چندارلی زادہ علی پاشا

چندارلی زادہ علی پاشا
تفصیل= ازنیق، بورصہ میں واقع چندارلی علی پاشا اور اُن کے والد چندارلی کارا خلیل خیر الدین پاشا کی قبریں۔ تصویر ہذا میں چندارلی علی پاشا کی قبر بائیں جانب ہے۔
وزیراعظم سلطنت عثمانیہ
مدت منصب 22 جنوری 1387ء – 18 دسمبر 1406ء
حکمران	سلطان مراد اول، سلطان بایزید اول، سلیمان چلبی
چندارلی کارا خلیل خیر الدین پاشا امام زادہ خلیل پاشا
معلومات شخصیت
پیدائش	سلطنت عثمانیہ
وفات	27 دسمبر 1406ء   سلطنت عثمانیہ
شہریت	سلطنت عثمانیہ
مذہب	سنی اسلام
والد	چندارلی کارا خلیل خیر الدین پاشا
بہن/بھائی	چندارلی ابراہیم پاشا کبیر
خاندان	چندارلی خاندان
عملی زندگی
پیشہ	سیاست دان

چندارلی علی پاشا (وفات: 18 دسمبر 1406ء) چھٹے وزیراعظم سلطنت عثمانیہ تھے۔ چندارلی کا تعلق چندارلی خاندان سے تھا جو سلطنت عثمانیہ کے ابتدائی زمانہ میں با اثر ترین خاندان تھا۔ چندارلی علی پاشا 1387ء سے 1406ء تک طویل عرصہ یعنی 19 سال تک وزیر اعظم سلطنت عثمانیہ رہے۔ علی پاشا سلطان نے 2 سال سلطان مراد اول، 13 سال سلطان بایزید اول اور 4 سال سلیمان چلبی کے ادوارِ حکومت میں بحیثیت وزیر اعظم سلطنت عثمانیہ وزارت کی۔ علی پاشا نے 1402ء میں عثمانی زمانہ تعطل کا زمانہ بھی دیکھا، وہ عثمانی زمانہ تعطل (1402ء– 1413ء) کے پہلے وزیر اعظم تھے۔

سوانح

چندارلی علی پاشا چندارلی خاندان سے تعلق رکھتے تھے۔ 22 جنوری 1387ء کو سلطان مراد اول نے علی پاشا کو اُن کے والد چندارلی کارا خلیل خیر الدین پاشا کی وفات کے بعد وزیر اعظم مقرر کیا اور اِس عہدہ پر علی پاشا اپنی وفات تک یعنی 18 دسمبر 1406ء تک فائز رہے۔ علی پاشا چندارلی ابراہیم پاشا کبیر کے بھائی تھے جو مستقبل میں وزیراعظم سلطنت عثمانیہ بنے۔ 1388ء میں فتح بلغاریہ اور دبروجہ کی مہمات میں علی پاشا عثمانی فوج کے سربراہ تھے۔ 1389ء میں سلطان بایزید اول نے پاشا کا خطاب دیا۔

1396ء میں علی پاشا جنگ نکوپولس میں روم ایلی سپاہی دستوں کے بھی سربراہ تھے۔ 1402ء میں عثمانی زمانہ تعطل کا آغاز ہوا تو علی پاشا بورصہ چلے گئے جہاں وہ سلیمان چلبی کے دربار سے وابستہ ہو گئے اور بحیثیت وزیراعظم سلطنت عثمانیہ اپنے فرائض سر انجام دیتے رہے۔ چار سال بعد بورصہ میں 18 دسمبر 1406ء کو علی پاشا نے وفات پائی اور ازنیق، بورصہ میں اپنے والد چندارلی کارا خلیل خیر الدین پاشا کے پہلو میں دفن کیے گئے۔ مؤرخین علی پاشا کو عثمانی وزرائے اعظم میں بہترین کردار اور اخلاق کی حامل شخصیت گردانتے ہیں۔

وجہ شہرت

علی پاشا کی وجہ شہرت اُن کی تعمیر کردہ سبز مسجد (ازنیق) ہے جو بورصہ میں واقع ہے، مسجد کی تعمیر 1378ء میں شروع ہوئی اور 1392ء میں تکمیل کو پہنچی۔ علی پاشا بورصہ کے شہری نہیں تھے مگر بورصہ کے مقامی لوگوں کی حمایت کی خاطر وہ بورصہ میں تعمیرات میں مشغول رہے۔ علاوہ ازیں شہر سیرس اور شہر گلیبولو ان کی فتوحات ہیں جن سے وہ عثمانی دائرہ اقتدار میں شامل ہو گئے۔

حوالہ جات

سیاسی عہدے
ماقبل  چندارلی کارا خلیل خیر الدین پاشا	وزیراعظم سلطنت عثمانیہ 22 جنوری 1387ء– 18 دسمبر 1406ء	مابعد  امام زادہ خلیل پاشا