ہرپرساد شاستری

ہرپرساد شاستری
(بنگالی میں: হরপ্রসাদ শাস্ত্রী)
معلومات شخصیت
پیدائش	6 دسمبر 1853 کھلنا، بنگال پریزیڈنسی
وفات	17 نومبر 1931 کولکاتا
شہریت	برطانوی ہند
عملی زندگی
مادر علمی	پریزیڈنسی یونیورسٹی، کولکاتا سنسکرت کالج (–1877)
تعلیمی اسناد	بی اے ،ایم اے
پیشہ	اکیڈمک، مستشرق
مادری زبان	بنگلہ
پیشہ ورانہ زبان	بنگلہ ،  مراٹھی
ملازمت	ہیئر اسکول ،  پریزیڈنسی یونیورسٹی، کولکاتا ،  جامعہ ڈھاکہ ،  سنسکرت کالج

ہرپرساد شاستری ((بنگالی: হরপ্রসাদ শাস্ত্রী)‏) ‏ (6 دسمبر 1853 – 17 نومبر 1931ء) جو ہرپرساد بھٹاچاریہ کے نام سے بھی مشہور ہیں، ہندوستان کے ایک دانش ور، سنسکرت کے عالم، پرانے دستاویزوں کے شیدائی اور بنگالی ادب کے مورخ تھے۔ بنگالی ادب کے سب سے قدیم نمونہ چریاپد کے انکشاف کا سہرا ہرپرساد کے سر ہے۔

ابتدائی زندگی

ہرپرساد شاستری بنگالی شہر کھلنا میں واقع کمیرا گاؤں میں پیدا ہوئے۔ ان کا آبائی وطن چوبیس پرگنہ کے شمال میں واقع نیہاٹی تھا۔ ان کے خاندان کا نام بھٹاچاریہ تھا جو بنگال کا ایک عام خاندانی نام ہے۔

ہرپرساد شاستری کی ابتدائی تعلیم اپنے گاؤں کے اسکول میں ہوئی، بعد ازاں وہ کلکتہ کے سنسکرت کالج اور پریزیڈنسی کالج میں پڑھتے رہے۔ کلکتہ میں وہ مشہور بنگالی محقق اور سماجی مصلح ایشور چندر ودیا ساگر کے ساتھ قیام پزیر رہے۔ ودیا ساگر شاستری کے بڑے بھائی نندکمار کے دوست تھے۔

شاستری نے سنہ 1871ء میں ثانوی تعلیم مکمل کی، سنہ 1873ء میں انڈر گریجویٹ، 1876ء میں بی اے اور 1877ء میں سنسکرت میں آنرز مکمل کیا۔ ایم اے کی ڈگری لینے کے بعد انھیں شاستری کا خطاب دیا گیا۔ یہ خطاب اس طالب علم کو دیا جاتا تھا جو امتیازی نمبروں سے کامیاب ہوتا۔ سنہ 1878ء میں وہ ہیئر اسکول میں مدرس بن گئے۔

پیشہ ورانہ زندگی

ہرپرساد شاستری متعدد مناصب پر فائز رہے۔ سنہ 1883ء میں وہ سنسکرت کالج کے پروفیسر بنے۔ اسی اثنا میں وہ حکومت بنگال کے معاون مترجم بھی تھے۔ سنہ 1886ء سے 1894ء تک سنسکرت کالج کی تدریس کے ساتھ بنگال لائبریری کے کتاب دار بھی رہے۔ سنہ 1895ء میں شاستری پریزیڈنسی کالج کے شعبہ سنسکرت کے صدر بنے۔

سنہ 1900ء میں شاستری سنسکرت کالج کے صدر مدرس بن گئے لیکن 1908ء میں انھوں نے سنسکرت کالج چھوڑ کر حکومت کے شعبہ معلومات میں ملازمت کرلی۔ نیز 1921ء سے 1924ء تک وہ ڈھاکہ یونیورسٹی میں بنگالی اور سنسکرت زبانوں کے شعبوں کے صدر رہے۔