ڈنکن دھرم

صحیفہ	ڈنکا پُران

ڈنکن دھرم، ڈنکوازم یا ڈنکن مت ایک مذہب اور سماجی تحریک ہے جو سماجی نیٹ ورکس پر ابھر کر سامنے آئی اور پھیل گئی۔ یہ تحریک بھارتی ریاست کیرالہ کے چند خود مختار رفاہی اداروں کی طرف سے شروع کی گئی۔اگرچہ اس مذہب کے پیروکاروں کا دعوی ہے کہ یہ ایک حقیقی مذہب ہے، تاہم میڈیا پر اسے ایک مزاحیہ چربہ (parody) مذہب کہا گیا۔

تاریخ

بھارتی اخبار انڈیا ٹوڈے کے مطابق اس مذہب کی بنیاد سنہ 2008ء میں کیرالہ کے ایک اقلیت پسند گروہ نے رکھی جس کا محرک مذہب میں اندھے اعتقاد کا رد تھا۔ اس گروہ نے سیاسی طور پر متحرک ہونے کا فیصلہ کیا۔ ایک دوسرے بھارتی اخبار نیو انڈین ایکسپریس کے مطابق ڈنکن دھرم فیس بک کے ذریعے اپنے پیروکار بڑھا رہا ہے۔ بی بی سی نے سنہ 2016ء میں ڈنکن دھرم کو سوشل میڈیا کے ذریعے پھیلتی ایک ملحدانہ تحریک کہا تھا۔

نوعیت و عقائد

اس دھرم میں کسی کامک کتاب کے ایک کردار ڈنکن کی پوجا پر زور دیا گیا ہے۔ اور ڈنکن دھرم کے پیروکار اس کردار کو ایک سپر ہیرو چوہا کے طور پر سراہتے ہیں۔ ڈنکن کا یہ کردار ایک متروک ملیالم زبان کے بچوں کے میگزین بلمناگولم میں 1983 کو ظاہر ہوا تھا اور اس کہانی میں اسے مذہب کی اندھی تقلید اور خامیوں کی نشان دہی کا دیوتا مانا گیا تھا۔

تقریبات اور احتجاج

ڈنکن دھرم کا نظریہ سوشل میڈیا کے ذریعے پھیلا لیکن تحریک نے کچھ احتجاجی تقریبات کا بھی انعقاد کیا۔ 30 جنوری 2016ء کو ڈنکن دھرم کے پیروکاروں نے مُوشی کا سینا (چوہے کی فوج) کے نام سے معروف اداکار دلیپ کے ریستوران دھی پتو کے باہر، دلیپ کی ایک آنے والی فلم پروفیسر ڈنکن کے خلاف مظاہرہ کیا ان کا کہنا تھا کہ اس فلم سے ان کے مذہبی جذبات مجروح ہوئے ہیں۔ اسی طرح کے مظاہرے دیگر ممالک میں بھی کیے گئے۔

اس سے پہلے ڈنکن دھرم اس وقت خبروں میں آیا جب ایک غیر ملکی ڈنکوئسٹ نے کیلی فورنیا میں ڈنکن دھرم سے اپنی چاہت کے اظہار میں اپنی کار کے لیے جو رجسٹریشن پلیٹ حاصل کی اس پر ڈنکن کھدا ہوا تھا۔ جے دیویکا نے 2016ء میں ڈنکن دھرم کے نظریے پر ایک مقالہ لکھا تھا۔