ابو سعید میرزا

آزاد دائرۃ المعارف، ویکیپیڈیا سے
:چھلانگ بطرف رہنمائی، تلاش
ابو سعید میرزا
Abū Saʿīd Mirza
میرزا (شاہی لقب)
بادشاہ
Sultan Abu Said Mirza.jpg
سلطان ابو سعید میرزا
عہد حکومت سمرقند: 1451–1469
ہرات: 1459–1469
اولاد سلطان احمد مرزا
سلطان محمود مرزا
عمر شیخ مرزا
دیگر
خاندان خاندان تیموری

ابو سعید میرزا بن محمد بن میران شاہ بن تیمور (1424ء تا 1469ء) تیموری سلطنت کے ایک حکمران تھے جو موجودہ قازقستان، ازبکستان، ایران اور افغانستان پر مشتمل تھی۔ ابو سعید امیر تیمور کا پڑ پوتا، میران شاہ کا پوتا اور الغ بیگ کا بھتیجا تھا۔ وہ وادئ فرغانہ کے حاکم عمر شیخ مرزا کا والد اور ہندوستان کی سلطنت مغلیہ کے بانی ظہیر الدین بابر کا دادا تھا۔ ابتدا میں ابو سعید نے فوجی لشکر تشکیل دیا لیکن سمرقند و بخارا میں قدم جمانے میں ناکام ہوا اور بالآخر یاسی میں اپنا اڈہ قائم کیا۔ 1450ء تک ترکستان کا بیشتر علاقہ فتح کر لیا۔ 1451ء میں اس نے ابو الخیر خان کی زیر قیادت ازبک کی مدد سے سمرقند پر بھی قبضہ کر لیا اس طرح تیموری سلطنت کا تمام مشرقی حصہ اس کے زیر نگیں آ گیا۔ اس نے 1458ء میں فتح ہرات کے ساتھ ثابت کر دیا کہ وہ وسط ایشیا میں سب سے طاقتور تیموری شہزادہ ہے۔ 1459ء میں اس نے تین تیموری شہزادوں کی افواج کو ایک جنگ میں شکست دی اور 1461ء تک مشرقی ایران اور افغانستان کا بیشتر حصہ حاصل کر لیا۔ 1469ء میں آذربائیجان کے پہاڑوں میں آق قویونلو ترکمانوں کے خلاف ایک مہم کے دوران وہ گرفتار ہو گیا اور اوزون حسن کے ہاتھوں مار دیا گیا۔ ابو سعید صوفیوں سے خاص عقیدت رکھتا تھا اور نقشبندی سلسلے کے شیخ خواجہ عبید اللہ احرار سے بہت قریبی تعلق رکھتا تھا۔