عدیم ہاشمی

عدیم ہاشمی
معلومات شخصیت
پیدائشی نام	(اردو میں: فصیح الدین)،  (انگریزی میں: Fashih Uddin)
پیدائش	1 اگست 1946ء   فیروزپور
وفات	5 نومبر 2001ء (55 سال)  شکاگو
مدفن	شکاگو
شہریت	پاکستان
اولاد	ساحل عدیم ،  زریاب ہاشمی
عملی زندگی
پیشہ	شاعر ،  مصنف
پیشہ ورانہ زبان	اردو
باب ادب

عدیم ہاشمی (پیدائش: یکم اگست، 1946ء - وفات: 5 نومبر، 2001ء) پاکستان سے تعلق رکھنے والے اردو کے نامور شاعر اور ڈراما نویس تھے۔

حالات زندگی و ادبی خدمات

عدیم ہاشمی یکم اگست، 1946ء کو ڈلہوزی، بھارت برطانوی ہندوستان میں پیدا ہوئے۔ ان کا اصل نام فصیح الدین تھا۔۔ عدیم ہاشمی کا شمار اردو کے جدید شعرا میں ہوتا تھا۔ ان کے متعدد شعری مجموعے شائع ہوئے جن میں ترکش، مکالمہ، فاصلے ایسے بھی ہوں گے، میں نے کہا وصال، مجھے تم سے محبت ہے، چہرا تمھارا یاد رہتا ہے، کہو کتنی محبت ہے اور بہت نزدیک آتے جا رہے ہو کے نام سرفہرست ہیں۔ انھوں نے پاکستان ٹیلی وژن کے لیے ایک ڈراما سیریل آغوش بھی تحریر کیا اور مشہور ڈراما سیریز گیسٹ ہاؤس کے لیے بھی کچھ ڈرامے تحریر کیے۔

تصانیف

شعری مجموعے

• مکالمہ
• بہت نزدیک آتے جا رہے ہو
• چہرہ تمھارا یاد رہتا ہے
• فاصلے ایسے بھی ہوں گے
• ترکش
• کہو کتنی محبت ہے
• میں نے کہا وصال
• مجھے تم سے محبت ہے

ڈرامے

• گیسٹ ہاؤس
• آغوش

نمونۂ کلام

غزل

فاصلے ایسے بھی ہونگے یہ کبھی سوچا نہ تھا		سامنے بیٹھا تھا میرے اور وہ میرا نہ تھا
خود چڑھا رکھے تھے تن پر اجنبیت کے غلاف		ورنہ کب ایک دوسرے کو ہم نے پہچانا نہ تھا
وہ کے خوشبو کی طرح پھیلا تھا میرے چار سو		میں اسے محسوس کر سکتا تھا چھو سکتا نہ تھا
رات بھر پچھلی ہی آہٹ کان میں آتی رہی		جھانک کر دیکھا گلی میں کوئی بھی آیا نہ تھا
عکس تو موجود تھا پر عکس تنہائی کا تھا		آئینہ تو تھا مگر اس میں ترا چہرا نہ تھا
آج اس نے درد بھی اپنے علاحدہ کر لیے		آج میں رویا تو میرے ساتھ وہ رویا نہ تھا
یہ سبھی ویرانیاں اس کے جدا ہونے سے تھیں		آنکھ دھندلائی ہوئی تھی شہر دھندلایا نہ تھا
سینکڑوں طوفان لفظوں کے دبے تھے زیرِ لب		ایک پتھر تھا خموشی کا جو ہلتا نہ تھا
یاد کر کے اور بھی تکلیف ہوتی تھی عدیم		بھول جانے کے سوا اب کوئی بھی چارہ نہ تھا

شعر

بچھڑ کے تجھ سے نہ دیکھا گیا کسی کا ملاپ

اُڑا دیئے ہیں پرندے شجر میں بیٹھے ہوئے

شعر

بہت نزدیک آتے جارہے ہو

بچھڑنے کا ارادہ کر لیا کیا

وفات

عدیم ہاشمی 5 نومبر، 2001ء کو شکاگو، ریاستہائے متحدہ امریکا میں وفات پا گئے اور شکاگو میں پاکستانیوں کے قبرستان میں سپرد خاک ہوئے۔