ہنری میئرس ایلیٹ

ہنری میئرس ایلیٹ
(انگریزی میں: Henry Miers Elliot)
معلومات شخصیت
پیدائش	1 مارچ 1808ء  ویسٹ منسٹر،  لندن،  متحدہ مملکت برطانیہ عظمی و آئر لینڈ
وفات	20 دسمبر 1853ء (45 سال)  راس امید
شہریت	متحدہ مملکت برطانیہ عظمی و آئر لینڈ
والد	جان ایلیٹ
عملی زندگی
مادر علمی	ونچسٹر کالج نیو کالج، اوکسفرڈ
پیشہ	مورخ،  نوآبادیاتی منتظم،  مصنف
پیشہ ورانہ زبان	انگریزی
باب ادب

سر ہنری میئرس ایلیٹ (انگریزی: Henry Miers Elliot) ہندوستان میں تعینات برطانوی سول سرونٹ، مستشرق، ہندوستانی تاریخ کے ماہر تھے۔ وہ یکم مارچ 1808ء میں ویسٹ منسٹر، لندن، مملکت متحدہ میں پیدا ہوئے۔ وہ جان ایلیٹ کے پندرہ بچوں میں سے تیسرے نمبر کی اولاد تھے۔ ابتدائی تعلیم ونچسٹر اور اعلیٰ تعلیم نیو کالج، اوکسفرڈ سے حاصل کی۔ پھر مقابلے کا امتحان پاس کر کے انڈین سول سروس میں شامل ہو گئے۔ انھوں نے اپنے ابتدائی کیریئر میں بریلی اور مرشد آبادکے کلیکٹر، دہلی کے پولیٹکل ایجنٹ کے اسسٹنٹ کے طور پر خدمات انجام دیں۔ اس کے بعد ان کی تعیناتی شمال مغربی سرحدی صوبہ (موجودہ صوبہ خیبر پختونخوا ہو گئی۔ یہاں انھوں نے مختلف محکموں میں خدمات سر انجام دیں۔ دورانِ ملازمت مطالعہ سے اپنے علم میں اضافہ کرتے رہے۔ ایلیٹ نے لاتعداد تحقیقی مضامین اور کتابیں تحریر کیں۔ 1845ء میں انھوں نے انڈین جوڈیشل اور روینیو اصطلاحات کی لغت تیار کی۔ان کتاب Biographical Index to the Historian of Muhammadan India ان کی سب سے اہم کتاب ہے۔ اس میں ایلیٹ نے 231 عربی اور فارسی مورخین کی کتابوں کا تنقیدی جائزہ لیا ہے جن میں ہندوستان کی تاریخ پر مواد شامل ہے۔ اس کتاب کی پہلی جلد ان کی حیات میں 1849ء میں کلکتہ سے شائع ہوئی۔ ان کی ہندوستان کی تاریخ پر مشتمل تحریروں کوجان ڈائوسن نے آٹھ جلدوں میں History of India As Told by its Historian (ہندوستان کی تاریخ، اس کے اپنے مؤرخین کی زبانی—محمدی دور) کے نام سے سے ترتیب دے کر 1866ء سے 1877ء کے درمیان میں شائع کرائیں۔ یہ کتاب آج ہندوستان بشمول سندھ اسلامی تاریخ کے سلسلے میں اہم کتاب سمجھی جاتی ہے۔ بعد کے مورخین اس کتاب کے حوالے اپنی کتابوں میں بطور مآخذ درج کرتے آ رہے ہیں۔

وفات

سر ہنری میئرس ایلیٹ 20 دسمبر 1853ء کو پنتالیس برس کی عمر میں راس امید، موجودہ جنوبی افریقہ میں وفات پا گئے۔