نیاز احمد (موسیقار)

نیاز احمد (موسیقار)
معلومات شخصیت
پیدائش	3 دسمبر 1946ء   مظفرنگر ضلع ،  اتر پردیش ،  برطانوی ہند
وفات	28 مئی 2019ء (73 سال)  لاہور ،  پاکستان
شہریت	پاکستان
عملی زندگی
پیشہ	نغمہ ساز ،  فلم اسکور کمپوزر
پیشہ ورانہ زبان	اردو
شعبۂ عمل	ملی نغمہ ،  نیم کلاسیکی موسیقی ،  پس پردہ فلمی موسیقی
اعزازات
تمغائے حسن کارکردگی   (2004) پی ٹی وی اعزاز

نیاز احمد (پیدائش: 3 دسمبر، 1946ء - وفات: 28 مئی، 2019ء) پاکستان سے تعلق رکھنے والے موسیقار تھے۔

حالات زندگی

دنیائے موسیقی میں اپنا نام بنانے والے نیاز احمد 3 دسمبر 1946ء کو ضلع مظفرنگر، اتر پردیش، برطانوی پندوستان میں پیدا ہوئے۔ ان کے والد فیاض احمد تقسیم ہند کے دوران ہجرت کرتے ہوئے انتقال کر گئے۔ ان کا خاندان کراچی میں مستقل سکونت پزیر ہو گیا۔ نیاز احمد کی کفالت ان کے چچا ریاض احمد نے کی۔ نیاز احمد چار بھائیوں میں سب سے چھوٹے تھے۔ ان کا پڑھائی میں دل نہیں لتا تھا، جس کے سبب میٹرک نہ کر سکے۔ اپنے ماموں سے موسیقی سیکھنے کے بعد فنی دنیا میں قدم رکھا۔ ابتدا میں چھوٹی تقریبات میں ہارمونیم بجایا کرتے تھے۔ نہال عبداللہ کے توسط سے ریڈیو پاکستان میں اکارڈین پلیئر کا کام ملا۔ پانچ سال تک اس ساز سے جڑے رہنے کے بعد انھوں نے بطور موسیقار قسمت آزمائی کی۔ پہلی دھن گیت یہ کیسا بندھن ہے ساجن کے لیے تیار کی جو گلوکارہ مہناز بیگم کی آواز میں ریکارڈ کیا گیا جسے بہت مقبولیت ملی۔ نیاز احمد نے تاج ملتانی، عشرت جہاں، نکہت سیما کے ساتھ بھی کام کیا اور انھیں اپنی دھنوں پر گانے کا موقع دیا۔ شہنشاہ غزل مہدی حسن کے ساتھ بھی کام کرنے کا موقع ملا۔ چھ برس ریڈیو سے وابستہ رہنے کے بعد پاکستان ٹیلی ویژن نیٹ ورک سے وابستہ ہو گئے جہاں کئی مشہور گیتوں کی دھنیں ترتیب دیں۔ محمد علی شہکی اور عالمگیر کو موسیقی کی دنیا میں متعارف کرانے کا سہرا بھی نیاز احمد ہی کے سر ہے۔ انھوں نے بہت سی مشہور دھنیں ترتیب دیں۔ استاد نصرت فتح علی خان کی مشہور ملی نغمہ میرا انعام پاکستان کی دھن بھی انھوں نے ترتیب دی جسے استاد نصرت فتح علی خان نے گایا۔ ملکہ ترنم نور جہاں کے لیے نیناں تم چپ رہنا کی دھن بھی ترتیب دی۔ ان کے ترتیب دیے ہوئے دیگر مشہور نغموں میں اتنے بڑے جیون ساگر میں (الن فقیر)، ہر گھڑی تیار کامران ہیں ہم (خالد وحید)، خوشبو بن کر مہک رہا ہے میرا پاکستان (لبنیٰ ندیم) اور ہم مائیں، ہم بہنیں (ناہید اختر و دیگر)، نظارے ہمیں دیکھیں (محمد علی شہکی) اور تم سے بچھڑ کر زندہ ہیں (محمد علی شہکی) بہت مشہور ہوئے۔ اس کے علاوہ دیکھ عالمگیر کی آواز میں مشہور نغمات تیرا کیا رنگ کر دیا اور یہ شام اور تیرا نام کی دھنیں بحٰ نیاز احمد نے بنائیں۔ انھوں نے ڈراموں کے ٹائٹل سونگ بھی ترتیب دیے۔ فلمی موسیقی بھی دی۔ نیلام گھر اور پی ٹی وی کے خبرنامہ کی پس پردہ موسیقی بھی انھوں نے ترتیب دی۔ نیاز احمد کو 2004ء میں ان کی فنی خدمات کے اعتراف میں صدارتی ایوارڈ تمغا برائے حسن کارکردگی دیا گیا۔ اس کے علاوہ انھیں تین بار پی ٹی وی نیشنل ایوارڈ ملا، ریڈیو پاکستان نے بھی بہترین موسیقار کا ایوارڈ دیا۔

وفات

نیاز احمد 28 مئی 2019ء کو لاہور، پاکستان میں وفات کر گئے۔