ما ہوان

ما ہوان
(چینی میں: 馬歡)
معلومات شخصیت
پیدائش	سنہ 1380ء   شاوشنگ
تاریخ وفات	سنہ 1460ء (79–80 سال)
شہریت	منگ خاندان
عملی زندگی
پیشہ	مہم جو ،  مترجم ،  مصنف

منگ خاندان کی ینگیا شینگلان کتاب کے ووڈ بلاک پرنٹ سے ایک صفحہ

ما ہوان (چینی ساده: 马欢؛ چینی روایتی: 馬歡؛ پینین: Mǎ Huān؛ چینی عربی رسم الخط: ما خُوْاَن) (1380ء–1460ء)، جن کا لقب زونگ داؤ (宗道؛ پینین: Zōngdào) اور قلمی نام «پہاڑی لکڑہارا» (會稽山樵) تھا، ایک چینی سیاح اور مترجم تھے۔ انھوں نے امیرالبحر ژینگ حہ کے مغربی سمندروں کے لیے کیے گئے سات بحری سفروں میں سے تین میں ان کے ساتھ سفر کیا۔ ما ہوان مسلمان تھے اور صوبہ ژے جیانگ کی کوائی جی کمانڈری کے علاقے میں پیدا ہوئے، جو موجودہ شاو شینگ کی حدود میں واقع ہے۔ وہ چینی کلاسیکی اور بدھ مت کی متعدد روایتی تحریروں سے واقف تھے اور ترجمے کے لیے عربی زبان بھی سیکھی تھی۔

1413ء کی مہم: چامپا، جاوا، سوماترا، فلمبان، سیام، کوچین اور ہرمز کا سفر کیا۔

1421ء کی مہم: ملاکا، آرو، سوماترا، ترینکومالی، سیلون، کوچین، کالی کٹ، ظفار اور ہرمز کا سفر کیا۔

1431ء کی مہم: بنگال، چٹاگانگ، سونارگاؤں، گور اور کالی کٹ کا سفر کیا۔ کالی کٹ سے ہونگ باؤ نے انھیں مکہ مکرمہ کے لیے بطور سفیر روانہ کیا۔

اپنی مہمات کے دوران ما ہوان نے جغرافیہ، سیاست، موسمی حالات، ماحول، معیشت، مقامی رسوم و رواج اور حتیٰ کہ مجرموں کو دی جانے والی سزاؤں کے طریقوں کے بارے میں اپنے مشاہدات قلم بند کیے۔ اپنی پہلی بحری مہم سے وطن واپسی کے بعد انھوں نے اپنے سفر کے بارے میں ایک کتاب لکھنا شروع کی، جس کا ابتدائی مسودہ تقریباً 1416ء میں تیار ہوا۔ بعد کی مہمات کے دوران انھوں نے اس مسودے میں توسیع اور ترمیم کی اور حتمی نسخہ تقریباً 1451ء میں مکمل ہوا۔ ان کی کتاب کا عنوان ینگیا شِنگلان (瀛涯胜览) تھا، جس کا مطلب «سمندروں کے ساحلوں کا جامع جائزہ» ہے۔

منگ اور چنگ سلطنتوں کے ادوار میں اس کتاب کے متعدد مطبوعہ اور قلمی نسخے تیار کیے گئے۔ اس کے مطبوعہ نسخے کے لیے جدید ترین اصل متن کو مؤرخ فینگ چِنگ جون نے مرتب کیا۔ بعد میں چین کے اوشن پبلشنگ ہاؤس نے منگ سلطنت کے قلمی نسخوں کی بنیاد پر ایک نیا ایڈیشن شائع کیا۔ جے۔ وی۔ جی۔ ملز (1887ء–1987ء) نے اس کتاب کا تشریحی انگریزی ترجمہ کیا، جسے ہاکلوٹ سوسائٹی نے 1970ء میں شائع کیا۔ اسے 1997ء میں بنکاک کے وائٹ لوٹس پریس نے دوبارہ شائع کیا۔ ملز کا ترجمہ فینگ چِنگ جون کے مرتب کردہ نسخے پر مبنی تھا۔ دنیا بھر کے محققین ینگیا شِنگلان کو منگ سلطنت کی بحری دریافتوں، جنوب مشرقی ایشیا اور ہندوستان کی تاریخ کے اہم بنیادی ماخذوں میں شمار کرتے ہیں۔