چرک

چرک
(سنسکرت میں: चरक)
چرک کا قلمی خاکہ
معلومات شخصیت
پیدائش	320 ق م قدیم ہند
شہریت	قدیم ہندوستان
عملی زندگی
پیشہ	طبیب ،  استاذ جامعہ ،  مصنف
پیشہ ورانہ زبان	سنسکرت
وجہ شہرت	چرک سنہتا (چرک سنگھتا)
کارہائے نمایاں	چرک سنہتا

چَرَک (سنسکرت: चरक) جنھیں چرک آچاریہ یا مہارشی چرک کے لقب سے موسوم کیا جاتا ہے، برصغیر کے عہدِ قدیم کے ممتاز اور مقتدر اطبا میں شمار کیے جاتے ہیں۔ وہ آیوروید یعنی روایتی ہندوستانی طب کے ان اولین معماروں میں سے تھے جنھوں نے اس نظامِ علاج کو محض دیسی یا دیہاتی تجربات کی سطح سے بلند کرکے ایک منضبط، معیاری اور اصولی علم کی صورت عطا کی۔

چرک کا نام بالخصوص اس عظیم طبی تصنیف چرک سنہتا کی نسبت سے شہرتِ دوام رکھتا ہے۔ یہ تالیف نہ صرف آیوروید کی برہت ترئی (یعنی تین عظیم متون) میں شامل ہے، بلکہ اسے طبِ قدیم کی ایک جامع اور مستند علمی دستاویز بھی تسلیم کیا جاتا ہے۔ اس میں علل و اسبابِ امراض (اتیولوجی)، تشخیص، تدابیرِ علاج، اصولِ حفظانِ صحت، اخلاقِ اطبا اور قواعدِ طبابت پر نہایت دقیق اور مفصل مباحث موجود ہیں۔ علاوہ ازیں علم التشریح، منافع الاعضا (فزیالوجی)، طب اعشاب، جراحی کے مقدماتی مباحث اور طب میں معدنیات و فلزات کے استعمال پر بھی چرک کی تصریحات نہایت بصیرت افروز اور گہرے مطالعے کی آئینہ دار ہیں۔

روایتی طور پر چرک کی زندگی کو چوتھی صدی قبل مسیح سے منسوب کیا جاتا ہے اگرچہ ان کی تاریخِ ولادت و وفات کے تعین میں مورخین کو قطعیت حاصل نہیں۔ اس کے باوجود طبِ مشرق میں چرک کی حیثیت اساسی اور ستون کی سی ہے۔ ان کی تحریریں نہ صرف قدیم ہندوستانی معاشرت کے علمی و فکری رجحانات کی عکاسی کرتی ہیں بلکہ آج بھی متبادل طب کے علمی منہاج میں ان کی افادیت مسلمہ ہے۔

بیرونی روابط

• چرک سنہتا (چرک سنگھتا) از چرک آچاریہ (اردو ترجمہ)، 1923ء