حکم بن عتیبہ

آزاد دائرۃ المعارف، ویکیپیڈیا سے
Jump to navigation Jump to search
حکم بن عتیبہؒ
معلومات شخصیت
کنیت ابو عبداللہ

حکم بن عتیبہؒ تابعین میں سے ہیں ۔

نام ونسب[ترمیم]

حکم نام ابو عبداللہ کنیت،کندہ کے غلام تھے۔

فضل وکمال[ترمیم]

علمی اعتبار سے کوفہ کے ممتاز ترین علماء میں تھے،علامہ ابن سعد لکھتے ہیں: کان الحکم بن عتیبۃ ثقۃ فقیھا عالما وفیعاکثیر الحدیث [1] اکابر علماء ان کے کمالات کے معترف تھے،ابن عیینہ کا بیان ہے کہ کوفہ میں حکم کا مثل نہ تھا، اس عہد کے تمام علماء ان کی دولتِ علم کے سامنے دامنِ احتیاط پھیلاتے تھے،مجاہدین رومی کہتے تھے کہ مجھ کو حکم کے حقیقی کمال کا پورا اندازہ اس وقت ہوتا تھا جب بڑے بڑے علماء مسجد منی میں جمع ہوتے تھے اوروہ سب ان کی دولتِ علم کے دستِ نگر معلوم ہوتے تھے۔ [2]

حدیث[ترمیم]

کوفہ کے ممتاز حفاظِ حدیث میں تھے،حافظ ذہبی انہیں حافظ اور شیخ کوفہ [3] اورعلامہ ابن سعد ثقہ اورکثیر الحدیث لکھتے ہیں [4] حدیث میں انہوں نے صحابہ میں ابو حجیفہؓ ،زید بن ارقمؓ، عبداللہ بن اوفیؓ اور تابعین میں قاضیؓ شریح،قیس ابن ابی حازم،موسیٰ بن طلحہ،یزید بن شریک تیمی،عبداللہ ابن شداد،سعید بن جبیر،مجاہد،عطاء،طاؤس قاسم بن مخیمرہ،مصعب بن سعد، محمد بن کعب قرظی اورابن ابی لیلی وغیرہ سے فیض اٹھایا تھا۔ آپ کے تلامذہ میں،اعمش،منصور،ابو اسحاق سبیعی،ابواسحاق شیبانی،قتادہ،ابان ابن صالح،حجاج بن دینار اوزاعی،مسعر،شعبہ ابوعوانہ جیسے علماء تھے۔ [5]

فقہ[ترمیم]

ابراہیم نخعی ائمہ فقہ میں تھے،حکم ان کے خاص اصحاب میں تھے [6] ان کے فیض صحبت نے ان کو کوفہ کا بہت بڑا فقیہ بنادیا تھا،عبدہ بن ابی لبانہ کہتے تھے کہ میں نے دونوں کناروں کے درمیان حکم سے بڑا فقیہ نہیں دیکھا، لیث بن سلیم کہتے تھے کہ حکم امام شعبی سے بھی بڑے فقیہ تھے۔ [7]

شعبی کی جانشینی[ترمیم]

شعبی کے بعد کوفہ کی مسند علم انہی کے حصہ میں آئی،اسرائیل بیان کرتے ہیں،کہ حکم کو میں نے سب سے پہلے شعبی کی موت کے دن جانا، ان کی موت کے بعد ایک شخص کوئی مسئلہ پوچھنے آیا، لوگوں نے اس سے کہا حکم بن عتیبہ کے پاس جاؤ۔ [8]

عبادت وریاضت[ترمیم]

اس علم کے ساتھ وہ بڑے عبادت گذار بھی تھے،عباس زوزی کا بیان ہے کہ وہ صاحب عبادۃ و فضل تھے،پابندی سنت میں خاص اہتمام تھا۔

عظمت واحترام[ترمیم]

ان کے علمی واخلاقی کمالات کی وجہ سے لوگوں کے دلوں میں ان کی بڑی عظمت تھی،مغیرہ بیان کرتے ہیں کہ جب وہ مدینہ آتے تھے تو لوگ ان کے لیے رسول اللہ ﷺ کا ساریہ خالی کردیتے تھے،اس میں وہ نماز پڑھتے۔ [9]

وفات[ترمیم]

ہشام بن عبدالملک کے عہد خلافت ۱۰۵ھ میں وفات پائی۔ [10]

حوالہ جات[ترمیم]

  1. (ابن سعد،جلد ۱۶۰،ص:۲۳۱)
  2. (ابن سعد:۶/۲۳۱)
  3. (ایضاً:۱/۱۰۴)
  4. (ابن سعد:۶/۲۳۱)
  5. (تہذیب التہذیب:۲/۴۳۳)
  6. (تہذیب التہذیب:۲/۴۳۳)
  7. (تذکرہ الحفاظ:۱/۱۰۴)
  8. (تذکرہ الحفاظ:۱/۱۰۴)
  9. (تذکرہ الحفاظ:۱۰۴)
  10. (ابن سعد:۶/۲۳۱)