یہودیوں کی قومی ریاست کا بنیادی قانون

یہودیوں کی قومی ریاست کا بنیادی قانون (عبرانی: חוק יסוד: ישראל - מדינת הלאום של העם היהודי‎) ایک بنیادی قانون ہے جس کی رو سے اسرائیل اب صرف یہودیوں کا ملک ہے۔ قومی ریاست کے اس قانون کو قومیت کا بل بھی کہا جاتا ہے۔ اس بل کے مطابق اب اسرائیل یہود کی قومی ریاست ہے۔ اس قانون کو کنیست میں 55 کے مقابلے 62 ووٹوں کی موافقت سے 19 جولائی 2018ء کو منظور کیا گیا۔ بین الاقوامی سطح پر اس قانون کی زبردست تنقید کی جا رہی ہے، یہاں تک کہ بیرون اسرائیل منتشر یہودی آبادی بھی اس بل سے خوش نہیں ہے۔

قانون سازی کی تاریخ

3 اگست 2011ء کو خارجہ امور اور دفاع کمیٹی کے چیئرمین اوی ڈیچر نے کنیست کے 39 ارکان کے ساتھ مل کر ایک مسودہ قانون پیش کیا تھا جس میں اسرائیل کو یہود کی قومی ریاست قرار دیا گیا اور یہ کہ اسرائیل کا تعین یہود کی قومی ریاست کے طور پر کیا جائے۔ اس بل میں مندرجہ ذیل نکات پیش کیے گئے تھے:

• اسرائیل کا یہود کی قومی سیاست کے طور پر تعین کیا جائے۔
• حق خودارادیت صرف یہود کے لیے خاص ہو۔
• اسرائیل میں نسلی برادری بنائی جائے تا کہ ہر شہری اپنی تہذیب و ثقافت کو اپنا سکے اور عمل کر سکے۔
• عبرانی زبان کو سرکاری زبان بنایا جائے اور عربی زبان کو خصوصی زبان کا درجہ دیا جائے۔
• عبرانی تقویم ریاست اسرائیل کا رسمی کلینڈر ہو۔
• عبرانی قانون اسرائیلی قانون سازوں کی پہلی ترجیح ہو اور تمام قوانین اسی کی روشنی میں بنائے جائیں۔

بنیادی قانون کا متن

بنیادی اصول

اس میں تین اہم بنیادی اصول ہیں:

1. ارض اسرائیل یہود کا تاریخی مادر وطن ہے جہاں ریاست اسرائیل قائم ہے۔
2. ریاست اسرائیل یہود کی قومی ریاست ہے جہاں یہود کی فطری، ثقافتی، مذہبی اور تاریخی حقوق کی پاسداری ہوتی ہے۔
3. ریاست اسرائیل میں حق خودارادیت صرف یہود کے لیے محفوظ ہوں۔

ریاست کی علامت

یہ شق ریاست کا نام ‘‘اسرائیل‘‘ بتاتی ہے اور مندرجہ ذیل ریاست کی علامات کا تعین کرتی ہے:

• اسرائیل کے پرچم کے کناروں پر دو نیلی لکیریں ہوں اور درمیان میں ستارہ داؤدی ہو۔
• ریاست کا ایمبلیم ایسا ہو کہ اس میں سات شاخوں والا ایک مینارہ ہو جس میں زیتون کی پتیاں ہوں اور نیچے اسرائیل لکھا ہو۔
• اسرائیل کا ترانہ باتکوا ہو۔

دار الحکومت

یہ شق وضاحت کرتی ہے کہ "مکمل اور متحد" یروشلم ریاست اسرائیل کا دار الحکومت ہو۔

زبان

اس شق میں درج ہے کہ عبرانی زبان ریاست کی سرکاری زبان ہو جبکہ عربی زبان کو خصوصی زبان کا درجہ دیا جائے۔

مہاجرین کا اجتماع

عالیہ کے تحت آنے والے یہودی مہاجرین کے لیے ریاست کے دروازے کھلے ہیں۔

یہودیوں سے ربط و تعلق

اس شق میں 3 ایسے اصول بیان کیے گئے ہیں جن سے واضح ہوتا ہے کہ ریاست اسرائیل یہودیوں کا خیال رکھتی ہے۔

1. ایک یہود کو یہودیت کے اسرائیل شہری ہونے کی بنا پر کہیں مشکلات کا سامنا نہ کرنا پڑے اور نہ ہی اسے کہیں قید کیا جائے۔
2. یہود کی منتشر آبادیوں میں کام کیا جائے تاکہ ان سے تعلقات استوار ہوں۔
3. بیرون اسرائیل یہود کی آبادیوں میں یہودی تاریخ، یہودی ثقافت اور یہودیت کے تحفظ کے اقدامات کیے جائیں۔

یہودی آبادکاری

اس شق کی رو سے ریاست اسرائیل یہودی آباد کاری کو قومی درجہ دیا جائے اور اس کے لیے سرکاری سطح پر کوششیں کی جائیں۔

سرکاری تقویم

یہ شق عبرانی تقویم کو سرکاری تقویم کا درجہ دیتی ہے اور یہ کہتی ہے کہ عیسوی تقویم عبرانی تقویم کے ساتھ استعمال کی جائے۔ تقویم کے استعمال میں عدالت کی مداخلت ضروری ہے۔

یوم آزادی

اس شق میں یوم آزادی اسرائیل کو سرکاری تعطیل قرار دیا گیا ہے۔

یوم راحت اور سبت

سبت کو سرکاری چھٹی کا دن قرار دیا جائے؛ اس شق میں غیر یہودیوں کو اپنے حساب سے اپنا مذہبی دن منانے کی آزادی ہے۔

امتیازیت

اس شق میں تصریح کی گئی ہے کہ اس مذکورہ بنیادی قانون میں کوئی ترمیم نہیں ہوگی جب تک کنیست کے ارکان کی اکثریت کوئی دوسرا بنیادی قانون متعارف کروائے۔

مزید دیکھیے

• یہودیوں کا وطن
• اسرائیلی قانون شہریت