ادیب پشاوری

ادیب پشاوری
(فارسی میں: احمد ادیب پیشاوری)
معلومات شخصیت
پیدائشی نام	(فارسی میں: احمد بن شهاب‌الدین رضوی پیشاوری)
پیدائش	سنہ 1844ء   پشاور
وفات	30 جون 1930ء (85–86 سال)  تہران
رہائش	غزنی کابل مشہد سبزوار تہران
شہریت	برطانوی ہند سکھ سلطنت قاجار خاندان
خاندان	ایرانی سادات
عملی زندگی
پیشہ	شاعر ،  ادیب ،  فلسفی
پیشہ ورانہ زبان	فارسی ،  عربی
باب ادب

ادیب پشاوری پاکستان کے ایک فارسی زبان شاعر تھے جن کا اصل نام سید احمد بن شہاب الدین رضوی تھا۔ وہ موجودہ خیبر پختونخوا کے شہر پشاور کے نزدیک سنہ 1844ء میں پیدا ہوئے اور اُن کے مطابق وہ مشہور صوفی بزرگ شہاب الدین عمر سہروردی (متوفی 1234ء) کی نسل میں سے تھے۔

ذاتی حالات

نوجوانی کے دوران میں ان کے والد اور متعدد رشتے دار برطانویوں اور افغان قبائل کے مابین ہونے والی سرحدی جھڑپوں میں مارے گئے۔ نتیجتاً، ادیب پہلے کابل اور پھر غزنی منتقل ہوئے جہاں انھوں نے ابتدائی تعلیم مکمل کی۔ 1877ء میں وہ ایران ہجرت کر گئے جہاں انھوں نے سبزوار میں واقع حاجی ملا ہادی سبزواری کے مدرسے میں شمولیت اختیار کی اور وہاں وہ فلسفے کے دروس میں حاضر ہوئے۔ بالآخر وہ تہران میں مقیم ہو گئے جہاں وہ اپنی وفات تک رہے۔

شاعری

ادیب کی شاعرانہ تخلیق کم و بیش بیس ہزار اشعار پر مشتمل ہے۔ ان کی وفات کے تین سال بعد شائع ہونے والے انتخابِ کلام میں، جو زیادہ تر غزلوں اور قصیدوں پر مشتمل تھا، 4200 فارسی اور 370 عربی اشعار شامل ہیں۔ انھوں نے قیصرنامہ کے نام سے ایک طویل مثنوی بھی لکھی۔ اسے المانیہ کے بادشاہ قیصر ولہلم ثانی کے نام معنون کیا گیا ہے اور اس میں جنگِ عظیم اول میں المانیہ کے کردار کو سراہا گیا ہے۔ اگرچہ ادیب کا تعلق شعرا کی پرانی نسل سے تھا، لیکن انھوں نے اپنی شاعری میں کچھ جوان ہم عصروں کی طرح نئے معاشرتی و سیاسی خیالات کا اظہار کیا۔ اس طرح انھوں نے فارسی شاعری میں وطن پرور رجحانات لانے میں پیش قدمی کی۔ ان کی ادبی اہمیت ایک پیش رَو کے طور پر ہے، کیونکہ ان کے شاعری میں ایسے رجحانات کا ابتدائی خاکہ نظر آتا ہے جو بعد میں ایران کے آئینی انقلاب کے دور میں نمایاں ہو گئے تھے۔

آخری ایام

ادیب نے اپنی زندگی کے آخری سال خاقانی شروانی، ناصر خسرو، سنائی غزنوی اور مثنویِ معنوی کے مطالعے اور تحقیق میں صرف کیے تھے۔ انھوں نے وفات سے پہلے ارادہ کیا تھا کہ وہ ابنِ سینا کی فلسفیانہ کتاب 'اشارات و تنبیہات' کو فارسی میں منتقل کریں گے، لیکن زندگی نے کتاب کے اتمام تک وفا نہ کی۔ بالآخر 30 جون 1930ء کو وہ انتقال کر گئے۔

حوالہ جات

انسائیکلوپیڈیا ایرانیکا

بیرونی روابط

• ادیب پشاوری کا قصائد اور غزلیات پر مشتمل دیوان