سوانح نگار
پیشہ ورانہ زبان	سندھی
تحریک	ترقی پسند تحریک
باب ادب

جیٹھمل پرسرام گلراجانی (انگریزی: Jethmal Parsram Gulrajani، سندھی= ڄيٺمل پرسرام گلراجاڻي)، (پیدائش:1886ء- وفات:6 جولائی 1948ء) بھارت سے تعلق رکھنے والے سندھی زبان کے نامور ادیب، ناول نگار، مورخ، ڈراما نویس ، سیرت نگار، مترجم اور مضمون نگار تھے۔ انھوں نے جدید سندھی ادب میں روشن خیالی کو تقویت پہنچائی۔

حالات زندگی

جیٹھمل پرسرام گلراجانی 1886ء کو حیدرآباد، سندھ، بمبئی پریزیڈنسی، برطانوی ہندوستان میں پیدا ہوئے۔ انھوں نے نول رائے ہیرانند اکیڈمی سے ابتدائی تعلیم حاصل کی، پھر میٹرک کا امتحان ممبئی یونیورسٹی سے پاس کیا۔ 1902ء میں نول رائے ہیرانند اکیڈمی اور پھر 1910ء میں سندھ مدرسۃ الاسلام میں استاد مقرر ہوئے۔ 1916ء میں وہ ہوم رول لیگ میں شامل ہو گئے۔ اینی بیسنٹ کے نام پر حیدرآباد میں بیسنت ہال انھیں کی کوششوں سے تعمیر ہوا۔ 1922ء میں وہ سندھ نیشنل کالج جسے اب گورنمنٹ کالج یونیورسٹی حیدرآباد کہا جاتا ہے، میں سندھی زبان کے پروفیسر مقرر ہوئے جہاں انھوں نے 1941ء تک تدریسی خدمات انجام دیں۔ انھوں نے جدید سندھی ادب میں روشن خیالی کے پیروکار تھے۔ ان پر شروع میں ہی سے تصوف اور تھیوسافیکل خیالات چھائے ہوئے تھے۔ چناں چہ انسانی ہمدردی اور عالم گیریت ان کے مزاج کا حصہ بن چکے تھے۔ 1914ء میں انھوں نے لعل چند امر ڈنومل کے ساتھ مل کر سندھ ساہت سوسائٹی قائم کی تھی جس نے مختصر سی مدت میں نہایت گراں قدر کتابوں کی اشاعت کی۔ انھوں نے 1924ء میں ایک ماہنامہ روح رہان بھی جاری کیا جو 1944ء تک نہایت سرگرمی سے جدید سندھی ادب کی نشر و اشاعت میں مشغول رہا ہے۔ ان پر ترقی پسند تحریک کا بہت اثر تھا، اسی وجہ سے میرپور خاص میں جی ایم سید کے ساتھ مل کر سندھ ہاری کمیٹی کی بنیاد رکھی۔ تقسیم ہند کے بعد وہ بھارت منتقل ہو گئے اور بمبئی میں مستقل سکونت اختیار کی۔ پرکاش اور سندھ ہیرالڈ نامی اخبارات جاری کیں۔ ان کی تصنیف و تالیف کم و بیش تیس کے قریب ہیں۔ جس میں پیغمبر اسلام، فلاسفی کیا ہے، سچل سرمست، شاہ لطیف کی کہانیاں (دو حصے)، شاہ کی کہانیوں کا مفہوم، میراں بائی، ایمرسن، یوگ جی سمجھانی، طوفان (شیکسیئر کے ڈرامے Tempest کا سندھی ترجمہ)، شیکسپیئر کے ڈرامے ہملٹ کا ماخوذ ترجمہ، فاؤسٹ کا سندھی ترجمہ، مونا وانا (ترجمہ)، سوشلزم وغیرہ شامل ہیں۔ اس کے علاوہ لاتعداد مضامین ہیں جو اخبارات و رسائل میں شائع ہوتے رہے ہیں۔

وفات

جیٹھمل پرسرام گلراجانی 6 جولائی 1948ء کو بمبئی ،بھارت میں وفات پا گئے۔