مہاراجا چندو لال

مہاراجا چندو لال لال
معلومات شخصیت
پیدائش	سنہ 1766ء   برہانپور
وفات	15 اپریل 1845ء (78–79 سال)  حیدر آباد
قومیت	ہندوستانی
عملی زندگی
پیشہ	شاعر ،  سیاست دان

مہاراجا چندو لال (پیدائش: 1766ء— وفات: 15 اپریل 1845ء) حیدرآباد دکن کی مشہور شخصیت تھے جنھوں نے ریاست حیدرآباد کے وزیر اعظم کی حیثیت سے فرائض سر انجام دیے۔چندو لال بیک وقت فارسی اور اردو کے شاعر بھی تھے۔ اپنے عہد وزارت میں چندو لال نے بیشتر اردو شعرا کو حیدرآباد دکن بلوایا اور وہیں انھیں سکونت اختیار کرنے کے بہترین انتظامات کیے۔

پیدائش

• مزید دیکھیں: صدر المہام حیدرآباد

چندو لال کی پیدائش 1766ء میں برہانپور میں ہوئی۔ اُن کے والد کا نام رائے نارائن داس تھا جو رائے بریلی سے ہجرت کرکے حیدرآباد دکن پہنچے اور وہیں سکونت اختیار کی۔ اُن کے آبا و اجداد ہندو تھے۔ آبا و اجداد میں راجا ٹوڈرمل بھی شامل تھے جو مغل شہنشاہ جلال الدین اکبر کے وزیر مالیہ تھے۔ چندو لال کے خاندان نے ریاست حیدرآباد میں نظام الملک آصف جاہ اول کے عہدِ حکومت (1724ء- 1748ء) میں وزارت مالیہ کا ادارہ قائم کیا۔ اِس خاندان میں سے آخری وزیر اعظم ریاست حیدرآباد مہاراجہ سر کشن پرشاد ہوئے۔ریاست حیدرآباد میں اِس خاندان کو مال والا خاندان کہا جاتا تھا۔

وزیر اعظم و پیشکارِ ریاست حیدرآباد

• مزید دیکھیں: میر اکبر علی خان سکندر جاہ، آصف جاہ سوم

نواب سکندر جاہ کے عہدِ حکومت میں چندو لال کا بطور پیشکار مالیہ ریاست حیدرآباد 11 مئی 1806ء کو تقرر کیا گیا۔1819ء میں چندو لال کو مہاراجا کا خطاب تفویض ہوا اور ایک کروڑ روپئے انعام دیا گیا۔ 1822ء میں سات ہزاری سوار کا منصب عطاء ہوا۔ ناصر الدولہ، آصف جاہ چہارم کی طرف سے راجا راجگان کا خطاب تفویض ہوا۔ 1833ء میں بطور وزیر اعظم تقرر کیا گیا جس پر 5 ستمبر 1843ء تک فائز رہے۔

شاعری

چندو لال کا تخلص شاداں تھا۔ انھوں نے اردو اور فارسی میں بیک وقت شاعری کی۔ وہ اردو شاعری اور ادب سے بخوبی واقف تھے۔ ان کی فیاضی دربار کے اردو شعرا اور مصنفین کو اپنی طرف مائل کرتی تھی۔ انھوں نے دہلی کے ذوق اور بخش ناسخ جیسے شعرا کو ریاست حیدرآبار آنے کی دعوت دی لیکن انھوں نے کچھ مسائل کی وجہ سے آنے سے انکار کر دیا۔ وزیر اعظم کے منصب پر فائز ہونے کے باجود وہ روزانہ مشاعرہ کا انعقاد کرتے اور اس میں حصہ لیا کرتے تھے۔

وفات

چندو لال کا انتقال 78 سال کی عمر میں 15 اپریل 1845ء کو ہوا۔

یادگار

شہر حیدرآباد میں ایک محلہ آج بھی چندو لال بارہ دری کے نام سے مشہور ہے۔

مزید دیکھیے

• ریاست حیدرآباد
• میر اکبر علی خان سکندر جاہ، آصف جاہ سوم