قلعہ رائے پور اسپورٹس فیسٹیول

بھارت کے ایک دیہی علاقے میں کھیل کے مقابلے کا منظر

پنجاب، بھارت کے لدھیانہ ضلع کے قلعہ رائے پور دیہی علاقہ میں ہر سال کھیل کے مقابلوں کا انعقاد ہوتا ہے۔ اسے قلعہ رائے پور اسپورٹس فیسٹیول کے نام سے عالمی سطح کی شہرت حاصل ہے۔

آغاز

1933ء میں سماجی کارکن اندر سنگھ گریوال نے یہ تصور متعارف کروایا کہ قلعہ رائے پور اور اس کے اطراف و اکناف کے کاشتکار یکجا ہو کر اپنی تخلیقی صلاحیتوں کا مظاہرہ کر سکتے ہیں۔ اسی تصور سے لدھیانہ کا یہ قصبہ ہر فروری کھیل مقابلوں کا مرکز بننے لگا جسے دیہی اولمپکس بھی کہا جاتا ہے۔

کھیل

مختلف کھیلوں میں رسی کھینچنا، ہاکی، سائیکل دوڑ، کتوں کی دوڑ، گھُڑدوڑ، اونچی اور لمبی چھلانگ، بیل گاڑیوں کی دوڑ، کبڈی، بیل گاڑیوں کی دوڑ، خچرگاڑیوں کی دوڑ، عام دوڑ، ٹریکٹروں کے مقابلے اور اسی قبیل کے کئی شہری، دیہی اور عجیب وغریب مقابلے منعقد ہوتے ہیں۔ نوجوان سکھ فنون سپہ گری کا بھی مظاہرہ کرتے ہیں۔

مقابلوں کی مقبولیت

قلعہ رائے پور اسپورٹس فیسٹیول کا انعقاد یہاں کے مقامی گریوال اسپورٹس اسٹیڈیم میں ہوتا ہے۔ کھیل کی مشعل کے اردگرد، دوڑ کے میدان سے لگ کر یا اسٹیڈیم پر کئی ممالک کے پرچم لہراتے ہیں۔ ہر سال کھیلوں میں کئی بیرونی شرکاء آتے ہیں۔ اسی کی ایک مثال 1996ء میں پہلی بار وینکوور، کینیڈا سے یہاں کبڈی اور کھوکھو کی ٹیموں کا حصہ لینا ہے۔ ان کھیلوں کے تین دن ہر کچی اور پکی سڑک گریوال اسٹیڈیم سے جڑتی ہے۔

مزید دیکھیے

• بھارتی پنجاب میں کھیل