صوبہ دہلی

صوبۂ دار الخلافہ دہلی صوبۂ شاہ جہاں آباد
1580ء–1857ء
مغلیہ سلطنت کے صوبہ شاہجہاں آباد کا مزین نقشہ جو تقریباً سنہ 1770ء میں ژاں باتِست ژوزِف زآں‌تی Jean Baptiste) Joseph Gentil) کے حکم پر تیار کیا گیا۔
دار الحکومت	دہلی (دار الخلافہ)
حکومت	ذیلی تقسیم
صوبہ دار
تاریخی دور	ابتدائی جدید دور
• Established	1580ء
• محاصرہ دہلی	21 ستمبر 1857ء
رقبہ
• 1601	66,797 مربع میل (173,000 کلومیٹر2)
ماقبل مابعد مغلیہ سلطنت درانی سلطنت سکھ جتھہ بندی
موجودہ حصہ	بھارت

صوبۂ دہلی یا صوبۂ دار الخلافہ شاہ جہاں آباد مغلیہ سلطنت کا صوبہ ہوا کرتا تھا۔ مغلیہ عہد میں خطۂ پنجاب تین صوبوں میں بٹا ہوا تھا: صوبہ لاہور، صوبہ ملتان اور صوبہ دہلی کے حصے۔

دہلی مغلوں کے لیے ہمیشہ ایک اہم مقام رہی جہاں انھوں نے محلات اور قلعے تعمیر کیے۔ سب سے بڑھ کر پادشاہ شاہ جہاں نے اپنے مشہور معمارِ اعلیٰ استاد احمد لاہوری کو 1638ء سے 1649ء کے درمیان ایک فصیل بند شہر تعمیر کرنے کا حکم دیا، جس میں لال قلعہ اور چاندنی چوک شامل تھے۔ دہلی مغلیہ سلطنت کے ابتدائی بارہ صوبوں میں سے ایک تھا جسے 1648ء میں شاہ جہاں آباد کا نام دیا گیا۔ اس کے ہمسایہ صوبے اودھ، آگرہ، اجمیر، ملتان اور لاہور تھے۔

دریا گنج دہلی کا ابتدائی چھاؤنی علاقہ تھا جہاں 1803ء کے بعد دہلی فوجی چھاؤنی (اُردُو) کی ایک مقامی رجمنٹ تعینات کی گئی، جو بعد میں رِج کے علاقے میں منتقل کر دی گئی۔ دریا گنج کے مشرق میں شہر کی فصیل کا راج گھاٹ دروازہ تھا جو دریائے جمن کے کنارے راج گھاٹ پر کھلتا تھا۔ پرانی دہلی کی پہلی تھوک منڈی 1840ء میں چاوڑی بازار میں ہارڈ ویئر مارکیٹ کے طور پر قائم ہوئی۔ اس کے بعد 1850ء میں خشک میوہ جات، مسالوں اور جڑی بوٹیوں کی تھوک منڈی کھاری باؤلی میں قائم ہوئی۔ دریا گنج کی ”پھول منڈی“ 1869ء میں وجود میں آئی اور آج بھی اگرچہ یہ جغرافیائی طور پر ایک چھوٹے علاقے کو محیط ہے مگر آبادی کے گنجان ہونے کی وجہ سے اس کی اہمیت برقرار ہے۔

تاریخ

ہندوستان کے اوائلِ جدید دور کی پہچان سولھویں صدی سے اٹھارھویں صدی عیسوی تک مغلیہ سلطنت کے عروج سے ہوتی ہے۔ دہلی سلطنت کا تختہ الٹنے کے بعد مغل ابتدا میں آگرہ، سیکری اور لاہور سے حکومت کرتے رہے مگر شاہ جہاں کے دور 1648ء میں دہلی دوبارہ دار السلطنت بنی اور سلطنت کے انجام تک دار الخلافہ رہی۔ اس عرصے میں دہلی ادب و ثقافت کا مرکز بن چکی تھی۔ غالبؔ، دردؔ، داغؔ اور ذوقؔ جیسے شاعر یہیں رہے اور شاہی سرپرستی حاصل کرتے رہے۔ مغلوں نے دہلی میں کئی اہم عمارتیں بنوائیں جن میں ہمایوں کا مقبرہ، لال قلعہ اور جامع مسجد شامل ہیں۔

بابر اور ہمایوں (1526ء تا 1556ء)

پہلے مغل بادشاہ بابر (1526ء–1530ء) اور ہمایوں (1530ء–1540ء، دوبارہ 1556ء–1557ء) سلاطینِ دہلی کی طرح آگرہ سے حکومت کرتے تھے۔ سولھویں صدی عیسوی کے وسط میں مغل اقتدار میں خلل پیدا ہوا۔ شیر شاہ سوری نے ہمایوں کو شکست دے کر انھیں فارس بھاگنے پر مجبور کر دیا۔ شیر شاہ نے دہلی کا چھٹا شہر تعمیر کروایا اور وہ قلعہ بنوایا جو آج پرانا قلعہ کہلاتا ہے، اگرچہ اس علاقے میں اس سے پہلے بھی بستی موجود تھی۔ 1545ء میں شیر شاہ کی موت کے بعد ان کے فرزند اسلام شاہ دہلی سے شمالی ہندوستان پر حکومت کرتے رہے۔ پھر کچھ عرصے کے لیے ہمایوں نے کھوئی ہوئی شان دوبارہ پا لی؛ اسی اثنا میں 1553ء میں عادل شاہ سوری کے وزیر اعظم ہندو سپہ سالار اور وزیر ہیمو بقال نے سر اٹھایا۔

ہیمو نے بغاوتوں اور مغل افواج کے خلاف مجموعی طور پر 22 جنگیں جیتیں، جن میں آگرہ اور دہلی میں اکبر کی فوج کے خلاف دونوں فتوحات شامل تھیں۔ 7 اکتوبر 1556ء کو تغلق آباد کے قریب مغل فوج کو شکست دینے کے بعد انھوں نے دہلی کا تخت سنبھالا اور قدیم ہندوستانی لقب ”وکرم آدتیہ“ اختیار کیا۔ تاہم دوسرے معرکۂ پانی پت میں بیرم خاں کی قیادت میں مغل افواج سے شکست کھا گئے، جس کے بعد خطے میں مغل اقتدار دوبارہ بحال ہوا۔

اکبر سے اورنگ زیب تک (1556ء تا 1707ء)

تیسرے اور سب سے نمایاں مغل بادشاہ اکبر (1556ء–1605ء) نے آگرہ سے حکومت جاری رکھی جس سے دہلی کی سیاسی ساکھ کمزور پڑتی گئی۔

وسط سترھویں صدی عیسوی میں پادشاہ شاہ جہاں (1628ء–1658ء) نے دہلی کا ساتواں تاریخی شہر شاہ جہاں آباد تعمیر کروایا جو آج ’پرانی دہلی‘ کے نام سے جانا جاتا ہے۔ لال قلعہ اور جامع مسجد اسی دور کی یادگاریں ہیں۔ 1638ء میں انھوں نے دار الخلافہ آگرہ سے دہلی منتقل کر دیا اور پھر دہلی ہی مغل اقتدار کا مرکز رہی۔

اورنگ زیب (1658ء–1707ء) نے 1658ء میں دہلی کے شالیمار باغ میں اپنی تاج پوشی کی تقریب منعقد کی اور اس سے اگلے سال دوبارہ اسی مقام پر تاج پوشی ہوئی۔

1680ء کے بعد مغل طاقت تیزی سے کمزور ہونے لگی جبکہ ہندو مرہٹہ سلطنت مضبوط ہو رہی تھی۔

مغلوں کا زوال

مرہٹوں، جاٹوں، افغانوں اور سکھوں کی یلغار نے مغل اقتدار کی ساکھ کو شدید نقصان پہنچایا۔ 1737ء میں باجی راؤ اول ایک بڑی فوج کے ساتھ دہلی آئے اور دہلی کی پہلی لڑائی میں مغلوں کو شکست دی، جس کے بعد مرہٹوں نے شہر کو خوب لوٹا۔ 1739ء میں نادر شاہ نے ایران سے حملہ کیا۔ کرنال کی بڑی جنگ صرف چند گھنٹوں میں جیت کر وہ دہلی میں داخل ہوئے اور دو دن تک قتل عام جاری رہا جس میں تیس ہزار سے زیادہ شہری مارے گئے۔ انھوں نے شہر اور شاہی خزانے کو لوٹ لیا اور تخت طاؤس، دریائے نور اور کوہِ نور جیسے قیمتی جواہرات بھی لے گئے۔ آخرکار بادشاہ محمد شاہ کو ان کے سامنے التجا کرنی پڑی جس کے بعد نادر شاہ ایران لوٹ گئے مگر مغلیہ سلطنت اپنی طاقت کھو چکی تھی اور پھر کبھی بحال نہ ہو سکی۔

انتظامی تقسیم

صوبہ دہلی آٹھ (8) سرکاروں میں تقسیم کیا گیا تھا اور آئین اکبری (جلد دوم) کی رو سے ان کی تفصیل یوں ہے:

سنہ 1601ء میں صوبۂ دہلی کے سرکاروں کی فہرست^(ا)

نمبر شمار	نام	رقبہ (مربع میل)	مالیہ/ریونیو (دام)
1۔	دہلی سرکار	7،962 مربع‌میل	123،012،596
2۔	بداؤن سرکار	5،628 مربع‌میل	34،817،063
3۔	کمون سرکار	18،846 مربع‌میل	45،437،700
4۔	سنبھل سرکار	5،585 مربع‌میل	66،941،431
5۔	سہارنپور سرکار	3،480 مربع‌میل	87،839،859
6۔	ریواڑی سرکار	1,201 مربع‌میل	28,807,718
7۔	حصار فیروزہ سرکسر	12،445 مربع‌میل	52،554،905
8۔	سرہند سرکار	11،650 مربع‌میل	160،790،549
کل برائے صوبہ:		66،797 مربع‌میل	600،201،821

یہ سرکار 232 پرگنوں میں تقسیم تھے۔ مثلاً سرہند سرکار 28 پرگنوں پر مشتمل جمن ستلج دوآب تک پھیلا ہوا تھا۔

آب و ہوا

یہ صوبہ داخل اقلیم سوم تھا۔ دریائے گنگ اور جمن کے سرچشمے اسی صوبے میں تھے۔ اس صوبے کی آب و ہوا معتدل تھی اور برسات میں اکثر زمین سیلاب ہو جاتی تھی اور بعض مقام میں تین فصلیں پیدائش غلے کی ہوتی تھیں۔

حواشی

• ا: سرکار کے رقبوں کا تعین 1595–1596ء اور 1601ء کے اعداد و شمار کی بنیاد پر کیا گیا ہے۔ محاصل کی جو رقومات درج ہیں وہ ”جمع“ یا ”نقدی“ کے سرکاری تخمینے ہیں، جیسا کہ ”آئینِ اکبری“ میں درج ہے۔ البتہ یہ محاصل علاقائی نرخوں کے فرق کو مدنظر نہیں رکھتے۔ جمع کی رقم دام (تانبے کے سکے) میں دی گئی ہے۔ آئینِ اکبری کے زمانے میں ایک روپیہ چالیس دام کے برابر تھا۔