سید احمد شاہ سری کوٹی

مولانا سید احمد شاہ سری کوٹی رحمۃ اللہ علیہ خیبر پختونخواہ کی مشہور اور بزرگ شخصیت ہیں۔

نام ونسب

مولانا سید احمد۔لقب:عمدۃ العلماء،زبدۃ الاصفیاء۔موضع’’سری کوٹ‘‘علاقہ کی نسبت سے’’سری کوٹی‘‘کہلاتےہیں۔

سلسلۂ نسب

سید احمد شاہ بن سیدصدرالدین شاہ رحمۃ اللہ علیہما۔آپ خاندان ِ ساداتِ کےچشم وچراغ تھے۔آپ کاعلاقہ موضع سری کوٹ ہریپور ہزارہ سےپینتیس کلومیٹرمغرب کی جانب واقع ہے،آپ کی جائے ولادت ومدفن بھی یہی ہے ۔

تحصیلِ علم

ابتدا ء میں تجوید کےساتھ قرآ ن کریم حفظ کیا،بعد ازاں اپنےعلاقےکےجیدفضلاءسےتحصیل علم کیا،اوردارالعلوم دیوبندجاکردرس حدیث لیا۔مولوی محمودالحسن دیوبندی کےاول تلامذہ میں سےتھے،وہ ان پر فخر کیاکرتےتھے۔مگر وہاں سےجلدہی واپس ہوئے،دیوبند کےغلط ماحول کاآپ نےمشاہدہ کرلیاتھا۔اس لئے دیوبندیوں سےسخت بےزارہوگئے تھے،اور اپنی مجلس میں ان کاشدیدرد فرماتےتھے۔آپ اپنے وقت کےجیدعالم اور شیخ طریقت تھے۔

بیعت وخلافت

آپ غوث زماں خواجہ عبدالرحمن چھوہروی رحمۃ اللہ علیہ(بانیِ دارالعلوم اسلامیہ رحمانیہ،ومصنف مجموعہ صلوٰۃ الرسول)کےدستِ حق پرست پرسلسلہ عالیہ قادریہ میں بیعت ہوئے۔کچھ عرصہ بعد خلافت واجازت سےمشرف ہوئے۔

سیرت وخصائص

جامع علوم عقلیہ ونقلیہ،عارف اسرار ربانیہ،قدوۃ العلماء،زبدۃ الاصفیاء،حامیِ دینِ سیدالانبیاء سید احمدسریکوٹی رحمۃ اللہ علیہ اپنےوقت کےاجل عالم اور نہایت متقی اور پرہیز گارصوفی تھے،علم و فضل کے با وجود اپنے شیخ طریقت غوث زماں خواجہ عبد الرحمن چھو ہروی رحمۃ اللہ علیہ سےبے پناہ عقیدت رکھتے تھے۔ اسی لئے آپ اپنے مرشد کامل کی خد مت میں کوئی دقیقہ فرو گزاشت نہ کرتے تھے۔تکمیلِ علوم کےبعدایک عرصہ تک افریقہ کے شہر کیپ ٹاؤ ن،زنجبار،اورممباسہ میں عرصہ ٔ دراز تک تبلیغ اسلام کا فریضہ انجام دیتے رہے۔ 1339ھ/1920ءمیں پھر تبلیغ دین کے لئے رنگون( موجودہ نام یانگوں،برماکاسب سےبڑاشہر،اور سابق دارالخلافہ)تشریف لے گئے اور مرکزی مسجد،مسجد نا خدا میں امام وخطیب مقررہوئے۔آپ کی شخصیت اس قدر پر کشش تھی کہ وہاں کے لوگ جوق درجوق آپ کی خدمت میں حاضر ہوکرراہِ ہدایت سیکھنےلگے۔آپ کی تبلیغ وتلقین کایہ اثرہواکہ شراب وکباب کےرسیا،نہ صرف فسق و فجورسےتائب ہو گئےبلکہ نمازی اورتہجدگزاربن گئے۔آپ کو اپنے شیخ سے بڑی عقیدت تھی چنانچہ آپ اکثر و بیشتر محبت بھرے الفاظ میں مرشد ِکامل کا تذکرہ فرماتےرہتے،اس کااثریہ ہواکہ بہت سے لوگوں نےدرخواست کی کہ آپ خواجہ چھوہروی رحمۃ اللہ علیہ کو دعوت دیں تاکہ ہم ان کی زیارت مشرف ہوں اور حلقۂ ارادت میں داخل ہونے کی سعادت حاصل کریں ۔آپ نے یہ صورت حال خواجہ چھوہروی رحمۃ اللہ علیہ کی خدمت میں لکھ بھیجی۔انہوں نے جو اباً اپنا ایک رو مال بھجوادیااورفرمایاجوشخص سحری کےوقت باوضو ہوکراس پر ہاتھ رکھےگاوہ میرامریدبن جائےگا۔اس طرح بے شمار افراد حلقۂ ارادت میں داخل ہوئے،تین سال بعد آپ نےاجازت و خلافت سے مشرف فرمایا۔

1344ھ/1925ء میں آپ نے چٹا گانگ میں انجمن شوریٰ قائم کی اور جامعہ احمدیہ سنیّہ کی بنیاد رکھی۔جامعہ کی سہ منزلہ حسین و جمیل عمارت میں سینکڑوں طلباء کیلئے رہائش کا انتظام کیاجہاں جدیدنصاب کےمطابق علومِ دینیہ کی تعلیم دی جاتی تھی۔بعدازاں آپ کےفرزندارجمند مولاناصاحبزادہ سیدمحمدطیب شاہ رحمۃ اللہ علیہ کی سرپرستی میں جامعہ طیبہ ڈھاکہ کی تعمیر بڑی تیزی سے جاری تھی کہ مشرقی پاکستان ہم سے جداہوگیااوربنگلہ دیش کےنام سےایک علیحدہ ملک بن گیا۔مولانا سیداحمد شاہ رحمۃ اللہ علیہ چٹاگانگ میں مدرسہ قائم کرنےکےباوجوداپنےشیخ و مرشد کےقائم کردہ دارالعلوم اسلامیہ رحمانیہ ہری پور میں دلچسپی لیتےرہے۔چنانچہ دار العلوم کی موجودہ بلند و بالا عمار ت میں آپ کا بہت بڑا حصہ ہے۔اسی طرح پیرومرشدکی کتاب’’مجموعہ صلوٰ ۃ الرسول‘‘کثیر رقم خرچ کرکےاسےپہلی بارچھپوایا۔ورنہ نہیں معلوم یہ کتاب بھی دیگراکابرین کےمخطوطات کی طرح ناپید ہوجاتی۔آپ نےتقریباًسولہ سال تک مشرقی پاکستان میں قیام کیا۔اس عرصےمیں بلا مبالغہ لاکھوں افراد حلقۂ ارادت میں داخل ہوئے۔آپ کےمریدین کا امتیازی نشان مسلک اہل سنت پر ثابت قدمی،پاکستان سےسچی محبت اور دین ِمتین کے ساتھ گہرا لگاؤتھا۔

آپ نےتمام عمر ذکر الہی،عبادات،تبلیغ اسلام،اقامتِ دین،خدمتِ خلق اور اشاعت سلسلہ عالیہ قادریہ میں گزاری۔تقریباً سوبرس عمر پائی مگر وفات تک ایک لمحہ بھی غفلت وسستی میں نہیں گزرا۔آپ ہمت،استقلال،صبراور شکرکےپیکرتھے۔آپ سےسینکڑوں کرامات کاظہور ہوا۔مگرآپ استقامت فی الدین کوکرامت پر ترجیح دیتےتھے۔آپ کےدوفرزندہوئے۔بڑےفرزندحافظ سیدمحمد طیب شاہ رحمۃ اللہ علیہ ،شریعت وطریقت میں بلندمقام رکھتےتھے۔والدکےحقیقی جانشین اور ملت اسلامیہ کےنقیب تھے۔

خلفاء

1۔ قطبِ دوراں ،حضرت خواجہ سید محمد شاہ ترمذی قادری رحمۃ اللہ علیہ بن خواجہ سید امان علی شاہ ترمذی قادری رحمۃ اللہ علیہ(خلیفہِ غوثِ زماں، خواجہ عبدالرحمن چھوہروی قادری رحمۃ اللہ علیہ)، سید آباد، گنجیاں شریف، ہری پور۔

2۔ عمدۃ الاصفیاء، حضرت خواجہ سید محمد طیب شاہ رحمۃ اللہ علیہ بن خواجہ سید احمد شاہ سریکوٹی رحمۃ اللہ علیہ، شتالو شریف، سریکوٹ۔

وصال

آپ کاوصال بروزجمعرات،11/ذیقعدہ1380ھ،مطابق 27/اپریل1961ء کوہوا۔آپ کی آخری آرام گاہ ہری پورشہرسے مغرب کی جانب اٹھارہ میل کےفاصلےپر’’شتالو شریف،سری کوٹ‘‘میں ہے۔