جلال الدین محمد اکبر

جلال الدین محمد اکبر
(فارسی میں: جلال‌الدین مُحمَّد اکبر)
معلومات شخصیت
پیدائش	15 اکتوبر 1542ء   عمرکوٹ
وفات	15 اکتوبر 1605ء (63 سال)  فتح پور سیکری
وجہ وفات	پیچش
مدفن	مقبرہ جلال الدین اکبر
طرز وفات	طبعی موت
مذہب	اسلام، دین الٰہی
زوجہ	مریم الزمانی رقیہ سلطان سلیمہ سلطان (1561–)
اولاد	نورالدین جہانگیر ،  مراد مرزا ،  دانیال مرزا ،  آرام بانو بیگم ،  خانم سلطان بیگم ،  شکرالنساء بیگم
والد	نصیر الدین محمد ہمایوں
والدہ	حمیدہ بانو بیگم
بہن/بھائی	بخشی بانو بیگم ،  مرزا محمد حکیم ،  الامان مرزا
خاندان	مغل خاندان
مناصب
مغل بادشاہ (3  )
برسر عہدہ 11 فروری 1556  – 27 اکتوبر 1605
نصیر الدین محمد ہمایوں   نورالدین جہانگیر
دیگر معلومات
پیشہ	شاہی حکمران
مادری زبان	فارسی
پیشہ ورانہ زبان	چغتائی ،  فارسی ،  ہندوستانی

جلال الدین اکبر : سلطنت مغلیہ کے تیسرے فرماں روا (ظہیر الدین محمد بابر اور ہمایوں کے بعد)، ہمایوں کابیٹا تھا۔ ہمایوں نے اپنی جلاوطنی کے زمانے میں سندھ کے تاریخی شہر دادو کے قصبے "پاٹ" کی عورت حمیدہ بانو سے شادی کی تھی۔ اکبر اُسی کے بطن سے 1542ء میں سندھ میں عمر کوٹ کے مقام پر پیدا ہوا۔ ہمایوں کی وفات کے وقت اکبر کی عمر تقریباً چودہ برس تھی اور وہ اس وقت اپنے اتالیق بیرم خان کے ساتھ کوہ شوالک میں سکندر سوری کے تعاقب میں مصروف تھا۔ باپ کی موت کی خبر اسے کلانور ضلع گروداسپور (مشرقی پنجاب) میں ملی۔ بیرم خان نے وہیں اینٹوں کا ایک چبوترا بنوا کر اکبر کی رسم تخت نشینی ادا کی اور خود اس کا سرپرست بنا۔ تخت نشین ہوتے ہی چاروں طرف سے دشمن کھڑے ہو گئے۔ ہیموں بقال کو پانی پت کی دوسری لڑائی میں شکست دی۔ مشرق میں عادل شاہ سوری کو کھدیڑا۔ پھر اس نے اپنی سلطنت کو وسعت دینی شروع کی۔

1556ء میں دہلی، آگرہ، پنجاب پھر گوالیار، اجمیر اور جون پور بیرم خان نے فتح کیے۔ 1562ء میں مالوہ، 1564ء میں گونڈدانہ، 1568ء میں چتوڑ، 1569ء میں رنتھمپور اور النجر، 1572ء میں گجرات، 1576ء میں بنگال، 1585ء میں کابل، کشمیر اور سندھ، 1592ء میں اڑیسہ، 1595ء میں قندہار کا علاقہ، پھر احمد نگر، اسیر گڑھ اور دکن کے دوسرے علاقے فتح ہوئے اور اکبر کی سلطنت بنگال سے افغانستان تک اور کشمیر سے دکن میں دریائے گوداوری تک پھیل گئی۔

اکبر نے نہایت اعلیٰ دماغ پایا تھا۔ ابوالفضل اور فیضی جیسے عالموں کی صحبت نے اس کی ذہنی صلاحیتوں کو مزید جلا بخشی۔ اس نے اس حقیقت کا ادراک کر لیا تھا کہ ایک اقلیت کسی اکثریت پر اس کی مرضی کے بغیر زیادہ عرصے تک حکومت نہیں کر سکتی۔ اس نے ہندوؤں کی تالیف قلوب کی خاطر انہیں زیادہ سے زیادہ مراعات دیں اور ان کے ساتھ ازدواجی رشتے قائم کیے۔ اکبر نے ایک ہندو عورت جودھا بائی سے بھی شادی کی جو اس کے بیٹے جہانگیر کی ماں تھی۔ جودھا بائی نے مرتے دم تک اسلام قبول نہیں کیا تھا۔ نیز دین الہٰی کے نام سے ایک نیا مذہب بھی جاری کیا۔ جو ایک انتہا پسندانہ اقدام تھا اور اکبر کے ہندو رتنوں کی مسلسل کوششوں کا نتیجہ تھا۔ دین الہًی کی وجہ سے اکبر مسلمان امرا اور بزرگان دین کی نظروں میں ایک ناپسندیدہ شخصیت قرار پایا۔ وہ خود ان پڑھ تھا۔ لیکن اس نے دربار میں ایسے لوگ جمع کر لیے تھے جو علم و فن میں نابغہ روزگار تھے۔ انہی کی بدولت اس نے بچاس سال بڑی شان و شوکت سے حکومت کی اور مرنے کے بعد اپنے جانشینوں کے لیے ایک عظیم و مستحکم سلطنت چھوڑ گیا۔

اکبر کا دین الٰہی کافی مقبول ہوا جس کی وجہ اس میں میانہ روی کی موجودگی تھی۔

تعمیرات

پنچ محل ، فتح پور سیکری

اکبر کے نو رتن

شہنشاہ اکبر ِاعظم کے اہم درباریوں میں وہ "نورتن"بھی شامل تھے جن میں سے ہر ایک اپنی جگہ باکمال تھا اور اُن سب کی زندگی کے چند اہم پہلو ہی اُنکی وہ پہچان بنے جس کی وجہ سے آج بھی اُنکا ذکر مختلف شعبوں میں اہم سمجھا جاتا ہے۔ راجا ٹو ڈرمل اور عبد الرحیم خان خاناں کے علاوہ کوئی بھی منصب وزارت پر فائز نہ تھا لیکن یہ سب بادشاہ کے جلوت و خلوت کے شریک اور مشیر کار تھے۔

• ( 1) راجا بیربل
• ( 2) ابو الفضل فیضی
• (3) ابو الفضل علامی
• (4) تان سین
• (5) عبد الرحیم خان خاناں
• (6) راجہ مان سنگھ
• ( 7) ملا دو پیازہ
• (8) راجہ ٹوڈرمل
• (9) مرزا عزیز کوکلتاش

شہنشاہ اکبر کا ترکہ

اکبر نے اپنے ترکہ میں پانچ ہزار ہاتھی، بارہ ہزار گھوڑے، ایک ہزار چیتے، دس کروڑ روپیہ، بڑی اشرفیوں میں سو سو تولہ سے پانچ سو تولہ تک کی ہزار اشرفیاں، دو سو بہتر من غیر مسکوک سونا، تین سو ستر من چاندی، ایک من جواہرات جس کی قیمت تین کروڑ تھی چھوڑا۔

مزید دیکھیے

• اکبر اسکول
• دین الٰہی

حوالہ جات

جلال الدین محمد اکبر خاندان تیموری پیدائش: 14 اکتوبر 1542 وفات: 27 اکتوبر 1605
شاہی القاب
ماقبل  نصیرالدین ہمایوں	مغل شہنشاہ 27 جنوری 1556ء— 27 اکتوبر 1605ء	مابعد  نورالدین جہانگیر