اوکاڑا شہر کی تاریخ میں عیسوی سال 1958ء اس لحاظ سے اہمیت کا حامل ہے کہ اس سال اوکاڑا شہر کی عوام کی طویل جدوجہد اور ضلع انتظامیہ و میونسپل کمیٹی حکام کی کاوشوں کی بدولت علاقہ کی دیرینہ خواہش رنگ لائی اور ایم بی ہائی اسکول اوکاڑا (Municipal Board High School, Okara) کو ترقی دے کر کالج کا درجہ دیا گیا۔
کالج کا قیام، ضلع منٹگمری (موجودہ ضلع ساہی وال) کے اس وقت کے ڈپٹی کمشنر (ڈی سی) جناب اسلم فخر دین فاخر ایڈووکیٹ کی کاوشوں کا ثمر ہے۔ اگرچہ کالج کا سنگِ بنیاد مغربی پاکستان کے وزیر بلدیات، جناب مخدوم زادہ سید حسن محمود (مرحوم) نے 30 اگست1958ء کو نصب فرمایا تھا اور باقاعدہ پڑھائی کا آغاز 22 دسمبر1958ء سے ہوا جب کالج کے پہلے پرنسپل جناب عباس اختر شیخ (مرحوم) نے اپنے عہدے کا چارج سنبھالا۔[2]