خاندانہائے زبان

خاندانہائے زبان (Language Families) سے مراد زبانوں کی ایک ایسی درجہ بندی ہے جس میں ایک گروہ میں شامل زبانیں عموماً ایک مشترک زبان سے نمودار ہوئی ہوں۔ مگر بے انتہا تحقیق کے باوجود زبانوں کی درجہ بندی میں اختلافات ہیں اس لیے کسی درجہ بندی کو حتمی نہیں سمجھا جاسکتا۔

زبانوں کی خاندان بندی

ان درجہ بندیوں کے لیے مختلف زبانوں کی مشترک خصوصیات کی بناء پر اندازہ لگایا جاتا ہے کہ کسی زبان کی پیدائش و ترقی کس قدیم زبان سے ہوئی ہے۔ اس کے علاوہ اکثر زبانیں ایسی زبانوں کے اختلاط سے وجود میں آتی ہیں جو خود ایک خاندان یا گروہ سے تعلق نہیں رکھتیں۔ یہی وجہ ہے کہ زبانوں کی درجہ بندی بے انتہا مشکل ہے۔ یہاں جو خاندانہائے زبان پیش کیے جا رہے ہیں ان کی بنیاد ایتھنولوگ (Ethnologue) خاندان بندی پر رکھی گئی ہے۔ ایتھنولوگ خاندان بندی میں قدیم امریکی زبانوں کو علیحدہ علیحدہ خاندانوں میں رکھا گیا ہے مگر اس مضمون میں قدیم امریکی زبانوں (Amerind) کو ایک ہی خاندان میں دکھایا جائے گا مگر قدیم امریکی زبانوں کی یہ خاندان بندی اس بنیاد پر نہیں ہے کہ وہ ایک مشترک قدیم زبان سے نکلے ہیں بلکہ یہ صرف آسانی کے لیے کیا گیا ہے۔ قدیم امریکی زبانوں میں جو مختلف خاندانہائے زبان شامل ہیں انہیں تفصیل سے اس کے متعلقہ مضمون میں دیکھا جاسکتا ہے۔

فہرست خاندانہائے زبان

کل 7313 زبانوں کی خاندان بندی درج ذیل ہے۔ یہ تعداد ان زبانوں کی ہے جو ایتھنولوگ خاندان بندی میں شامل ہیں اور اس کے علاوہ کچھ ناپید زبانیں بھی شامل ہیں۔ اردو حروف کے لحاظ سے ترتیب دینے کے لیے نمبر شمار کے حساب سے ترتیب دیں۔ اگر بولے جانے والے افراد کے حساب سے ترتیب دیں تو آخر میں دس زبانیں ہوں گی جن کو آج دنیا کی ننانوے فی صد آبادی بولتی ہے۔

خاندانہائے زبان

شمار	خاندانِ زبان	انگریزی نام	زبانوں کی تعداد (ایتھنولوگ)	بولنے والوں کی تعداد کے حساب سے درجہ بندی
1	جنوبی ایشیائی زبانیں	Austro-Asiatic languages	169	9
2	جنوبی جزائری زبانیں	Austronesian languages	1268	5
3	آسٹریلوی زبانیں	Australian languages	263	-
4	اسکیمو۔الیوت زبانیں	Eskimo-Aleut languages	11	-
5	اشاراتی زبانیں	Sign language	3	-
6	افرو۔ایشیائی زبانیں	Afro-Asiatic languages	375	4
7	الطائی زبانیں	Altaic languages	66	7
8	انڈیمانی زبانیں	Andamanese	13	-
9	اورالی زبانیں	Uralic languages	39	10
10	باسک زبانیں	Basque languages	3	-
11	پاپوائی زبانیں	Papuan languages	840	-
12	پٹکیرن زبانیں	Cant languages	1	-
13	جاپانی زبانیں	Japanese languages	12	-
14	جدا زبانیں	Isolate languages	40	-
15	جوکاغیری زبانیں	Yukaghir Languages	2	-
16	چکوچی۔کمچاتکی زبانیں	Chukotko-Kamchatkan languages	5	-
17	چینی۔تبتی زبانیں	Sino-Tibetan Languages	403	2
18	خواسان زبانیں	Khoisan languages	27	-
19	خود ساختہ زبانیں	Artificial language	3	-
20	ڈراویدی زبانیں	Dravidian languages	73	6
21	رطانہ زبانیں	Pidgin languages	18	-
22	شمالی کاکیشیائی زبانیں	North Caucasian languages	34	-
23	طرشی اشاراتی زبانیں	Deaf sign language	121	-
24	غیر درجہ بند زبانیں	Unclassified languages	78	-
25	قدیم امریکی زبانیں†	Amerind languages	993	-
26	کادائی زبانیں	Tai-Kadai languages	76	8
27	کارتویلی زبانیں	Kartvelian languages	5	-
28	کریول زبانیں	Creole languages	86	-
29	مخلوط زبانیں	Mixed languages	21	-
30	مونگمیائی زبانیں	Hmong-Mien Languages	35	-
31	نائجر۔کانگو زبانیں	Niger-Congo languages	1514	3
32	نادینی زبانیں	Na-Dene languages	47	-
33	نیل۔صحرائی زبانیں	Nilo-Saharan languages	204	-
34	ہند۔یورپی زبانیں	Indo-European languages	463	1
35	یانیسائی زبانیں	Yeniseian Languages	2	-

†قدیم امریکی زبانوں کو یہاں جوزف گرینبرگ کی تحقیق کے نتیجے میں پیش کیا گیا ہے جو بہت تنقید کا نشانہ بنی ہے۔ اصل میں حقیقی امریکی لوگوں کی زبانوں کو ہزاروں زبانوں میں تقسیم کیا جاتا ہے۔ جوزف گرینبرگ نے ان قدیم زبانوں میں سے اسکیمو۔الیوت زبانوں اور نادینی زبانوں کے علاوہ باقی تمام کو قدیم امریکی زبانوں (Amerind) کہا ہے۔ جس سے دوسرے محققین متفق نہیں۔ اس لیے یہاں اگرچہ ہم قدیم امریکی زبانوں کو یہاں برقرار رکھتے ہیں مگر یاد رہے کہ یہ ایک خاندان نہیں بلکہ بے شمار خاندانوں کی ایک درجہ بندی ہے جس کی تفصیل آپ قدیم امریکی زبانوں میں دیکھ سکتے ہیں۔

مزید دیکھیں

• زبان
• لسانیات

بیرونی روابط

• زبانوں کی ایتھنولوگ خاندان بندی