خط کوفی

آزاد دائرۃ المعارف، ویکیپیڈیا سے
:چھلانگ بطرف رہنمائی، تلاش
خط کوفی Fry's Pantographia (1799)

خط کوفی ایک قدیم عربی رسم الخط ہے جو آغاز اسلام کے دور میں عراق کے شہر کوفہ میں پروان چڑھا۔ خط کوفی دراصل خط نبطی، خط سطرنجیلی، خط حمیری اور خط حیرہ کی آمیزش اور ترقی یافتہ صورت تھی۔ [1] دوسرے مقامات کے علاوہ یہ خط حجاز اور حیرہ (کوفہ کا پرانا نام) میں بھی لکھا جاتا تھا۔ حرب ابن امیہ اِسے حیرہ سے سیکھ کر آئے اور جزیرۃ العرب میں پھیلایا۔

آغاز[ترمیم]

حضور پاک صلی اللہ علیہ وسلم کی بعثت کے وقت حجازِ مقدس میں عام طور سے خطِ کوفی ہی رائج تھا۔ آپ صلی اللہ علیہ وسلم نے مختلف بادشاہوں اور سرداروں کو جو خطوط لکھوائے وہ خطِ حمیری اور خطِ حیرہ کی اِسی محتاط روش یعنی خطِ کوفی میں لکھے گئے تھے۔ ابتداءً اِس خط میں اعراب (حرکات) اور نقطوں کا چلن نہیں تھا۔ ابو الاسود دویلی نے تقریبًا سنہ 50ھ میں نقطے ایجاد کیے۔ لیکن یہ نقطے حروف کی شناخت کے بجائے اعراب کے طور پر استعمال ہوتے تھے۔

اصلاح خط[ترمیم]

جب اسلام مصر اور ایران تک پھیل گیا تو اکثر حروف کے ہم صورت ہونے کی وجہ سے قرآنِ مجید کی قرات میں مشکل ہونے لگی۔ مراسلت میں بھی کئی طرح کے مغالطے پیدا ہونے لگے۔ چنانچہ خلیفہ عبدالملک بن مروان نے عراق کے گورنر حجاج بن یوسف کو رسمِ الخط کی اصلاح کا حکم دیا، جس نے نصر بن عاصم کو یہ کام تفویض کیا۔

نصر بن عاصم نے اِعراب کے لیے نقطوں کے استعمال کو بدستور قائم رکھا لیکن اب اِن نقطوں کے لیے صرف قرمزی رنگ استعمال کرنے کی تجویز پیش کی۔ ہم شکل حروف کی تخصیص اور تشخیص کے لیے بھی اُس نے نقطے ہی ایجاد کیے لیکن اِن نقطوں کے لیے سیاہ رنگ لازم قرار دیا۔ خطِ کوفی میں یہ ترتیب تقریبًا چالیس سال تک قائم رہی حتٰی کہ عبدالرحمٰن خلیل بن احمد عروضی نے اِعراب کی شکلیں وضع کرکے اِنہیں سیاہ نقطوں سے الگ کردیا۔

ارتقاء[ترمیم]

خطِ کوفی اپنی سادہ روش اور واضح ہونے کی وجہ سے لوگوں میں مقبول ہوا اور تقریبًا چھٹی صدی ہجری تک مستعمل رہا۔ اِس دوران اس میں بعض تبدیلیاں بھی ہوئیں۔ دوسری صدی ہجری میں اس میں زاویے نمایاں ہوگئے۔ اِس کے بعد اِس خط نے قوسی شکل اختیار کرلی اور رفتہ رفتہ تزئینی اور آرائشی ہوتا چلا گیا اور بالآخر رواج سے خارج ہوگیا۔

اقسام[ترمیم]

خط کوفی کی 30 قسمیں ہیں:

  • کوفی مائل
  • کوفی مزهّر
  • کوفی معقّد
  • کوفی مورّق
  • کوفی منحصر
  • کوفی معشّق
  • کوفی مضفّر
  • کوفی موشّح
  • کوفی مشجّر
  • کوفی محرّر
  • کوفی مربّع
  • کوفی مدوّر
  • کوفی متداخل
  • کوفی منشعب
  • کوفی شطرنجي
  • کوفی فاطمي
  • کوفی مشرقي
  • کوفی مغربي
  • خط عثمانی

نگار خانہ[ترمیم]

حوالہ جات[ترمیم]