رمی جمار

رمی جمار یا رمی حج سے متعلقہ ایک اسلامی اصطلاح ہے۔ مسلمان دوران حج تین علامتی شیطانوں کو کنکر مارتے ہیں۔ یہ حج کا ایک رکن ہے۔ دس، گیارہ اور بارہ ذوالحجہ کو یہ عمل کیا جاتا ہے، اس میں ہر حاجی پر لازم ہے کہ تین شیطانوں کو سات سات کنکر ترتیب وار مارے۔ یہ عمل اسلام میں نبی ابراہیم علیہ السلام کی سنت کے طور پر جاری ہے۔ بعض حالات میں تیرہ ذوالحجہ کو بھی پتھر مارنے ضروری ہو جاتے ہیں۔

فقہی احکام

حج میں رمی کرنا واجب ہے اور رمی کا وقت 10، 11 اور 12 ذو الحجہ ہے۔

10 ذو الحجہ کو مزدلفہ سے منی واپس آنے کے بعد پہلے اور دوسرے شیطان کو چھوڑ کر سیدھا تیسرے شیطان کے پاس جاکر اسے الگ الگ سات کنکریاں ماری جائیں۔ 10 ذو الحجہ کو رمی کا مسنون وقت سورج طلوع ہونے سے شروع ہو کر زوال تک ہے۔ پھر زوال سے مغرب تک بلا کراہت مباح وقت ہے اور مغرب سے صبح صادق سے پہلے تک مکروہ وقت ہے۔

11 اور 12 ذو الحجہ کو تینوں شیطانوں کو ترتیب سے الگ الگ سات کنکریاں ماری جائیں۔ ان دو دنوں میں رمی کرنے کا مسنون وقت زوال آفتاب سے غروب آفتاب تک ہے اور غروب آفتاب سے صبح صادق تک مکروہ وقت ہے، اگر بلاعذر اگلے دن تک مؤخر کیا تو دم واجب ہوگا۔ (ماخوذ از حج کا انسائیکلوپیڈیا، ج2)

نیز رمی کا تاریخی پس منظر یہ ہے کہ جب حضرت ابراہیم علیہ السلام حضرت اسماعیل علیہ السلام کو اللہ کا حکم پورا کرنے کے لیے ذبح کرنے لے جا رہے تھے تو اس وقت جہاں جمرہ عقبہ ہے، وہاں شیطان حضرت ابراہیم علیہ السلام کے پاس آیا اور حضرت ابراہیم علیہ السلام نے اسے سات کنکریاں ماریں یہاں تک کہ وہ زمین میں دھنس گیا، پھر شیطان حضرت ابراہیم علیہ السلام کے پاس آیا جہاں اب دوسرا جمرہ ہے اور حضرت ابراہیم علیہ السلام نے اسے سات کنکریاں ماریں یہاں تک کہ وہ زمین میں دھنس گیا، پھر شیطان حضرت ابراہیم علیہ السلام کے پاس آیا جہاں اب تیسرا جمرہ ہے اور حضرت ابراہیم علیہ السلام نے اسے سات کنکریاں ماری یہاں تک کہ وہ زمین میں دھنس گیا۔ اسی کی یاد اور سنتِ ابراہیمی کی تعمیل میں یہ رمی کی جاتی ہے، جس سے شیطان مزید رسوا ہوتاہے۔

المستدرك على الصحيحين للحاكم (1 / 638):

"عن ابن عباس، رفعه قال: «لما أتى إبراهيم خليل الله المناسك عرض له الشيطان عند جمرة العقبة، فرماه بسبع حصيات حتى ساخ في الأرض، ثم عرض له عند الجمرة الثانية فرماه بسبع حصيات حتى ساخ في الأرض، ثم عرض له عند الجمرة الثالثة فرماه بسبع حصيات حتى ساخ في الأرض»". فقط واللہ اعلم

بیرونی روابط

رمی کا طریقہ اور احتیاطیں آرکائیو شدہ (Date missing) بذریعہ websites.dawateislami.net (Error: unknown archive URL)

مزید دیکھیے

حوالہ جات