رئیس محمد

رئیس محمد

ذاتی معلومات
پیدائش	25 دسمبر 1932(1932-12-25) جوناگڑھ، ریاست جونا گڑھ، برطانوی راج
وفات	14 فروری 2022(2022-20-14) (عمر  89 سال)
بلے بازی	دائیں ہاتھ کا بلے باز
گیند بازی	دایاں ہاتھ کالیگ بریک، گوگلی گیند باز
حیثیت	بلے باز
تعلقات	وزیر محمد (بھائی) حنیف محمد (بھائی) مشتاق محمد (بھائی) صادق محمد (بھائی) شعیب محمد (بھتیجا) آصف محمد (بیٹا)
ملکی کرکٹ
عرصہ	ٹیمیں
1953/54 – 1961/62	کراچی کی کرکٹ ٹیموں کی فہرست
1959/60	پشاور کرکٹ ٹیم
کیریئر اعداد و شمار
مقابلہ فرسٹ کلاس میچ 30 رنز بنائے 1,344 بیٹنگ اوسط 32.78 100s/50s 2/8 ٹاپ اسکور 118* گیندیں کرائیں 1,032 وکٹ 33 بالنگ اوسط 31.27 اننگز میں 5 وکٹ – میچ میں 10 وکٹ – بہترین بولنگ 4/82 کیچ/سٹمپ 21/–
ماخذ: ESPNcricinfo، 14 مارچ 2013

رئیس محمد(پیدائش: 25 دسمبر 1932ء جونا گڑھ اسٹیٹ تب انڈیا) | (وفات: 14 فروری 2022ء) جنہوں نے 1948ء سے 1963ء تک 30 فرسٹ کلاس میچ کھیلے۔ ایک دائیں ہاتھ کے بلے باز اور ایک لیگ اسپنر بھی تھے جنہوں نے دو سنچریوں کی مدد سے 1,344 رنز بنائے اور 33 وکٹیں حاصل کیں۔ان کا تعلق کرکٹ کی محمدن فیملی سے تھا اس خاندان میں ان کے دیگر بھائیوں حنیف محمد' وزیر محمد' مشتاق محمد اور صادق محمد نے بھی کرکٹ کھیلی۔رئیس محمد کے علاوہ باقی تینوں بھائی وزیر محمد (20ٹیسٹ)' مشتاق محمد (57 ٹیسٹ) اورصادق محمد (41 ٹیسٹ ) میں پاکستان کی نمائندگی کااعزاز رکھتے ہیں جبکہ ان کی والدہ امیر بی متحدہ ہندوستان کی بیڈمنٹن چمپئن رہ چکی ہیں سابق ٹیسٹ کرکٹر شعیب محمد ان کے بھتیجے ہیں۔ اور ان کے دو بیٹے آصف محمد اور شاہد محمد نے بھی فرسٹ کلاس کرکٹ میں حصہ لیا

ذاتی زندگی

رئیس محمد کا تعلق ایک بڑے اور مشہور پاکستانی کرکٹ خاندان سے تھا۔ ان کے بھائی وزیر محمد، حنیف محمد، مشتاق محمد اور صادق محمد نے پاکستان کے لیے ٹیسٹ کرکٹ کھیلی۔ ان کے بھتیجے شعیب محمد نے ایک روزہ بین الاقوامی کرکٹ کھیلنے کے ساتھ ساتھ ٹیسٹ کی سطح پر بھی پاکستان کی نمائندگی کی۔ ان کے بیٹے آصف محمد نے فرسٹ کلاس اور لسٹ اے کرکٹ کھیلی لیکن وہ واحد بھائی تھے جنہیں ٹیسٹ کرکٹ کھیلنے کا موقع نہ مل سکا

کتنے بھائی کھیلیں گے؟

اپنے ایک انٹرویو میں رئیس محمد نے بتایا تھا کہ ’جب پاکستانی ٹیم پہلی بار ٹیسٹ سیریز کھیلنے انڈیا جا رہی تھی تو میں نے باغ جناح میں کھیلے گئے ٹرائل میچ میں 93 رنز بنانے کے علاوہ ان چار بلے بازوں کو بھی آؤٹ کیا جو پاکستانی ٹیم میں سلیکٹ ہوئے تھے

’لیکن مجھ پر امیر الہی کو ترجیح دی گئی اور کہا گیا کہ ان کا تجربہ مجھ سے زیادہ ہے۔ ٹیم کی انڈیا روانگی کے موقع پر کپتان عبدالحفیظ کاردار نے اعتراف کیا تھا کہ انہیں افسوس ہے کہ وہ رئیس محمد کو ٹیم میں شامل نہیں کرا سکے۔‘

جب ٹیم 1954ء میں انگلینڈ جارہی تھی تو بہاولپور میں ایک مہینے کا کیمپ لگا۔ اس وقت ٹیم کو حنیف محمد کے اوپننگ پارٹنر کی تلاش تھی کیونکہ نذر محمد بازو ٹوٹ جانے کے سبب کرکٹ سے باہر ہوچکے تھے

وہ بتاتے ہیں کہ ’لیکن مجھے اس کیمپ میں نئی گیند کی شکل تک نہیں دکھائی گئی حالانکہ میں نے دو میچوں میں اوپنر کی حیثیت سے اچھی بیٹنگ کی تھی۔ حیرت کی بات یہ ہے کہ میں 46 رنز بنا چکا تھا کہ مجھے بیٹنگ سے واپس بلا لیا گیا۔‘ ان کا دعویٰ تھا کہ ’انھیں ڈر تھا کہ اگر میں بڑی اننگز کھیل گیا تو مجھے سلیکٹ کرنا پڑے گا۔ اس دور میں پاکستانی کرکٹ میں بہت زیادہ سیاست تھی۔‘

رئیس محمد نے اپنے انٹرویو میں ٹیسٹ کرکٹ نہ کھیلنے کے بارے میں پاکستان کرکٹ بورڈ کے ایک سابق سیکریٹری کا بھی حوالہ دیا تھا جو بقول ان کے نہیں چاہتے تھے کہ ایک ہی وقت میں تین بھائی ٹیم میں کھیلیں۔

ان کا کہنا تھا ’اس زمانے میں چیمہ صاحب کرکٹ بورڈ کے سیکریٹری ہوا کرتے تھے۔ جب بھی میرے ٹیسٹ کھیلنے کی بات آتی تو وہ کہتے تھے کہ کتنے بھائی ایک ساتھ ٹیم میں کھیلیں گے؟ لوگ اعتراض کریں گے کہ یہ بھائیوں کی ٹیم ہے حالانکہ اس زمانے میں ہم تمام بھائیوں کی کارکردگی بہت ہی اچھی رہتی تھی‘

ایک ہی اننگز میں تین بھائیوں کی سنچریاں

1954ء میں قائد اعظم ٹرافی کا فائنل اس اعتبار سے محمد برادرز کے لیے یادگار تھا کہ اس میں کراچی کی طرف سے کھیلتے ہوئے سروسز کے خلاف ایک ہی اننگز میں تین بھائیوں وزیر محمد، رئیس محمد اور حنیف محمد نے سنچریاں بنائی تھیں۔ رئیس محمد نے اسی میچ میں اپنے کیریئر کی بہترین بولنگ کرتے ہوئے 82 رنز دے کر چار وکٹیں بھی حاصل کی تھیں۔ کرکٹ کی تاریخ میں یہ اب تک واحد موقع ہے کہ کسی فرسٹ کلاس میچ کی ایک ہی اننگز میں تین بھائیوں نے سنچریاں سکور کیں

ٹیسٹ کیپ کے بجائے بارہواں کھلاڑی

رئیس محمد وہ لمحہ کبھی نہیں بھولے جب انہیں ٹیسٹ کھیلنے کی خوشخبری سنائی گئی لیکن پھر بارہواں کھلاڑی بنا دیا گیا۔ اپنے انٹرویو میں انہوں نے بتایا تھا کہ ’1955ء میں انڈیا کے خلاف ڈھاکہ ٹیسٹ سے ایک رات قبل کپتان عبدالحفیظ کاردار نے میرے کمرے میں آکر کہا کہ آپ جلدی سو جائیں کیونکہ صبح آپ نے ٹیسٹ میچ کھیلنا ہے لیکن میچ کی صبح میری جگہ مقصود احمد کو ٹیم میں شامل کر لیا گیا جنہیں اچانک لاہور سے ڈھاکہ بلوایا گیا تھا اور پھر مجھے بارہواں کھلاڑی بنا دیا گیا۔ اسی سیریز کے بہاولپور ٹیسٹ میں بھی میں بارہواں کھلاڑی تھا جس کے بعد میں کبھی ٹیسٹ کرکٹ نہ کھیل سکا۔‘

بیٹوں کے ٹیسٹ نہ کھیلنے کا دکھ

رئیس محمد کے دو بیٹے شاہد محمد اور آصف محمد فرسٹ کلاس کرکٹ کھیلے ہیں لیکن انہیں دونوں بیٹوں کے ٹیسٹ نہ کھیلنے کا بہت دکھ رہا جس کا انہوں نے برملا اظہار یوں کیا تھا۔

’میں تو ٹیسٹ نہ کھیل سکا لیکن زیادہ دکھ اس بات کا رہا کہ دونوں بیٹوں میں سے کوئی ایک بھی ٹیسٹ کھیلنے میں کامیاب نہ ہوسکا حالانکہ جب حنیف بھائی (حنیف محمد) چیف سلیکٹر تھے تو اس وقت میرے بیٹے آصف محمد کی کارکردگی بہت اچھی تھی اور اس وقت سب یہی کہہ رہے تھے کہ آصف محمد اچھا کرکٹر ہے لیکن قسمت شعیب محمد پر مہربان رہی۔ میں تو نہ کھیل سکا لیکن اگر میرا کوئی بیٹا بھی ٹیسٹ کھیل لیتا تو مجھے تسکین ہوجاتی۔‘

مصوری اور کیرم کے شوقین

رئیس محمد کلاسیکی موسیقی کے دلدادہ تھے۔ انہیں غلام علی، فریدہ خانم اور اقبال بانو کی غزلیں پسند تھیں۔ وہ مصوری بھی کیا کرتے تھے اور کیرم کھیلنے کے بہت شوقین تھے۔ ہر ہفتے وہ حنیف محمد کے گھر باقاعدگی سے جایا کرتے تھے جہاں بھائیوں کے درمیان میں کیرم کے دلچسپ مقابلے ہوا کرتے تھے۔

کیرئیر

رئیس نے کراچی اور سندھ کے لیے اپنے فرسٹ کلاس کیریئر کا آغاز دسمبر 1949ء میں کامن ویلتھ الیون کے خلاف کراچی جم خانہ گراؤنڈ میں کیا۔ انہوں نے اپنا اگلا میچ مارچ 1953ء میں دی ریسٹ کے خلاف کھیلا جس میں انہوں نے 8 اور 66 رنز بنائے۔ اگلے دو سیزن میں رئیس نے آٹھ میچوں میں مجموعی طور پر 603 رنز بنائے جس میں سندھ کے خلاف ان کے کیریئر کے بہترین 118 ناٹ آؤٹ تھے۔ انہوں نے 1954-55ء کے سیزن میں 15 وکٹیں بھی حاصل کیں۔ 1954-55ء قائد اعظم ٹرافی کے فائنل میچ میں، انہوں نے کمبائنڈ سروسز کے خلاف اپنی دوسری سنچری، ناٹ آؤٹ 110 رنز بنائے۔ انہوں نے میچ میں اپنی بہترین باؤلنگ کا مظاہرہ کرتے ہوئے 82 کے عوض 4 وکٹیں بھی حاصل کیں۔ 1955 سے 1958 تک انہوں نے 9 میچ کھیلے، 25 سے کم اوسط کے ساتھ 341 رنز بنائے اور 10 کیچز لیے۔ رئیس کے اگلے تین سیزن-1959-60، 1960–61 اور 1961-62ء کے دوران میں اس نے بالترتیب 68، 12 اور 117 رنز بنا کر دو، ایک اور تین میچ کھیلے۔ 1961-62ء قائداعظم ٹرافی کے سیمی فائنل میں کراچی بلیوز کے خلاف ان کا سب سے زیادہ اسکور 73 رہا۔اس نے آخری بار 1962-63ء پاکستانی ڈومیسٹک سیزن میں کھیلا تھا۔ اس نے پانچ میچ کھیلے، 27 سے اوپر کی اوسط سے ایک نصف سنچری سمیت 192 رنز بنائے۔ رئیس نے مجموعی طور پر 30 فرسٹ کلاس میچ کھیلے اور 32.78 کی اوسط سے 1,344 رنز بنائے جس میں دو سنچریاں اور آٹھ نصف سنچریاں شامل ہیں۔ انہوں نے 33 وکٹیں اور 21 کیچ بھی لیے۔

وفات

14 فروری 2022ء کو ناانصافی کا شکار یہ عمر رسیدہ کھلاڑی کراچی شہر میں اپنے خاندان اور کرکٹ سے محبت کرنے والوں کو 89 سال اور 52 دن کی عمر میں سوگوار چھوڑ گیا۔