کوکسو پویلین

کوکسو پویلین ( ترکی زبان: Küçüksu Kasrı ) ایک چھوٹا سا محل ہے جو باسفورس کے ایشیائی کنارے پر تعمیر کیا گیا تھا۔ اب یہ فاتح سلطان محمد پل کے قریب واقع ہے۔ اس محل کو عثمانی سلاطین گھومنے پھرنے اور شکار کے دوران مختصر قیام کے لیے استعمال کیا کرتے تھے۔

تاریخ

یہ پویلین سلطان عبدلمجید اول کے حکم سے تعمیر کیا گیا اور1857 میں اس کی تکمیل ہوئی ۔ یہ محمود اول (1696-1754) کے دور میں تعمیر کیے جانے والے ایک دو منزلہ لکڑی والے محل کی جگہ تعمیر کیا گیا تھا جسے ان کے وزیر اعظم محمود پاشا نے تعمیر کروایا تھا۔ اس لکڑی والے محل کو سلطان سلیم ثالث (1761–1808) اور سلطان محمود ثانی (1785–1839) استعمال کرتے رہے تھے۔

یہ عمارت دو اہم منزلوں اور ایک تہ خانے پر مشتمل ہے۔ اونچی دیواروں والے دیگر پویلین باغوں کے برعکس؛ اس کے باغ کے چاروں طرف لوہے کی ریلنگ ہے اور ایک دروازہ ہے۔اس کے تہ خانے میں باورچی خانے اور نوکروں کے کوارٹرز ہیں، جس کے فرش روایتی ترک مکان کے ڈیزائن کی عکاسی کرتی ہیں۔ ایک مرکزی ہال کے آس پاس چار کونے والے کمرے تھے۔