فرینکنسٹائن

فرینکنسٹائن

پہلی جلد کا سرورق، اشاعت بار اول، 1818ء
مصنف	میری شیلے
اصل عنوان	Frankenstein; or, The Modern Prometheus
مترجم	مظہر الحق علوی
ملک	انگلستان
زبان	انگریزی
صنف	گوتھک ناول، ہیبت ناک فکشن، سائنس فکشن
محل وقوع	انگلستان، آئرستان، اطالیہ، فرانس، اسکاچستان، قدیم سوئس وفاق، سلطنت روس، مقدس رومی سلطنت؛ اٹھارھویں صدی کا اواخر
اشاعت	1 جنوری 1818 (1818-01-01)
ناشر	لیکنگٹن، ہیوز، ہارڈنگ، میور اینڈ جونز
صفحات	280
ڈیوی اعشاری	823.7
ایل سی درجہ بندی	PR5397 .F7
قبل ازاں	History of a Six Weeks' Tour
بعد ازاں	Valperga
ریختہ ای بکس	فرینکنسٹائن

”فرینکنسٹائن“ (دی ماڈرن پرومیتھیئس) سنہ 1818ء کا گوتھک ناول ہے جو انگریز مصنفہ میری شیلے نے لکھا۔ فرینکنسٹائن وکٹر فرینکنسٹائن نامی ایک نوجوان سائنس دان کی کہانی بیان کرتا ہے جو غیر روایتی سائنسی تجربے میں مختلف انسانی اعضا کو جوڑ کر ایک ذی شعور مخلوق تخلیق کرتا ہے۔ میری نے یہ کہانی 18 سال کی عمر میں ’بَاتھ‘ میں قیام کے دوران لکھنا شروع کی اور اس کا پہلا ایڈیشن 1 جنوری 1818ء کو لندن میں گمنام شائع ہوا اور اس وقت وہ 20 برس کی تھیں۔ ان کا نام پہلی مرتبہ دوسرے ایڈیشن میں ظاہر ہوا جو سنہ 1821ء میں پیرس میں شائع ہوا تھا۔ اس ناول کا اردو ترجمہ مظہر الحق علوی نے کیا اور نسیم بک ڈپو لکھنؤ سے شائع ہوا۔

میری نے 1815ء میں یورپ کا سفر کیا دریائے رائن کے کنارے جرمنی میں سفر کرتے ہوئے وہ گیرنس ہائم میں رکی، جو فرینکنسٹائن قلعے سے 17 کلومیٹر (11 میل) کے فاصلے پر واقع ہے، جہاں تقریباً ایک صدی قبل کیمیا گر یوہان کونراڈ ڈِپّل نے تجربات کیے تھے۔ اس کے بعد وہ جنیوا، سوئٹزرلینڈ کے علاقے میں گئیں، جہاں کہانی کا بیشتر حصہ وقوع پزیر ہوتا ہے۔ گالون ازم اور خفیہ علوم کے تصورات ان کے ساتھیوں کی گفتگو کا اہم موضوع تھے، خصوصاً ان کے محبوب اور مستقبل کے شوہر پرسی بش شیلے کے لیے۔

1816ء میں میری، پرسی، جان ولیم پولیڈوری اور لارڈ بائرن نے ایک مقابلہ کیا کہ کون سب سے بہترین ہیبت ناک کہانی لکھے گا۔ کئی دن سوچ وِچار کرنے کے بعد میری کو یہ خیال آیا کہ ایک سائنس دان جو جاندار تخلیق کرتا ہے اور پھر اپنی تخلیق سے خوفزدہ ہو جاتا ہے، اس پر کہانی لکھی جائے۔

فرینکنسٹائن انگریزی ادب کی سب سے معروف تصانیف میں سے ایک ہے۔ یہ گوتھک ناول اور رومانوی تحریک کے عناصر سے مزین ہے اور اس نے ادب اور مقبول ثقافت پر گہرا اثر چھوڑا حتیٰ کہ اس نے خوفناک کہانیوں، فلموں اور ڈراموں کی ایک مکمل صنف کو جنم دیا۔ ناول کی اشاعت کے بعد سے ’فرینکنسٹائن‘ کا نام اکثر اس مخلوق کے لیے استعمال ہونے لگا جو کہانی میں تخلیق کی گئی تھی۔

پلاٹ

جنیوا کے ایک متمول خاندان کا بیٹا وکٹر فرینکنسٹائن جوانی میں کیمیا گری کے مطالعے میں محو رہتا ہے مگر بعد میں جدید سائنس خصوصاً کیمیا اور برقیات میں دلچسپی لینے لگتا ہے۔ اپنی والدہ کی وفات پانے کے بعد وہ یونیورسٹی آف انگولشٹاڈ میں پڑھنے جاتا ہے جہاں وہ جاندار پیدا کرنے کا ایک نیا طریقہ دریافت کرتا ہے اور ایک خوفناک قد آور مخلوق تخلیق کرتا ہے۔ مخلوق زندہ ہوتے ہی وہ خوفزدہ ہو کر بھاگ جاتا ہے۔

مخلوق بھٹکتے ہوئے انسانی بستیوں سے بچتی ہے ایک جھونپڑی کے ساتھ والے گھر میں چھپ کر رہتی ہے اور وہاں رہنے والے خاندان کو دیکھ کر بولنا اور پڑھنا سیکھتی ہے۔ بعد میں اپنی اصل حقیقت جان کر وہ انتقام کے جذبات میں مبتلا ہو جاتی ہے، جنیوا جا کر وکٹر کے چھوٹے بھائی ولیم کو قتل کر دیتی ہے اور الزام ایک بے قصور نوکرانی پر ڈال دیتی ہے۔

بعد میں مخلوق وکٹر سے مطالبہ کرتی ہے کہ اس کے لیے ایک عورت بھی بنائے تاکہ وہ اکیلا نہ رہے۔ وکٹر ابتدا میں مان جاتا ہے لیکن ادھورا کام تباہ کر دیتا ہے جس پر مخلوق وکٹر کے دوست ہنری کلیرول کو قتل کر دیتی ہے۔ وکٹر کے گھر لوٹنے پر مخلوق اس کی شادی کی رات بیوی کو قتل کر دیتی ہے اور وکٹر کا والد بھی غم سے مر جاتا ہے۔

وکٹر بدلہ لینے کے لیے مخلوق کا پیچھا کرتے ہوئے آرکٹک پہنچ جاتا ہے مگر وہاں تھکن اور سردی سے مر جاتا ہے۔ آخر میں مخلوق آ کر وکٹر کے مرنے پر غم ظاہر کرتی ہے اور کہتی ہے کہ وہ خود کو جلا کر ختم کر دے گی پھر برف میں غائب ہو جاتی ہے۔

اخذ

فلمیں

اس ناول پر بہت سی فلمیں بھی بنائی گئی ہیں۔

فرینکنسٹائن (1931)

فرینکنسٹائن (1931) Frankenstein (1931) میں بوریس کارلوف نے مونسٹر کا کردار ادا کیا تھا۔ اگر چہ مووی کی کہانی ناول سے تھوڑا ہٹ کر تھی ۔ لیکن ہالی وڈ نے بعد میں مونسٹرز کے کردار کے لیے اسی چہرے کو کاپی کیا۔ اس فلم کا شمار گوتھک ہارر سینما کی کلاسیک فلموں میں ہوتا ہے۔

برائیڈ آف فرینکنسٹائن (1935)

برائیڈ آٖف فرینکنسٹائن(1935) Bride of Frankenstein (1935) اصل میں 1931 والی فلم کا سیکوئل۔ ناقدین اسے پہلی فلم سے بھی بہتر مانتے ہیں۔

سن آف فرینکنسٹائن (1939)

سن آف فرینکنسٹائن (1939) Son of Frankenstein (1939) میں مونسٹر اور فرینکنسٹائن خاندان کی کہانی کا سلسلہ آگے بڑھایا گیا ہے۔

دی کرس آف فرینکنسٹائن (1957)

دی کرس آف فرینکنسٹائن (1957) The Curse of Frankenstein (1957) ہیمّر اسٹوڈیوز کی رنگین ہارر فلمہے۔ اس میں پیٹر کوشنگ اور کرسٹوفر لی نے اس فلم کے دو مرکزی کردار نبھائے۔

فرینکنسٹائن مسٹ بی ڈسٹرائیڈ (1969)

فرینکنسٹائن مسٹ بی ڈسٹرائیڈ (1969) Frankenstein Must Be Destroyed (1969) فرینکسٹائن سیریز کی ایک اور گہری اور سنجیدہ فلم ہے۔

ینگ فرینکنسٹائن (1974)

ینگ فرینکنسٹائن (1974) Young Frankenstein (1974) میل بروکس کی کامیڈی پیروڈی فلم ہے۔اس فلم میں فرینکنسٹائن کے روایتی ہارر کو مزاح کے ساتھ پیش کیا گیا۔

دی برائیڈ (1985)

دی برائیڈ(1985) The Bride (1985)یہ فلم"Bride of Frankenstein" کی جدید ری ٹیلنگ۔ اسٹنگ اور جینیفر بیلز کی مرکزی کرداروں میں اداکاری کی ہے۔

فرینکنسٹائن اَن باؤنڈ (1990)

فرینکنسٹائن اَن باؤنڈ (1990) Frankenstein Unbound (1990) سائنس فکشن اور گوتھک امتزاج، وقت کے سفر کا عنصر بھی ہے۔

میری شیلیز فرینکنسٹائن (1994)

میری شیلیز فرینکنسٹائن (1994) Mary Shelley’s Frankenstein (1994) کینیٹھ برینا کی فلم ہے جس میں وکٹر کا کردار خود برینا نے اور مونسٹر کا کردار رابرٹ ڈی نیرو نے کیا۔اس فلم کا مواد ناول کے سب سے زیادہ قریب ہے۔ اس کے ویژل افیکٹ ، تاریک ماحول اور رابرٹ ڈی نائرو کی عمدہ اداکاری ، مونسٹر کے روپ میں چہرے پر بے بسی تنہائی کے احساسات نے فلم کو ناول کے ماحول کے ساتھ مکمل ایڈجسٹ کر دیا۔

وکٹر فرینکنسٹائن (2015)

وکٹر فرینکنسٹائن Victor Frankenstein (2015) جیمز میک ایووئے اور ڈینیئل ریڈکلف کی فلم۔ ہے اس میں ایگور کی نظر سے کہانی بیان کی گئی ہے۔

فرینکنسٹائن (2014)

فرینکنسٹائن (2014) I, Frankenstein (2014) جدید ایکشن فینٹسی ورژن ہے جس میں مونسٹر مختلف مافوق الفطرت جنگوں میں شامل دکھایا گیا ہے۔

فرینکنسٹائن (2025)

فرینکنسٹائن (2025) میں ریلیز ہونے والی فلم ہے۔