نظام الملک آصف جاہ اول

آزاد دائرۃ المعارف، ویکیپیڈیا سے
یہاں جائیں: رہنمائی، تلاش کریں
میر قمر الدین خان صدیقی بے آفندی
چِین قلیچ خان، نظام المک، آصف جاہ اول
Asaf Jah I.jpg
آصف جاہ اول، یمین السلطنت، رکن السلطنت، جملۃ الملک، مدار المہام، نظام الملک، خانِ دوراں، نواب میر غازی الدین خان صدیقی بے آفندی بہادر فتح جنگ، سپہ سالار، نواب صوبیدارِ دکن
نظام حیدرآباد
دور 31 جولائی 1724ءیکم جون 1748ء
(مدتِ حکومت: 23 سال 10 ماہ 1 دن شمسی)
پیشرو کوئی نہیں
جانشین ناصر جنگ
شریک حیات عمدہ بیگم، سعید النساء بیگم، گوتھام ویلوری
اولاد
6 بیٹے، 7 بیٹیاں
والد نواب غازی الدین فیروز جنگ اول بے آفندی بہادر
والدہ وزیر النساء بیگم
پیدائش جمعرات 14 ربیع الثانی 1082ھ/ 20 اگست 1671ء
آگرہ، مغلیہ سلطنت، موجودہ اتر پردیش، بھارت
وفات ہفتہ 4 جمادی الثانی 1161ھ/ یکم جون 1748ء
(عمر: 76 سال 9 ماہ 12 دن شمسی)
برہانپور، مدھیہ پردیش، مرہٹہ سلطنت
تدفین خلد آباد، اورنگ آباد (مہاراشٹر)، ریاست حیدرآباد، مغلیہ سلطنت، موجودہ اورنگ آباد (مہاراشٹر)، مہاراشٹر، بھارت
مذہب شیعہ اسلام
فوجی زندگی
وابستگی Alam of the Mughal Empire.svgمغلیہ سلطنت
نوکری/شاخ مغلیہ سلطنت
عہدہ سوار، فوجدار، صدر اعظم، صوبیدار، نظام حیدرآباد
جنگیں/محارب مغل- مرہٹہ جنگیں
مغلیہ سلطنت پر نادر شاہ کا حملہ
جنگ کرنال 1739ء

میر قمر الدین خان صدیقی نظام الملک آصف جاہ اول مملکت آصفیہ کے بانی تھے جو 1724ء سے 1748ء تک ریاست حیدرآباد کے تخت پر متمکن رہے۔

ابتدائی حالات[ترمیم]

نظام الملک کا اصل نام میر قمر الدین تھا اور یہ نام خود مغل شہنشاہ اورنگ زیب عالمگیر نے رکھا تھا۔ نظام الملک کے اجداد کا تعلق ترکستان سے تھا۔ انہوں نے عالمگیر کی زیر نگرانی تربیت پائی تھی اور اپنی عادات و اطوار میں اور اپنی صلاحیتوں میں اس سے بہت ملتے جلتے تھے۔ نظام الملک میں وہ تمام صلاحیتں تھیں جو سلطنت مغلیہ کے زوال کو روک سکتی تھیں اور اگر ان کو موقع ملتا تو نظام الملک برصغیر میں وہی کردار ادا کرسکتے تھے جو سلطنت عثمانیہ میں سلیمان اعظم کے بعد وزیراعظم محمد صوقوللی اور محمد کوپریلی اور احمد کوپریلی نے ادا کیا۔ ان کو جب محمد شاہ کے دور میں 1722ء میں ہندوستان کا وزیراعظم بنایا گیا تو انہوں نے زوال سلطنت کو روکنے کے لیے ضروری اصلاحات کرنا چاہیں اور جب بادشاہ اور ان کے نا اہل مصاحبین نے ان اصلاحات کی راہ میں رکاوٹیں ڈالیں تو نظام الملک بد دل ہو کر دکن چلے گئے جہاں کے چھ صوبوں کا ان کو صوبہ دار بنادیا گیا تھا۔ یہاں انہوں نے ایک خود مختار حکمران کی حیثیت سے حکومت کی، مگر وہ مغل بادشاہ کا اتنا لحاظ کرتے تھے کہ اس کے حکم پر دہلی پہنچ جاتے تھے، چنانچہ نادر شاہ کے حملے کے موقع پر انہوں نے دہلی جاکر مغل بادشاہ کے حقوق کی حفاظت کے لیے ہر ممکن کوشش کی۔

وسیع ریاست[ترمیم]

نظام الملک نے جو وسیع ریاست قائم کی وہ دریائے نربدا سے راس کماری تک پھیلی ہوئی تھی اور مہاراشٹر کے مغربی اور شمال مشرقی حصوں اور موجودہ کیرالا کے علاوہ یہ سارا علاقہ ان کے قبضے میں تھا۔ حیدر آباد، اورنگ آباد، احمد نگر، بیجا پور، ترچناپلی، تنجور اور مدورا مملکت آصف جاہی کے مشہور شہر تھے۔ مملکت کا رقبہ تین لاکھ مربع میل سے کم نہ تھا۔ نظام الملک نے مغلیہ سلطنت کے بہت بڑے حصے کو مرہٹوں کی تباہ کاریوں سے محفوظ کردیا تھا اور ایک ایسے وقت میں جبکہ پورے بر صغیر میں انتشار پھیلا ہوا تھا انہوں نے دکن میں امن و امان کی فضا قائم کی۔

نظام الملک ایک دیانتدار، دیندار اور صاحب کردار حکمران تھے۔ ان کی انتظامی صلاحیت اور تدبر کا مورخین نے کھل کر اعتراف کیا ہے۔ دکن میں نظام آباد کا شہر انہی کا آباد کیا ہوا ہے۔ ان کی علمی اور ادبی سرپرستی کی وجہ سے دارالحکومت حیدر آباد علم و ادب کا مرکز بن گیا۔ بر صغیر کی اسلامی تاریخ میں اورنگ زیب کے بعد ہم جن تین حکمرانوں کو عظیم کہہ سکتے ہیں ان میں ایک نظام الملک ہیں اور باقی دو حیدر علی اور ٹیپو سلطان۔

انتقال[ترمیم]

نظام الملک اول کا انتقال یکم جون 1748ء کو برہان پور میں ہوا۔ انہیں اورنگ آباد کے قریب خلد آباد میں شیخ برہان الدین غریب چشتی کے مزار کے قریب سپرد خاک کیا گیا۔

جانشیں[ترمیم]

نظام الملک آصف جاہ کے انتقال کے بعد ان کے بیٹوں ناصر جنگ اور مظفر جنگ کی باہمی خانہ جنگی سے مملکت آصفیہ کو بڑا نقصان پہنچا۔ انہوں نے اقتدار حاصل کرنے کے لیے انگریزوں اور فرانسیسیوں کا تعاون حاصل کیا اور اسی طرح انہوں نے پہلی مرتبہ یورپی قوموں کو بر صغیر کی سیاست میں مداخلت کرنے کا موقع فراہم کیا اور انگریزی اقتدار کے لیے راستہ ہموار کیا۔ اس خانہ جنگی سے دوسرا نقصان یہ ہوا کہ شمالی سر کار، کرناٹک اور جنوب کے کئی علاقے جن میں میسور بھی شامل تھا، نظام کے اقتدار سے باہر نکل گئے اور ریاست کے مشرقی اور شمالی حصوں پر مرہٹے قابض ہو گئے۔ اس طرح نظام الملک کے انتقال کے بعد 15 سال کے اندر ہی ریاست کی حدود نصف رہ گئیں۔

خطابات[ترمیم]

  • یامین السلطنت
  • رکن السلطنت
  • جملات الملک
  • نظام الملک
  • نظام الدولہ
  • خانِ دوراں
  • نواب میر غازی الدین خان بہادر
  • فتح جنگ
  • سپہ سالار
  • نواب صوبہ دارِ دکن

عہدے[ترمیم]

  • صوبیدارِ اودھ اور فوجدارِ گورکھ پور: از 9 دسمبر 1707ء تا 6 فروری 1711ء
  • صوبیدارِ دکن اور فوجدارِ کرناٹک: از 12 جنوری 1713ء تا اپریل 1715ء
  • فوجدارِ مراد آباد: از اپریل 1717ء تا 7 جنوری 1719ء
  • صوبیدارِ پٹنہ: از 7 فروری تا 15 مارچ 1719ء
  • صوبیدارِ مالوہ: از 15 مارچ 1719ء تا 1724ء
  • صوبیدارِ گجرات: 1722ء تا 1724ء
پیشرو:
کوئی نہیں
مملکت آصفیہ
31 جولائی 1724ءیکم جون 1748ء
جانشیں:
ناصر جنگ