قمر الدین قادری

امیر شریعت ثالث سید شاہ قمر الدین قادری
امارت شرعیہ بہار و اڑیسہ کے تیسرے امیر شریعت
برسر منصب 17شعبان 1366ھ تا 30 رجب 1376ھ
پیشرو	محی الدین قادری
جانشین	منت اللہ رحمانی
ذاتی
پیدائش	قمر الدین 12 مئی 1895ء پھلواری شریف، ضلع پٹنہ، متحدہ صوبے (1937–50)، برطانوی ہند
وفات	21 جنوری 1957(1957-10-21) (عمر  61 سال) پھلواری شریف، ضلع پٹنہ، بہار، بھارت
مدفن	خانقاہ مجیبیہ سے متصل
مذہب	اسلام
قومیت	ہندوستانی
اولاد	عماد الدین قادری
شہریت	سلطنت مغلیہ برطانوی راج
مدرسہ	خانقاہ مجیبیہ پھلواری شریف مدرسہ حمیدیہ قلعہ گھاٹ دربھنگہ
بنیادی دلچسپی	تصوف، شریعت اسلامی، قضا، حدیث، فقہ
قابل ذکر کام	اشارات الکتب الی اباحۃ ایصالِ الثواب (اردو)
اساتذہ	مولانا عبد العزیز عبد المجید راجوی دربھنگوی مقبول احمد خاں دربھنگوی شاہ محی الدین قادری وغیرہم
مرتبہ
شاگرد شاہ عون احمد قادری

شاہ قمر الدین قادری(1895–1957ء) ایک ہندوستانی سنی قادری، عالم، مصنف، صوفی، تھے، خانقاہ مجیبیہ کے سجادہ نشیں اور امارت شرعیہ پھلواری شریف پٹنہ کے تیسرے امیر شریعت کی حیثیت سے خدمات انجام دیں۔

ولادت

محمد قمر الدین جعفری زینبی بن بدر الدین قادری بن شرف الدین قادری کی ولادت 3/ذی قعدہ 1312ھ مطابق مئی 1895ء میں خانقاہ مجیبیہ پھلواری شریف میں ہوئی۔

ابتدائی تعلیم

انھوں نے ابتدا سے متوسطات تک کی کتابیں شاہ محی الدین قادری اور عبد العزیز امجھری سے پڑھیں۔

تکمیل تعلیم

درسیات کی تکمیل مدرسہ حمیدیہ قلعہ گھاٹ دربھنگہ سے 1339ھ میں کی، یہاں انھوں نے عبد المجید راجوی دربھنگوی اور مقبول احمد خاں دربھنگوی سے درس لیا۔

اجازت و خلافت

تصوف میں تمام سلاسل کی تعلیم و تربیت اپنے والد سید شاہ بدرالدین قادری سے پائی اور انہی سے اجازت و خلافت اور مختلف طرق سے سند حدیث اور مختلف سلاسل میں اجازت بیعت بھی حاصل ہوئی، سید عبد اللہ بن محمد غازی نے قصیدہ بردہ کی اجازت مرحمت فرمائی، سید احمد شریف نوسی نے سلسلہ قادریہ اور تمام سلاسل و مرویات کا تحریری اجازت نامہ عطا کیا تھا، غلام دستگیر نے بھی احادیث کی روایت اور سلاسل کی سند سے سرفراز فرما یا تھا۔

تدریسی خدمات

عرصہ دراز تک دار العلوم مجیبیہ کے مؤقر استاذ کی حیثیت سے درس وتدریس کی خدمات انجام دیتے رہے، علم کے پیاسوں نے خوب سیرابی حاصل کی۔

امارت شرعیہ

امیر شریعت ثانی کی وفات کے بعد یہ امیر شریعت ثالث منتخب ہوئے۔ اجلاس میں امیر شریعت کے لیے منت اللہ رحمانی، سید سلیمان ندوی، سید نور الحسن، شاہ محمد قمر الدین، ریاض احمد اور عبد الصمد رحمانی چار نام پیش ہوئے، دو ناموں کا اضافہ مجلسِ استقبالیہ نے کیا تھا، کوئی اختلاف اور انتشار نہیں ہوا نا ہی کسی نے منصب پانے کی جد و جہد کی، سب خالی الذہن تھے، جو لائق منصب تھا، ان کا پیش ہوا، ان چھ ناموں میں سے کسی ایک کو منتخب کرنے کے لیے انتخابی اجلاس نے ایک نو(9) نفری کمیٹی بنائی، جس نے امیر شریعت ثالث کی حیثیت سے ان کو منتخب کر لیا، اجلاس کی توثیق کے بعد سمع و طاعت کی بیعت لی گئی۔

عملی خدمات

امیر شریعت ثالث کے دس سالہ عہد امارت میں ابتدائی ڈیڑھ ماہ بعد ہی تقسیم ملک کا سانحہ پیش آیا، پورے ملک میں پرتشدد فسادات شروع ہو گئے، صوبہ بہار کے مسلمان بھی نقل مکانی پر مجبور ہوئے، ایسے میں امیر شریعت نے اپنے رفقا کے مشورے سے ملک کے قائدین اور گاندھی جی کو ان حالات سے باخبر کیا اور سرحدی گاندھی اور گاندھی جی کے ساتھ بہت سے سیاسی حضرات نے بہار کے دورے کیے، گاندھی جی نے تو بہار میں کچھ دن قیام بھی کیا، لیکن تب تک بہت کچھ تباہ ہو چکا تھا، امیر شریعت نے اپنے رفقا کے ساتھ علاقوں کے دورے کیے، حوصلہ دلایا، خوف سے باہر نکلنے کی تلقین کی، مآل کار مسلمانوں کے قدم جم گئے، امارت شرعیہ عوام سے جڑنے میں کامیاب رہی اور اہل بہار نے جان لیا کہ امارت شرعیہ ملی، تعلیمی تنظیم کے ساتھ سماجی اور رفاہی کاموں میں دوسری تنظیموں سے کہیں آگے ہے۔

اولاد

ایک لڑکا شاہ عماد الدین قادری اور دو لڑکیاں تھیں۔

وفات

ان کی وفات 19/ جمادی الاخری 1376ھ مطابق 21/جنوری 1957ء کو ہوئی، نماز جنازہ امان اللہ قادری سجادہ نشیں خانقاہ مجیبیہ نے پڑھائی اور خانقاہ مجیبیہ سے متصل باغ مجیبی میں تدفین ہوئی۔

آرام گاہ

شاہ قمر الدین قادری کی آرام گاہ

مزید دیکھیے

• امارت شرعیہ
• ابو المحاسن محمد سجاد
• بدر الدین قادری
• محی الدین قادری
• منت اللہ رحمانی
• ولی رحمانی
• عبد الرحمن دربھنگوی
• قاضی مجاہد الاسلام قاسمی
• سید نظام الدین قاسمی گیاوی