راغب اصفہانی

علامہ راغب اصفہانی مشہور فقیہ، مفسر اور لغوی ہیں۔

نام

ان کا پورا نام ابو القاسم حسین بن محمد بن مفضل بن محمد ہے اصفہان میں پیدا ہوئےجس کی نسبت سے امام راغب اصفہانی کے نام سے مشہور ہیں۔

حالات زندگی

جن کی زندگی کے مفصل حالات معلوم نہیں۔ زندگی کا بیشتر حصہ بغداد اور اصفہان میں گزارا اور قیمتی تصانیف چھوڑیں جن میں ۔ ایک رسالہ میں فوائد القرآن لکھے جو اب نایاب ہے، کہتے ہیں علامہ زمخشری صاحب تفسیر کشاف نے اس سے بہت استفادہ کیا۔ امام راغب علم و فضل میں یگانۂ روزگار تھے، مؤلفِ جامع علوم و فنون ہونے کے ساتھ بلند پایہ صوفی بھی تھے، اور ادب و فلسفہ ، جملہ علوم میں ان کا پایہ بہت بلند تھا اور انہوں نے قرآن پاک کی ایک بہت بڑی تفسیر بھی لکھی ہے۔

اکابرین کی نظر میں

علامہ ذہبی نے ان کا تذکرہ “ طبقات المفسرین ” میں کیا ہے اور امام سیوطی ان کو لغت و نحو کے ائمہ میں شمار کرتے ہیں، مختلف تذکروں میں حکیم، ادیب ، مفسر، کی حیثیت سے ان کا تعارف کروایا ہے جس سے اندازہ ہوتا ہے کہ موصوف ہمہ فنی امام تھے اور بیک تفسیر و لغت کے امام ہونے کے ساتھ بہت بڑے حکیم اور صوفی تھے۔

تالیفات

امام راغب کی تالیفات مندرجہ ذیل ہیں :

• 1 ۔ محاضرات الادباء
• 2 ۔ حل متشابہات القرآن
• 3 ۔ المفردات فی غریب القرآن
• 4 ۔ الذریعہ الی مکارم الشریعہ
• 5 ۔ درۃ التاویل فی غرۃ التنزیل
• 6 ۔ تحقیق البیان فی تاویل القرآن
• 7 ۔ افانین البلاغۃ۔
• 8 ۔ کتاب الایمان والکفر
• 9 ۔ تفصیل النشاتین
• 10 ۔ کتاب احتجاج القراء۔
• 11 ۔ کتاب المعانی الاکبر

وفات

امام راغب کی وفات 502ھ - 1108ء بغداد میں ہوئی۔