وادی ملکہات

وادی ملکہات
ملک	مصر
جگہ	محافظہ الاقصر
إحداثيات	25°43′39″N 32°35′35″E

وادی ملکہات قدیم مصر میں ملکہاؤں کی تدفین کی جگہ تھی۔ اسے قدیم زمانے میں "تا ـ ست ـ نفرو" کہا جاتا تھا، جس کے معنی ہیں: "فرعون کی اولاد کا مقام" یا "خوبصورتی کی جگہ". اس وادی میں اٹھارویں، انیسویں اور بیسویں سلطنت (1550 ق م – 1070 ق م) کی ملکہات، کئی شہزادے، شہزادیاں اور بعض امرا دفن کیے گئے۔ ان کی قبور کی حفاظت اور ان پر روزانہ کی تدفینی رسومات و دعائیں پجاری ادا کیا کرتے تھے۔

یہ وادی مشہور وادی ملوک کے قریب، دریائے نیل کے مغربی کنارے پر واقع ہے، جو موجودہ محافظہ اقصر میں ہے۔ اس مقام کے تدفین کے لیے منتخب کیے جانے کی وجہ یقینی طور پر معلوم نہیں، لیکن ممکنہ طور پر اس کا سبب قریبی دیر المدینہ (مزدوروں کی بستی) اور وادی ملوک کا قرب تھا۔ ایک اور اہم وجہ وادی کے مدخل پر واقع دیوی حتحور کے نام سے منسوب مقدس غار تھا، جسے موت کے بعد دوبارہ زندگی اور تجدیدِ شباب کی علامت سمجھا جاتا تھا۔

اگرچہ اٹھارویں اور انیسویں سلطنت کے ادوار میں یہ وادی شاہی تدفین کی مرکزی جگہ تھی، لیکن بیسویں سلطنت کے بعد یہاں شاہی تدفین کا سلسلہ ختم ہو گیا۔ بعد ازاں کئی قبروں کو دوبارہ استعمال کیا گیا اور انھیں متعدد تدفین کے لیے ڈھالا گیا۔ بعض جگہ پرانے مقبروں میں نئے دفن کے لیے گڑھے کھودے گئے۔

بطلمی دور کے بارے میں اس وادی کے استعمال کی زیادہ معلومات نہیں ملتیں، لیکن رومی دور میں یہ وادی دوبارہ بڑے پیمانے پر تدفین کے لیے استعمال ہوئی۔ قبطی دور میں بعض قبروں کو راہبوں اور گوشہ نشینوں کے لیے پناہ گاہ بنایا گیا۔ چنانچہ QV60 (نبتتاوی) اور QV73 (حنوت تاوی) جیسی قبروں میں قبطی مسیحیوں کے آثار ملتے ہیں، جہاں دیواروں پر موجود مصری ملکہات اور دیویوں کی تصاویر کو پلستر سے ڈھانپ کر سرخ سیاہی سے مسیحی نشانات اور رموز کندہ یا بنائے گئے۔ یہ مسیحی موجودگی ساتویں صدی عیسوی تک جاری رہی۔

حوالہ جات

• وادي قبور الملكات؛ وادي الملكات ؛ ((بيان الحريم)) - موسوعة المورد، منير البعلبكي، 1991