عامر بن ربیعہ

آزاد دائرۃ المعارف، ویکیپیڈیا سے
عامر بن ربیعہ
معلومات شخصیت

عامر بن ربیعہ رضی اللہ عنہ سابقون الاولون میں سے ہیں۔آپ رضی اللہ تعالیٰ عنہ حبشہ کی دونوں ہجرتوں میں شامل تھے۔پھر آپ نے مدینہ کی ہجرت کی۔ غزوہ بدر سمیت تمام غزوات میں شریک ہونے والے مہاجر صحابہ میں سے ہیں۔حضرت عثمان غنی رضی اللہ تعالیٰ عنہ کے دور خلافت میں آپ نے وفات پائی ۔

نام و نسب[ترمیم]

عامر نام، ابو عبد اللہ کنیت اور والد کا نام ربیعہ تھا،پورا سلسلہ نسب یہ ہے: عامر ابن ربیعہ بن کعب مالک بن ربیعہ بن عامر بن سعد بن عبد اللہ بن الحارث بن رفیدہ بن عنزبن وائل۔ ان کے سلسلہ نسب میں سخت اختلاف ہے تاہم اربابِ سیر عام طور پر ان کو عنزی لکھتے ہیں عنزوائل کے لڑکے اور بکر و تغلب کے بھائی تھے جن کی خونریز معرکہ آرائیاں اب تک زبان زد خاص وعام ہیں۔[1] ان کا خاندان عمر فاروق کے والد خطاب کا حلیف تھا جنھوں نے فرطِ محبت سے عامر کو متبنیٰ کر لیا تھا، یہی وجہ ہے کہ وہ پہلے عامر بن الخطاب کے نام سے مشہور تھے؛ لیکن جب قرآن شریف نے ہر ایک کو اپنے اصلی آباء واجداد کی طرف انتساب کا حکم دیا تو اس زمانہ سے عامربھی خطاب کی بجائے اپنی نسبی والد ربیعہ کی نسبت سے زبان زد ہوئے۔اس حلیفانہ تعلق کے باعث حضرت عامرؓ اور حضرت عمر فاروقؓ میں بھی آخر وقت تک نہایت دوستانہ تعلقات قائم رہے، حضرت عمرؓ فاروق نے بیت المقدس کا سفر کیا تو یہ ہمرکاب تھے اسی طرح جس سال حضرت عثمانؓ غنی کو اپنا جانشین کرکے حج کے لیے تشریف لے گئے تو اس سفر میں بھی ان کو اپنا رفیق بنایا۔ [2] [3] [4] .[5]

اسلام[ترمیم]

عامر بن ربیعہ ان خوش نصیب بزرگوں میں ہیں جنھوں نے ابتدا ہی میں داعیِ توحید کو لبیک کہا تھا، اس وقت تک آنحضرت ارقم بن ابی الارقم کے مکان میں پناہ گزین نہیں ہوئے تھے۔ [6]

ہجرت[ترمیم]

شرک و توحید کی کشاکش اور کفار کے دست تظلم نے ان کو بھی مکہ میں چین سے رہنے نہ دیا، دو دفعہ اپنی زوجہ لیلیٰ بنت ابی حشمہ کو ساتھ لے کر ملک حبش تشریف لے گئے، پھر وہاں سے واپس آکر ہجرت مدینہ کی،ان کا بیان ہے کہ اس وقت تک صرف ابو سلمہ بن عبدالاسد مدینہ پہنچے تھے، لیکن صحیح یہ ہے کہ ان سے پہلے چند اور حضرات بھی پہنچ چکے تھے، البتہ ان کی بیوی لیلی بنت حشمہ کو عورتوں میں اولیت کاشرف حاصل ہے۔[7] [8]

غزوات[ترمیم]

غزوہ بدر ، غزوہ احد ، غزوہ خندق اور تمام دوسرے غزوات میں رسول اللہ کے ہمرکاب تھے اس کے علاوہ چھوٹے چھوٹے مہمات میں بھی شریک ہوئے اور نہایت جفاکشی وجان کاہی سے اعلا کلمتہ اللہ کا فرض انجام دیا، اپنے صاحبزادہ عبد اللہ بن عامرسے اکثر فخر ومباہات کے ساتھ ان شاندار کارناموں کا تذکرہ فرمایا کرتے تھے، ایک روز اثنائے گفتگو میں بولے کہ "رسول اللہ ہم لوگوں کو مہمات پر بھیجتے تھے اور عسرت وناداری کے باعث سامانِ رسد میں صرف تھوڑی سی کھجوریں ساتھ کردیتے جو پہلے ایک ایک مٹھی سب کو ملتی تھی، اس کے بعد کم ہوتے ہوتے صرف ایک ایک کھجور کی نوبت آجاتی تھی، عبد اللہ نے متعجب ہوکر پوچھا، ایک ایک کھجور سے کس طرح کام چلتا ہوگا؟ فرمایا جانِ پدر ایسا نہ کہو بسا اوقات جب کھجوریں ختم ہوجاتی تھیں تو ہم لوگ اس ایک کھجور کے لیے بھی ترس جاتے تھے۔[9] [10]

شورش سے کنارہ کشی اور وفات[ترمیم]

خلیفہ سوم عثمان غنی کے آخری عہد خلافت میں جب فتنہ وفساد کا بازار گرم ہوا تو عامر بن ربیعہ نے غایت تقویٰ کے باعث عزلت نشینی اختیار کرلی، دن رات روزہ ،نماز اور درود وظائف میں مشغول رہتے، ایک رات دیر تک مصروفِ عبادت رہے، یہاں تک کہ اسی حالت میں آنکھ لگ گئی تو خواب میں بشارت ہوئی اُٹھ خدا سے دعا کر کہ وہ تجھے اس فتنہ سے بچائے،جس سے اس نے اپنے دوسرے نیک بندوں کو محفوظ رکھا ہے، عامر اسی وقت اُٹھ بیٹھے اور دوگانہ ادا کر کے نہایت خشوع وخضوع سے بارگاہِ رب الحاجات میں دست بدعا ہوئے، غرض اس بشارت غیبی نے ان کی گوشہ نشینی کو پہلے سے زیادہ سخت کر دیا اور اس کے بعد ان کو کسی نے گھر سے باہر نکلتے بھی نہ دیکھا، یہاں تک کہ اسی حالت میں بیمار ہوئے اور عثمان کی شہادت کے چنددنوں بعد وفات پائی، عزلت نشینی کے باعث لوگوں کو یہ بھی معلوم نہ ہو سکا کہ کب بیمار ہوئے؟ اور کب وفات پائی، [11][12]،یکایک جنازہ پر نظر پڑی تو سب متحیر رہ گئے۔ [13]

اخلاق[ترمیم]

قدامت ایمان اور رسولِ خدا صل اللہ علیہ وآلہ وسلم کے شرفِ صحبت نے ان کو اخلاقِ کریمانہ سے آراستہ کر دیا تھا، گذشتہ بالا مختصر واقعات سے ان کی جفا کشی ،تقویٰ اور زہد کا اندازہ ہوا ہوگا۔ [14]

حوالہ جات[ترمیم]

  1. اسد الغابہ:3 /80
  2. (اصابہ: جلد 2/346)
  3. شرح العلامة الزرقاني على المواهب اللدنية بالمنح المحمدية - محمد بن عبد الباقي الزرقاني - ج2 - الصفحة 91 آرکائیو شدہ 2022-07-12 بذریعہ وے بیک مشین
  4. الطبقات الكبرى لابن سعد - عَامِرُ بْنُ رَبِيعَةَ (2) آرکائیو شدہ 2017-02-02 بذریعہ وے بیک مشین
  5. الطبقات الكبرى لابن سعد - عَامِرُ بْنُ رَبِيعَةَ (1) آرکائیو شدہ 2017-02-02 بذریعہ وے بیک مشین
  6. العقد الفريد - ابن عبد ربه - ج ٢ - الصفحة ٢٢٣ آرکائیو شدہ 2022-07-12 بذریعہ وے بیک مشین
  7. طبقات ابن سعد قسم 1جز 3:281
  8. الاستيعاب - ابن عبد البر - ج ٢ - الصفحة ٧٩٠ آرکائیو شدہ 2022-07-12 بذریعہ وے بیک مشین
  9. مسند ابن حنبل جلد 3 :446
  10. تاريخ مدينة دمشق - ابن عساكر - ج ٢٥ - الصفحة ٣١٧ آرکائیو شدہ 2020-01-27 بذریعہ وے بیک مشین
  11. طبقات ابن سعد قسم اول جزء 3:282
  12. اصحاب بدر،صفحہ 100،قاضی محمد سلیمان منصور پوری، مکتبہ اسلامیہ اردو بازار لاہور
  13. الاستيعاب - ابن عبد البر - ج ٢ - الصفحة ٧٩١ آرکائیو شدہ 2022-07-12 بذریعہ وے بیک مشین
  14. سير أعلام النبلاء» الصحابة رضوان الله عليهم» عامر بن ربيعة آرکائیو شدہ 2017-09-25 بذریعہ وے بیک مشین