خضدار اسکول بس حملہ 2025ء

خضدار اسکول بس حملہ 2025ء
بسلسلہ بلوچستان تنازع اور پاکستان میں دہشت گردی
حملے کے بعد بس کے مناظر
مقام	خضدار، بلوچستان، پاکستان
تاریخ	21 مئی 2025ء
حملے کی قسم	خود کش دھماکا، دیسی ساختہ دھماکا خیز آلے کا حملہ، کار کے ذریعے حملہ
ہلاکتیں	11 (حملہ آور سمیت)
زخمی	53
شرکا کی تعداد	1

خضدار اسکول بس حملہ 21 مئی 2025ء کو پاکستان کے جنوب مغربی صوبہ بلوچستان کے شہر خضدار میں پیش آیا۔ یہ ایک خودکش حملہ تھا جس میں آرمی پبلک اسکول کے طلبہ کو لے جانے والی ایک بس کو نشانہ بنایا گیا۔ حملہ صبح تقریباً 7 بج کر 40 منٹ پر اُس وقت ہوا جب ایک خودکش حملہ آور نے دھماکا خیز مواد سے لدی گاڑی بس سے ٹکرا دی۔ دھماکے کے نتیجے میں 10 افراد جاں بحق ہوئے جن میں آٹھ بچے، بس کا ڈرائیور اور ایک کنڈکٹر شامل تھے۔ اس دھماکے میں مجموعی طور پر 53 افراد زخمی ہوئے، جن میں 39 بچے شامل ہیں۔

حملہ

21 مئی 2025ء کو پاکستان کے جنوب مغربی صوبہ بلوچستان کے شہر خضدار میں ایک خودکش حملہ آور نے بارود سے بھری گاڑی ایک اسکول بس سے ٹکرا دی۔ یہ واقعہ زیرو پوائنٹ کے مقام پر پیش آیا، جو شہر کے مرکز سے تقریباً 8 کلومیٹر کے فاصلے پر واقع ہے۔ بس میں خضدار کے فوج کے زیرِ انتظام اسکول کے 46 طلبہ سوار تھے۔ حملے میں تین بچے موقع پر ہی جاں بحق ہو گئے، جبکہ متعدد دیگر زخمی ہوئے۔ بعد ازاں مزید پانچ طلبہ و طالبات زخموں کی تاب نہ لاتے ہوئے چل بسے، جس سے ہلاکتوں کی مجموعہ تعداد بڑھ کر دس ہو گئی۔

بعد ازاں بم ڈسپوزل اسکواڈ نے تصدیق کی کہ حملہ آور کی گاڑی میں 30 کلو گرام سے زائد بارودی مواد موجود تھا۔

ذمہ داری

بم دھماکے کی ذمہ داری کسی گروہ نے فوری طور پر قبول نہیں کی۔ پاکستانی حکام نے بھارت کی خفیہ ایجنسیوں پر الزام عائد کیا کہ انھوں نے یہ حملہ پراکسی عسکریت پسند گروہوں کے ذریعے کروایا، جس کا تعلق گذشتہ ماہ پاہلگام حملے اور اس کے بعد شروع ہونے والے پاک بھارت تنازع 2025ء کے تناظر میں بڑھتی ہوئی دو طرفہ کشیدگی سے جوڑا گیا۔ ڈوئچے ویلے اردو نے لکھا کہ مبصرین کے مطابق اس حملے کے کئی محرکات ہو سکتے ہیں لیکن یہ بھی کہا جا رہا ہے کہ اگر سیکیورٹی پلان میں کوئی خامیاں نہ ہوتیں اور مؤثر انتظامات کیے جاتے تو شاید حملے کو روکا جا سکتا تھا۔

پاکستانی حکام نے اشارہ دیا کہ حملے میں بلوچستان لبریشن آرمی کے پرانے طریقوں کی جھلک موجود تھی اور اس کی منصوبہ بندی پہلے سے کی گئی تھی، جس کا مقصد پاک فوج کے خاندانوں کو نشانہ بنا کر ان کا حوصلہ پست کرنا تھا۔ واقعے کی ابتدائی تحقیقاتی رپورٹ حکومت کو پیش کر دی گئی جبکہ مقامی حکام نے محکمہ انسداد دہشت گردی (سی ٹی ڈی) تھانے میں مقدمہ بھی درج کیا گیا۔

بھارت نے ان الزامات کو مسترد کر دیا۔ بھارتی وزارت خارجہ کے ترجمان رندھیر جیسوال نے ایکس پر ایک بیان میں کہا کہ بھارت خضدار کے واقعے میں ملوث ہونے سے متعلق پاکستان کے بے بنیاد الزامات کو مسترد کرتا ہے۔ انھوں نے مزید کہا کہ پاکستان کا یہ دعویٰ اپنی اس ساکھ سے توجہ ہٹانے کی کوشش ہے جو اسے دنیا بھر میں دہشت گردی کے مرکز کے طور پر حاصل ہے۔

پاکستان انسٹی ٹیوٹ فار کانفلکٹ اینڈ سیکیورٹی اسٹڈیز کے منیجنگ ڈائریکٹر اور اسلام آباد میں مقیم سلامتی امور کے تجربہ کار تجزیہ کار عبد اللہ خان نے ڈوئچے ویلے کو بتایا کہ بلوچستان کی شورش پیچیدہ ہے اور ہمیں کسی پر بغیر تحقیق کے الزام نہیں لگانا چاہیے، جیسا کہ بھارت نے پہلگام حملے پر کیا تھا، کیونکہ اب تک کسی تنظیم نے اس حملے کی ذمہ داری قبول نہیں کی، برخلاف ماضی کے حملوں جیسے جعفر ایکسپریس کا اغوا۔ انھوں نے کہا کہ ممکن ہے کہ اس حملے کا مقصد ریاستی رٹ کو کمزور کرنا ہو جیسا کہ بعض امن دشمن عناصر کرتے ہیں۔

بلوچ امور کے تجزیہ کار اور سندھ کے سابق صوبائی وزیر میر خدا بخش مری نے کہا کہ صوبائی حکومت اپنی نا اہلی چھپانے کے لیے باہر کے عناصر کو مورد الزام ٹھہرا رہی ہے۔ ان کے بقول اس صورت حال کو بہتر بنانے کے لیے جامع تحقیقات پر مبنی حکمت عملی تیار کرنا ضروری ہے، ورنہ صوبائی حکومت اپنی نااہلی کی وجہ سے ریاست کو بدنام کر رہی ہے اور اس غفلت و بے توجہی سے وہ عناصر فائدہ اٹھا رہے ہیں جو یہاں امن نہیں چاہتے۔

پاک فوج کے شعبہ تعلقات عامہ (آئی ایس پی آر) کے سربراہ احمد شریف چودھری کی جانب سے خضدار حملے کو بیرونی عناصر سے جوڑنے کے بعد حکومت پاکستان نے اعلان کیا کہ وہ مجرموں کے خلاف فیصلہ کن کارروائی کرے گی اور ان کو انصاف کے کٹہرے میں لایا جائے گا۔ جنرل چودھری نے یہ بھی دعویٰ کیا کہ ”بھارتی خفیہ ایجنسی را (ریسرچ اینڈ انیلیسس وِنگ) سے منسلک بھارتی سوشل میڈیا اکاؤنٹوں نے حملے سے قبل اس بارے میں پوسٹ کی تھیں۔“

تحقیقات

واقعے کے بعد پاکستان کے محکمۂ انسدادِ دہشت گردی (سی ٹی ڈی) نے باضابطہ طور پر مقدمہ درج کیا اور خفیہ ایجنسیوں کے ساتھ مل کر تحقیقات کا آغاز کیا۔ ابتدائی تجزیے میں تصدیق ہوئی کہ دھماکے میں 30 کلوگرام سے زائد بارودی مواد استعمال کیا گیا تھا، جو ایک گاڑی میں نصب دیسی ساختہ دھماکا خیز آلہ (VBIED) کے ذریعے پھاڑا گیا۔ قانونی ٹیموں نے جائے وقوعہ سے شواہد اکٹھے کیے، جن میں گاڑی کے ملبے اور بارود کے ذرات شامل تھے۔ بعد ازاں پاکستانی حکام نے الزام عائد کیا کہ اس حملے کے پیچھے بلوچ لبریشن آرمی ملوث ہے اور بھارتی خفیہ ایجنسی کی پشت پناہی کا دعویٰ کیا جس کی بھارت نے سختی سے تردید کی۔ 26 مئی 2025ء تک کسی گروہ نے حملے کی ذمہ داری قبول نہیں کی تھی اور تحقیقات تاحال جاری ہیں۔

رد عمل

• افغانستان: اسلامی امارت افغانستان کے ترجمان ذبیح اللہ مجاہد نے اس حملے کی شدید مذمت کی اور ساتھ ہی پاکستان کی جانب سے حملے میں افغان مداخلت سے متعلق کسی بھی نسبت کو سختی سے مسترد کر دیا۔
• کینیڈا: کینیڈیائی ہائی کمیشن نے اس حملے کی مذمت کی، بچوں سمیت قیمتی جانوں کے ضیاع پر گہرے دکھ کا اظہار کیا اور متاثرہ خاندانوں سے تعزیت کی۔
• چین: چینی سفیر جیانگ ژی ڈونگ نے حملے کی مذمت کی اور پاکستان کی انسداد دہشت گردی کارروائیوں کو آگے بڑھانے کے لیے حمایت کا اظہار کیا۔
• جرمنی پاکستان میں جرمن سفیر الفریڈ گراناس نے حملے کی مذمت کی۔ انھوں نے ٹویٹ کیا: ”ہم معصوم شہریوں، بشمول بچوں کے اس قتل پر صدمے میں ہیں۔“
• بھارت: وزارتِ خارجہ نے حملے کی مذمت کی اور متاثرین سے اظہارِ تعزیت کیا۔ ساتھ ہی پاکستان کی جانب سے حملے میں بھارتی مداخلت کے الزامات کو ”بے بنیاد“ قرار دیتے ہوئے کہا کہ ”دنیا کو دھوکا دینے کی کوئی بھی کوشش ناکامی سے دوچار ہوگی۔“
• ایران: پاکستان میں ایرانی سفیر رضا امیری مقدم نے حملے کی مذمت کی اور متاثرین سے تعزیت کا اظہار کیا۔
• پولینڈ: پاکستان میں پولینڈ کے سفیر میچی پِسارسکی نے اس حملے کی شدید مذمت کرتے ہوئے اسے ناقابلِ فہم اور ناقابلِ معافی قرار دیا۔
• روس: روس: پاکستان میں روسی سفارت خانے کے ترجمان نے اس ”بزدلانہ“ حملے کی شدید مذمت کی اور جاں بحق افراد کے لواحقین سے گہری تعزیت کا اظہار کیا۔
• ترکیہ: ترک وزارت خارجہ نے اپنے ایک باضابطہ بیان میں جانی نقصان اور زخمیوں پر گہرے رنج و غم کا اظہار کرتے ہوئے کہا کہ ”ہم دہشت گرد حملے میں بچوں سمیت قیمتی جانوں کے ضیاع اور متعدد افراد کے زخمی ہونے پر نہایت افسردہ ہیں۔“
• مملکت متحدہ: پاکستان میں برطانوی ہائی کمشنر جین میریٹ نے اس ”ہولناک حملے“ کی شدید مذمت کی۔ انھوں نے بچوں کی جانوں کے ضیاع اور نابالغوں کو نشانہ بنائے جانے پر گہرے رنج و غم کا اظہار کیا۔
• ریاستہائے متحدہ: امریکی ناظم الامور، نیٹلی اے۔ بیکر نے اس دھماکے کی سخت مذمت کرتے ہوئے اسے ”وحشیانہ اور ناقابلِ تصور حملہ“ قرار دیا اور کہا کہ ”معصوم بچوں کا قتل فہم سے باہر ہے۔“ انھوں نے متاثرین کے ساتھ گہری ہمدردی کا اظہار کیا اور کہا کہ ”ہم ان خاندانوں کے ساتھ غمگین ہیں جنھوں نے اپنے پیاروں کو کھویا اور ہماری دعائیں اُن لوگوں کے ساتھ ہیں جو صحتیابی کی طرف گامزن ہیں۔“
• یونیسف: یونیسف جنوبی ایشیا نے بچوں پر ہونے والے حملے کی سخت مذمت کی اور کہا کہ بچوں کو کبھی تشدد کا شکار نہیں ہونا چاہیے۔ ساتھ ہی پاکستان میں بچوں کی سلامتی پر گہری تشویش کا اظہار کیا۔
• اقوام متحدہ: اقوام متحدہ کی سلامتی کونسل نے اس حملے کی سخت مذمت کی، اسے بزدلانہ اور قابل مذمت فعل قرار دیا۔ اس نے متاثرین کے اہل خانہ کے ساتھ ہمدردی کا اظہار کیا، زخمیوں کی جلد صحت یابی کی دعا کی اور زور دیا کہ ذمہ داروں کو انصاف کے کٹہرے میں لایا جائے۔