محمد بلیغ الرحمان

محمد بلیغ الرحمان
(انگریزی میں: Muhammad Baligh Ur Rehman)
مدت منصب 1 جون 2013ء – 31 مئی 2018ء
معلومات شخصیت
پیدائش	21 دسمبر 1970ء (54 سال)  ضلع بہاولپور
شہریت	پاکستان
جماعت	پاکستان مسلم لیگ (ن)
عملی زندگی
مادر علمی	جامعہ پنسلوانیا
پیشہ	سیاست دان
مادری زبان	اردو
پیشہ ورانہ زبان	اردو

محمد بلیغ الرحمن پاکستانی سیاست دان ہیں۔ وہ قومی اسمبلی کے رکن بھی رہے۔ اس وقت وہ صوبہ پنجاب کے گورنر تعینات کیے گئے ہیں۔

پیدائش

محمد بلیغ الرحمن 21 دسمبر 1969ء کو بہاولپور میں پیدا ہوئے،

خاندان

ان کا خاندان بہاولپور کے متمول اور قدیم خاندانوں میں سے ایک ہے۔ ان کے والد عقیل الرحمن نے 1985ء میں سیاست کا آغاز کیا۔ بعد ازاں وہ نواز شریف کے قریب ترین ساتھیوں میں شمار ہونے لگے۔

1997ء کے عام انتخابات میں نواز شریف نے حاصل پور کی سیٹ پر دو بڑے سیاسی ناموں ریاض پیرزادہ اور تسنیم گردیزی کی جگہ عقیل الرحمن کو بلا مقابلہ ممبر قومی اسمبلی منتخب کروایا۔

تعلیم

پرائمری تک تعلیم کانونٹ سکول بہاولپور سے حاصل کی جس کے بعد صادق پبلک سکول میں داخل ہوئے، بعد ازاں او لیول کیمبرج یونیورسٹی سے پاس کیا اور گولڈ میڈل بھی حاصل کیا، امریکا کی یونیورسٹی آف پنسلوینیا سے الیکٹریکل انجینئرنگ میں گریجویشن کی۔

عملی زندگی

وہ آٹو موبائلز کے کاروبار سے وابستہ ہیں، جبکہ ان پر غیر قانونی زمین کی الاٹمنٹ کا کیس بھی چل رہا ہے۔

سیاسی زندگی

محمد بلیغ الرحمن کا مسلم لیگ ن سے گہرا تعلق رہا ہے، 2008ء میں وہ این اے 185 بہاولپور سے رکن قومی اسمبلی منتخب ہوئے، 2008ء سے 2013ء تک شہباز شریف کی وزارت اعلیٰ کے دور میں ان کے معاون خصوصی رہے۔

محمد بلیغ الرحمن دوسری بار 2013ء میں بھی ن لیگ کے ٹکٹ پر ایم این اے بنے، انھوں نے پاکستان عام انتخابات، 2013ء میں پنجاب کے حلقہ این اے۔185 (NA-185 (Bahawalpur-III))میں پاکستان مسلم لیگ (ن) سے انتخاب میں حصہ لیا اور کامیابی حاصل کی۔ سابق وزیر اعظم نوازشریف کی کابینہ میں وزیرمملکت برائے وفاقی تعلیم اور پروفیشنل ٹریننگ رہے، نومبر 2013ء میں انھیں وزیر مملکت برائے داخلہ اور اینٹی نارکوٹکس کا اضافی چارج دیا گیا،

2017ء میں نواز شریف کی کابینہ ختم ہونے کے بعد بلیغ الرحمان سابق وزیر اعظم شاہد خاقان عباسی کی کابینہ کا حصہ بنے، بلیغ الرحمان کو وفاقی وزیر تعلیم اور ٹریننگ بنایا گیا۔

بلیغ الرحمن مسلم لیگ ن کے ڈپٹی سیکرٹری جنرل کے طور پر بھی خدمات سر انجام دے رہے ہیں۔

گورنر پنجاب

صدر مملکت ڈاکٹر عارف علوی نے محمد بلیغ الرحمن کی بطور گورنر پنجاب تعیناتی کی منظوری آئین کے آرٹیکل 101 (1) کے تحت 30 مئی 2022ء کو دی،

گورنر پنجاب محمد بلیغ الرحمن نے گورنر ہاؤس لاہور میں 30 مئی 2022ء کو عہدے کا حلف اٹھا لیا۔

چیف جسٹس لاہور ہائیکورٹ محمد امیر بھٹی نے بلیغ الرحمان سے عہدے کا حلف لیا جبکہ چیف سیکرٹری پنجاب نے تقرری سے متعلق نوٹیفکیشن پڑھ کر سنایا۔