مائيکل ہسی

آزاد دائرۃ المعارف، ویکیپیڈیا سے
:چھلانگ بطرف رہنمائی، تلاش
مائیکل ہسی

مائیکل ایڈورڈ ہسی (انگریزی: Michael Edward Hussey) (پیدائش: 27 نومبر 1975ء، مورلے، مغربی آسٹریلیا) آسٹریلیا سے تعلق رکھنے والے ایک کرکٹ کھلاڑی ہیں جو بائیں بازو سے بلے بازی کرتے ہیں۔

ہسی ایک روزہ بین الاقوامی اور ٹیسٹ کرکٹ کے عالمی منظر نامے پر ذرا دیر سے جلوہ گر ہوئے اور بالترتیب 28 اور 30 سال کی عمر میں قومی ٹیم کا حصہ بنے۔ ٹیسٹ کیریئر کے آغاز سے قبل آپ فرسٹ کلاس کرکٹ میں 15313 رنز بنا چکے تھے۔ تاہم آپ کا بین الاقوامی کیریئر انتہائی شاندار رہا اور 2006ء میں آپ ایک روزہ بین الاقوامی کرکٹ کی درجہ بندی میں اول درجے پر آئے۔ وہ آسٹریلیا کی مقامی کرکٹ میں ویسٹرن واریئرز کے نائب قائد ہیں اور انگلستان میں تین کاؤنٹی ٹیموں (نارتھمپٹن شائر، گلوسسٹرشائر، ڈرہم) کی جانب سے بھی کھیل چکے ہیں۔ انڈین پریمیئر لیگ میں آپ چنئی سپر کنگز کی نمائندگی کرتے ہیں البتہ 2009ء میں انہوں نے کھیلنے سے معذرت کر لی۔ آپ کرکٹ کی تاریخ کے واحد کھلاڑی ہیں جو ایک بین الاقوامی اور ٹیسٹ دونوں طرز کی کرکٹ میں 50 سے زائد کا اوسط رکھتے ہیں۔

مائیکل ہسی نے 3 نومبر 2005ء کو ویسٹ انڈیز کے خلاف ٹیسٹ کیریئر کا آغاز کیا جبکہ ایک روزہ بین الاقوامی کرکٹ کا آغاز یکم فروری 2004ء کو بھارت کے خلاف کر چکے تھے۔

5 دسمبر 2009ء کے مطابق آپ 44 ٹیسٹ مقابلوں میں 52.31 کی اوسط سے 3453 رنز بنا چکے ہیں جس میں 10 مرتبہ 100 اور 17 مرتبہ 50 یا اس سے زائد رنز بنا چکے ہیں۔ 182 آپ کی طویل ترین انفرادی اننگ ہے۔

126 ایک روزہ بین الاقوامی مقابلوں میں آپ نے 54.07 کی اوسط سے 3623 رنز بنائے ہیں جس میں 2 مرتبہ 100 اور 27 مرتبہ 50 یا اس سے زائد رنز شامل ہیں۔ آپ کی طویل ترین اننگ 109* رنز ہے۔

فرسٹ کلاس میں آپ 227 مقابلوں میں 53.23 کی اوسط سے 19378 رنز بنا چکے ہیں جس میں 51 مرتبہ 100 یا اس سے زائد اور 88 مرتبہ 50 یا اس سے زائد کی اننگز شامل ہیں۔ 331* آپ کی طویل ترین انفرادی اننگ ہے۔

ٹیسٹ اور ایک روزہ دونوں کرکٹ میں آپ گیند بازی کے ذریعے 2،2 وکٹیں بھی حاصل کر چکے ہیں جبکہ فرسٹ کلاس میں آپ کی وکٹوں کی تعداد 22 ہے۔

فیلڈنگ میں بھی آپ اپنی کارکردگی کا بھرپور مظاہرہ کرتے رہے ہیں اور ٹیسٹ میں 39، ایک روزہ میں 73 اور فرسٹ کلاس میں 244 کیچ پکڑ چکے ہیں۔