محراب نبوی شریف

مسجد نبوی

محراب نبوی شریف مسجد نبوی کے چھ محرابوں میں سے ایک ہے۔ یہ روضۂ شریف میں واقع ہے اور منبر کے بائیں جانب یعنی منبر شریف اور مقصورہ کے درمیان واقع ہے۔ یہ وہی جگہ ہے جہاں نبی محمدؐ نماز پڑھا کرتے تھے۔ جیسا کہ برزنجی نے بیان کیا ہے، موجودہ محراب کے مغربی جانب وہ اصل مقام ہے جہاں آپؐ کی نماز کا مصلا تھا، لہٰذا اس وقت محراب کی تجویف نماز پڑھنے والے کے بائیں جانب آتی ہے۔ اس محراب پر مختلف ادوار میں متعدد مرمتیں اور اصلاحات کی گئیں اور جو محراب آج موجود ہے وہ سلطان اشرف قايتبای کی تعمیر کردہ ہے۔

محراب کی نسبت نبی کریمؐ کی طرف اور اس کی تعمیر

اس محراب کو نبی کریم صل اللہ علیہ وآلہ وسلم کی طرف اس لیے منسوب کیا گیا ہے کہ یہ اس جگہ کے قریب واقع ہے جہاں آپؐ نماز پڑھتے تھے۔ دراصل نبی کریمؐ کے زمانے میں یہ محراب کسی مخصوص تعمیر یا امتیاز کے ساتھ موجود نہ تھا، بلکہ آپؐ باقاعدگی سے اسی جگہ کھڑے ہوکر مسلمانوں کی امامت فرماتے تھے اور آپؐ کے سامنے مسجد کی دیوار آپؐ کے لیے سترہ (پردہ) ہوتی تھی۔

یہی حالت خلفائے راشدین کے دور میں بھی برقرار رہی، یہاں تک کہ عمر بن عبد العزیز نے جب وہ مدینہ کے گورنر تھے (88 سے 91 ہجری کے دوران) اور خلیفہ ولید بن عبد الملک کے حکم پر مسجد کی تعمیر و توسیع کروائی تو اسی موقع پر اس جگہ باقاعدہ محراب بنایا۔ علامہ سمہودی لکھتے ہیں:

”

"نبیؐ کے دور میں مسجد نبوی میں کوئی محراب نہ تھا اور نہ خلفائے راشدین کے زمانے میں، یہاں تک کہ عمر بن عبد العزیز رحمہ اللہ نے ولید کی عمارت کے دوران اسے بنایا اور اس کے بارے میں نہایت احتیاط برتی۔"

“

موجودہ محراب

اب جو محراب موجود ہے، وہ سلطان اشرف قايتبای کی تعمیر کردہ ہے، جس نے اسے 888 ہجری میں بنایا۔ اس کی پشت پر کندہ ایک عبارت اس کی تصدیق کرتی ہے جو مملوکی طرز کے خطِ ثلث میں لکھی گئی ہے۔

بعد میں خادم الحرمین الشریفین شاہ فہد بن عبد العزیز کے دور میں 1404 ہجری میں اس محراب کی مکمل مرمت اور تزئین کی گئی۔ کیونکہ وقت کے ساتھ اس کی فسيفساء اور سنگِ مرمر میں دراڑیں پڑ گئی تھیں، اس لیے شاہ فہد نے اس کی ازسرنو مرمت کا حکم دیا، جو 1404 ہجری میں مکمل ہوئی۔