دی ٹائمز آف اسرائیل

دی ٹائمز آف اسرائیل

یروشلم میں موجود صدر دفتر (2012ء)
قسم	آن لائن اخبار
بانی	ڈیوڈ ہورویٹز سیٹھ کلارمن
مدیر	سُہیٰ خلیفہ (عربی) اسٹیفنی بیٹن (فرانسیسی) آوی داویدی (فارسی)
مدیرِ اعلیٰ	ڈیوڈ ہورویٹز
رائے ایڈیٹر	میریم ہرشلاگ
سیاسی صف بندی	مرکزیت
زبان	انگریزی، عبرانی، عربی، فرانسیسی، فارسی
صدر دفتر	یروشلم
آئی ایس ایس این	0040-7909
او سی ایل سی نمبر	1076401854
ویب گاہ	timesofisrael.com

دی ٹائمز آف اسرائیل ایک کثیر اللسانی اسرائیلی آن لائن اخبار ہے جو سنہ 2012ء میں لانچ کیا گیا اور تب سے یہ ناظرین کی تعداد کے لحاظ سے انگریزی زبان میں سب سے بڑا یہودی و اسرائیلی خبروں کا ذریعہ بن چکا ہے۔ اس کی بنیاد معروف اسرائیلی صحافی ڈیوڈ ہورویٹز اور امریکی ارب پتی سرمایہ کار سیٹھ کلارمن نے رکھی جن میں پہلا بانی مدیر بھی ہے۔ یہ اخبار یروشلم میں قائم ہے اور اس کا نصب العین ہے: ”اسرائیل، مشرق وسطیٰ اور یہودی دنیا میں ہونے والی پیش رفت کا دستاویزی ریکارڈ“۔

اپنے اصل انگریزی ایڈیشن کے ساتھ ساتھ ٹائمز آف اسرائیل نے دیگر زبانوں میں بھی اشاعت کا آغاز کیا، جن میں عبرانی (اپنے ذاتی ایڈیشن ”زمان یسرائیل“ کے ذریعے)، عربی، فرانسیسی اور فارسی شامل ہیں۔ یہ ویب گاہ خبری رپورٹوں اور تجزیوں کی اشاعت کے ساتھ ساتھ متعدد مصنفین پر مشتمل بلاگ پلیٹ فارم بھی چلاتی ہے۔

فروری 2014ء میں آغاز کے دو برس بعد ٹائمز آف اسرائیل نے دعویٰ کیا کہ اس کے قارئین کی تعداد دو ملین تک پہنچ چکی ہے۔ 2017ء میں یہ تعداد بڑھ کر 35 لاکھ منفرد ماہانہ صارفین تک جا پہنچی جبکہ 2021ء تک اس کی اوسط ماہانہ منفرد قارئین کی تعداد 90 لاکھ ہو چکی تھی اور اس کی ویب گاہ پر ماہانہ 3 کروڑ 50 لاکھ سے زائد صفحہ جات دیکھے جا رہے تھے۔ اخبار کے بلاگ پلیٹ فارم پر 9،000 فعال بلاگر موجود تھے۔