پوروانچل

وارانسی کی سیاحت کو ہر سال لاکھوں سیاح جاتے ہیں۔

پوروانچل شمالی بھارت کا ایک جغرافیائی علاقہ ہے جو صوبہ اتر پردیش کے مشرقی کنارے پر واقع ہے، جہاں اکثریت کی زبان ہندی اور بھوجپوری ہے۔ پوروانچل کی سرحدیں شمال میں نیپال سے، مشرق میں بہار اور جنوب میں مدھیہ پردیش کے باگھالکھنڈ سے اور مغرب میں اتر پردیش کے علاقہ اودھ اور جنوب مغرب میں نچلے دو آبہ (کانپور – فتح پور – الہ آباد خطہ) سے ملتی ہیں۔

پوروانچل بنیادی طور پر چار اہم ڈویژن پر مشتمل ہے: مغرب میں مشرقی اودھی خطہ، مشرق میں مغربی بھوجپوری خطہ، جنوب میں باگھالکھنڈ کا خطہ اور شمال میں نیپال کا خطہ۔ یہ سندھ گنگا سطح مرتفع (Indo-Gangetic Plain) پر واقع ہے اور مغربی بہار کو ملا کر دنیا کی سب سے زیادہ گنجان آبادی والا علاقہ ہے۔ دیگر اضلاع کے مقابلہ میں یہاں کی مٹی زیادہ زر خیز ہے۔

ہندی کے علاوہ اس خطہ میں بھوجپوری اور اس سے ملتی جلتی بولیاں زیادہ رائج ہیں۔ اگرچہ اودھی اور باگھالکھنڈی بھی مغربی اور جنوبی علاقوں میں بولی جاتی ہیں۔ صوبہ بہار کی طرح یہاں بھی گنجان آبادی، سست اقتصادی ترقی، صنعتوں کی کمی اور شوگر ملوں کے بند ہونے کی وجہ بے روزگاری میں اضافہ ہوا ہے۔

ایک عرصہ سے صوبہ اترپردیش کے اضلاع میں سے 17 کو علاحدہ کرکے پوروانچل کے نام سے صوبہ بنانے کی مانگ ہوتی رہی ہے۔ اس وقت خطہ پوروانچل سے لوک سبھا میں 30 ممبر پارلیمینٹ اور اترپردیش کی 403 سیٹوں والی ریاستی اسمبلی میں 117 ممبر ہیں۔

وارانسی اور گوکھپور اس خطہ کے اضلاع میں ممتاز حیثیت رکھتے ہیں۔ وارانسی کو مستقبل کے صوبہ پوروانچل کے ممکنہ دار الحکومت کے طور پر بھی دیکھا جاتا ہے۔ گورکھپور بھی اہم شہر ہے، لیکن سیاسی اور صنعتی اعتبار سے کم حیثیت رکھتا ہے۔

1991ء میں حکومت اترپردیش نے پوروانچل وکاس ندھی قائم کی تاکہ علاقائی ترقی کے منصوبوں کو سرمایہ دے کر آگے بڑھایا جا سکے اور صوبہ کے مختلف علاقوں کے درمیاں توازن برقرار رہے۔ لیکن بد عنوانی کی وجہ سے حالات ابھی تک بدستور خراب ہیں۔