دیناری عورت (صحابیہ)

دیناری عورت
معلومات شخصیت

دیناری عورت یہ ایک جلیل القدر صحابیہ تھیں جن کا ایک عظیم واقعہ کتبِ سیرت و احادیث میں مذکور ہے، جو ان کے صبر، اللہ کے فیصلے پر ایمان اور رسول اللہ ﷺ سے شدید محبت اور خلوص کا روشن نمونہ ہے۔

دیناری عورت کا واقعہ

صحابی رسول سعد بن ابی وقاصؓ بیان کرتے ہیں: رسول اللہ ﷺ اُحد کے دن ایک عورت کے پاس سے گذرے جو بنو دینار کے قبیلے سے تعلق رکھتی تھیں، ان کے شوہر، بھائی اور والد تینوں رسول اللہ ﷺ کے ساتھ غزوۂ احد میں شہید ہو چکے تھے۔ جب ان کی شہادت کی خبر اس عورت کو سنائی گئی، تو اس نے صرف یہ پوچھا:

”

"رسول اللہ ﷺ کا کیا ہوا؟"

“

لوگوں نے کہا: "اے اُمِ فلاں! رسول اللہ ﷺ خیریت سے ہیں، جیسے تم چاہتی ہو، ویسے ہی ہیں۔" تو وہ بولیں:

”

"مجھے رسول اللہ کو دکھاؤ، میں خود انھیں دیکھنا چاہتی ہوں۔"

“

جب اسے رسول اللہ ﷺ دکھائے گئے اور اس نے آپ کو اپنی آنکھوں سے صحیح سلامت دیکھا، تو بولی:

”

"آپ کے بعد ہر مصیبت میرے لیے معمولی ہے!"

“

• ایک دوسری روایت میں ہے:

ایک عورت بنی دینار کے قبیلے سے اپنے گدھے پر سوار ہو کر آئی۔ لوگ اسے تعزیت دینے لگے۔

کسی نے کہا: "تمھارے بھائی کی شہادت پر صبر کرو"، تو وہ بولیں: "إنا لله وإنا إليه راجعون، لیکن رسول اللہ کا کیا حال ہے؟"

دوسرے نے کہا: "تمھارے شوہر کی شہادت پر صبر کرو"، تو وہ بولیں: "إنا لله وإنا إليه راجعون، لیکن رسول اللہ کا کیا ہوا؟"

تیسرے نے کہا: "تمھارے والد کی شہادت پر صبر کرو"، تو وہ بولیں: "إنا لله وإنا إليه راجعون، لیکن رسول اللہ ﷺ کیسے ہیں؟"

لوگوں نے کہا: "وہ بخیر و عافیت ہیں، زندہ ہیں اور کوئی تکلیف نہیں پہنچی۔"

تو وہ کہنے لگیں: "مجھے دکھاؤ، میں انھیں دیکھنا چاہتی ہوں۔" جب آپ ﷺ کو اپنی آنکھوں سے دیکھا تو کہا:

”

"اب تو آپ کے بعد کوئی مصیبت میرے لیے بڑی نہیں رہی!"

“