ایلس فیض

آزاد دائرۃ المعارف، ویکیپیڈیا سے
:چھلانگ بطرف رہنمائی، تلاش
ایلس فیض

پیدائش: 22 ستمبر 1914ء

انتقال: 12 مارچ 2003ء


ابتدائی زندگی[ترمیم]

شاعرہ۔ دانشور ۔ اور سوشل ورکر۔ مشہور شاعر فیض احمد فیض کی اہلیہ۔برطانیہ میں پیدا ہوئیں۔ بیگم ایلس فیض جن کا پیدائشی نام ایلس جارج تھا اردو کے شہرہ آفاق اردو شاعر فیض احمد فیض سے اس وقت متعارف ہوئی تھیں جب وہ ایم اے او کالج امرتسر میں پیشہ تدریس سے وابستہ تھے۔


فیض سے ابتدائی ملاقات[ترمیم]

ملاقات کی ابتدائی صورت ایلس کی بہن کی بدولت پیدا ہوئی جو فیض کے دوست اور رفیق کار ڈاکٹر ایم ڈی تاثیر کی بیوی تھیں۔ ماہ وسال کی آشنائی کا یہی زمانہ ہے جس کا ذکر فیض نے دوستوں کے ساتھ بعد میں بھی بارہا کیا۔ ایلس اور فیض کی شادی انیس سو تیس کے عشرے کے آخر میں سری نگر میں ہوئی جہاں ان کے نکاح خواں ممتاز کشمیر رہنما شیخ عبداللہ تھے۔


آزمائش کی زندگی[ترمیم]

انیس سو بیالیس میں فوج سے فیض کی وابستگی، کرنل کے عہدے تک ترقی اور پھر روزنامہ پاکستان ٹائمز کی ادارت تک ان کی ازدواجی زندگی پر سکون رہی لیکن اس زندگی میں ایک بہت بڑاتموج اس وقت رونما ہوا جب انیس سو گیارہ کے موسم بہار میں راولپنڈی سازش کیس کے نام سے پاکستان فوج کے بعض اہم افسروں اور دیگر شہریوں کو جن میں فیض بھی شامل تھے حراست میں لیا گیا۔

صحافتی زندگی[ترمیم]

یہ مرحلہ ایلس فیض کی زندگی کی سب سے بڑی آزمائش تھی۔ گھر کا نظام چلانا اور اس کے لئے مالی وسائل کا بندوبست کرنا ان کی ذمہ داری میں شامل تھا۔ ایلس نے اس زمانے میں پاکستان ٹائمز سے وابستگی اختیار کی اور یوں ان کے پڑھنے والوں کو ان کی تحریری اور ادارتی صلاحیتوں سے آگاہ ہونے کا موقع ملا۔ چار سال سے زائد قید کے اس عرصے میں فیض کے نام ایلس کے خطوط’ڈئیر ہارٹ‘ کے نام سے شائع ہو چکے ہیں۔ فیض کے خطوط کا مجموعۂ ہے ’صلیبیں میرے دریچے میں‘۔

بعد کے عرصے میں بھی ایلس فیض سیاسی اور سماجی موضوعات پر کئی اخبارات اور جرائد کے لئے مسلسل لکھتی رہیں جن میں انیس سو ستّر کی دہائی میں جریدہ ’ویو پوائنٹ‘ خاص طور پر قابل ذکر ہے کیونکہ جرنل ضیا کے مارشل لاء کے دوران اس کی حیثیت رائے عامہ کے ایک بےخوف ترجمان کی تھی۔

سماجی خدمات[ترمیم]

ایلس نے معذور بچوں کی صحت و تعلیم اور سماجی زندگی کے دیگر شعبوں میں بھی نمایاں خدمات انجام دیں اور ہیومن رائٹس کمیشن آف پاکستان کی بانی رکن کے طور پر اہم کردار ادا کیا۔

فیض سے ایلس کا تعلق رشتۂ ازدواج کے ساتھ ساتھ فکری اور ذہنی اشتراک عمل کا بھی تھا۔