پولیساریو فرنٹ

پولیساریو محاذ، فرنٹ پولیساریو، فریلیساریو یا صرف پولیساریو ( ہسپانوی: Frente Popular de Liberación de Saguía el Hamra y Río de Oro ؛ عربی: الجبهة الشعبية لتحرير الساقية الحمراء ووادي الذهب )، ایک باغی صحراوی قوم پرست آزادی کی تحریک ہے جو مغربی صحارا کی خود مختاری کا دعویٰ کرتی ہے۔

اس کی ابتدا صحراوی قوم پرست تنظیم جسے موومنٹ فار لبریشن آف ساگویا الحمرا اور وادی الذہاب کہا جاتا ہے، سے ہوئی۔ پولیساریو فرنٹ کا باقاعدہ قیام 1973ء میں ہسپانوی قبضے کے خلاف مسلح جدوجہد شروع کرنے کے ارادے سے کیا گیا تھا جو سنہ 1975ء تک جاری رہی، یہاں تک کہ اسپین نے اسے موریطانیہ اور مراکش کے درمیان تقسیم کرنے کا فیصلہ کیا۔ پولیساریو فرنٹ نے دونوں ممالک فوجوں کو بھگانے کے لیے جنگ چھیڑ دی۔ اس نے موریطانیہ کو سنہ 1979ء میں مغربی صحارا پر اپنا دعویٰ ترک کرنے پر مجبور کیا اور 1991 کی جنگ بندی اور اقوام متحدہ کی طرف حمایت سے ریفرنڈم کے انعقاد تک، جو اس کے بعد سے مسلسل ملتوی ہے، مراکش کے خلاف اپنی فوجی مہم جاری رکھی۔ سنہ 2020ء میں پولساریو فرنٹ نے جنگ بندی ختم کرنے کا اعلان کیا اور مسلح تصادم دوبارہ شروع کیا۔

اقوام متحدہ پولساریو فرنٹ کو صحراوی عوام کا جائز نمائندہ سمجھتی ہے اور اس بات کو برقرار رکھتی ہے کہ صحرائیوں کو خود ارادیت کا حق حاصل ہے۔ مراکش کے زیر کنٹرول مغربی صحارا کے کچھ حصوں میں پولیساریو فرنٹ کو غیر قانونی قرار دیا گیا ہے اور وہاں اپنی پارٹی کا جھنڈا (جسے اکثر صحراوی پرچم کہا جاتا ہے) اٹھانا غیر قانونی ہے۔ یہ سوشلسٹ انٹرنیشنل کا مشاورتی رکن ہے۔